16:21 Daýym gyzy Selbä... | |
 Exclusive DAÝYM GYZY SELBÄ... Biz — Güne ýanan garaja gyzlar: ertekewi bakja-baga gitmedik, multikleri tekrar-tekrar, doýa-doýa görmedik, gurjagmyzam ýokdy: saçly, gürleýän, emma çüýşe-adamlary gürledip, ýöredip, agladyp, güldürip bilen, geýindirip, iýindirip, maşyn-motora mündürip, göz-gaş , burny bolmasa-da uz ýaşynan «gelinleri» bäbekledip, ekledip, öýerip, köpeldip, öldürip bilen ukybymyz bardy. Enem aýtmyşlaýyn, gamsyz çagadyk. Emma kepbäň arkasynda, saýada, «Uly maşgalanyň» «keşgin çekýädik». Ýarty keçä sygan teatrdyk biz: guda-da giderdik, toýam tutardyk. Diýjegmizi agzymyza salan ýok. Biriniň sözüni gaýtalamadyk. Mammyja-da bolsa, ýalňyşam bolsa, ÖZ sözümiz bardy. Iýjegmizem agzymyza salan ýok: elim ýaly nany suwa basardyk, onsoň bizden bagtlam ýokdur, baýam ýok. Biz — Güne ýanan garaja gyzlar. Mekdebe özümiz gitdik we özümiz geldik. Hijimiz maşynly gatnadylmadyk. Elimizden tutulyp, itilib-u-idilip, ýalbarlyp, ýakarlyp, eltilen däldiris. Gulpagmyzdan çeken bezzatlaryňam merkini özümiz berdik. Ýogsa herimizde azyndan ýedi aga bardy, ýedi-de daýy. Kirlije, çorluja, porsuja däl biz, Hapysaja däl biz, ýaltaja däl biz, Ýo-ok, asssla betnyşan, myrdarja däl biz, Biz — häki Güne ýanan garaja gyzlar. Eder-goýaryny, bähbidin bilmez, Emelsiz, ýalýagy, ysnatja däl biz. Öýi-öý, köýi-köý, milleti-millet Hatda döwleti-de döwlet edenler — şu garaja gyzlar! YKRAR EDIŇLER!!! Iliň hakyn iýmek diýmek ne diýmek, Eklenmäniň ýeňil ýoly ne diýmek, Gybat, töhmet, görip, bahyl ne diýmek, Bilmeýän, bilmejek, bilmedik gyzlar. Päkize, päkize, päkize gyzlar. Biz asssyl garyp däl, han biz, soltan biz, Garagum sährada biten tülpan biz, Agaýunus, Meňli, Tumar, Gülpam biz. Pamykdan, gaýmakdan materialymyz. Gama batar ýaly biz... neýimiz egsikmiş?! Nämämiz kemmiş, gününe ýandyklarymyzdan?! Biz — topraga badaşan, zähmete bişen, il-güne garyşan — bagta ulaşan, düýnüň düýn, şu günüň şu gün bolmagy, ertirleriň ertirlerniň, nesilleriň nesillerniň geljegi, geljegi, geljegi üçin ägirt goşant goşan, goşýan we goşjak ýönekeýje gyzlar, Häki Güne ýanan garaja gyzlar. Bilinmese bilinmesin gadyrymyz! Gymmatymyz bolmanda nä, bolmasyn?! Gerekmişmi bize ykrar edilme?! Inkär edenleňem agzy gyýşarsyn! Ah, Selbi daýzam, ýaaa!!! Ah, Selbi daýzam!!! © Laçyn PÜRJÄÝEWA 15.11.2024 ý. | |
|
| |
| Ähli teswirler: 5 | |
|
| |
