00:27 Basgançak | |
| BASGANÇAK Ýat bulutlar ýaýrar gözüň içinde Diller del ýagmyry edende beýan. Düýnki atan sözüň sowa geçende Tarkyldylar ýaňlanyp dur ikiýan. Şemala galgaýar ýüpek edähet, Diýýäniňi götermeli eginler. Käte çyn ýürekden daşaryk äňet Çözülmese aňyňdaky çiginler. Güýzde açan gülüň tomsuna solsa, Sowuk şemal kowar ýalňyş buludy. Sözüň Orhon daşy kibi berk bolsa Kök basmar, ýir telmer beýik buduny. Şaňňyrdaşar ursa demir saýgyçlar. Ýüregiňi dürter dady-perýady Eremiň nuruny guratsa gyşlar, Gözýaş halas eder aby-haýýaty. Ýok, düşmäge däl ol, münmäge gerek, Ilki ot bereli közümize biz. Muny başarypdyk ençeme gezek, Ýöräli ýokaryk, özümize biz. 2018 Oýlanmak Adamyň eşreti özünde gizlin Maksada ýetmeklik girende düýşe. Batsaň aňýaň düşünjäniň oýuna, Iki ikiň dört bolmaly hemişe. Hyýal daşy degeninde degnaňa Parçalanar pikirleriň aýnasy. Oýlanýarys, rahatlanýar ruhumyz Bizi gozgar ýyldyzlaryň gaýmasy. Esli lezzet mugt berildi bize Söýmek, pikir etmek, döretmek, görmek. Ýaşyl yşyk ýanyp durka köňülde Gelişmez agaja daňylyp ýörmek. Menem käte ýol ugrunda oýlanýan Pikir eşretini çekip içime. Öwrüm-öwrüm akar köňlümde gussa Taýynlanýan ýaly soňky göçüme. Oýlanmak – öz ýoluň göçümin bilmek Hemem görmek başgalaryň akylyn. Bir gün ýüregiňe ot salan ünji Üýtgeder dünýäniň ýalňyş akymyn. Bilýän bilen bilmeýäniň parhy köp, Öz pikir güýjüňe daýanmak gerek. Siz täze düşünjäň öňüni açyň, Bir köne ýumagy çöşlemä derek! Pikir per bermeýär täze pikire Arkasynda berk durmasa hakykat. Düşünje – giňlige açylýan gapy Düşünje – darlyga edilýän takat. Emma pikir ýok etmesin duýgyny Duýgy ruhdan heýkel diker paýhasa. Ýykyp bilmez söýgimiziň deregin Dünýä bizi deňiz kimin çaýkasa. Biz ýaşap ýeňýäris durmuşyň günün. Gel, täze ýeňişleň ýurdun guraly. Şeýle dowam eder, erte ha bu gün Dogruçyllar ýeňýär paýhaslylary. © Seýran OTUZOW | |
|
| |
| Ähli teswirler: 5 | |
|
| |
