17:08 Gögerçinler bilen söhbet | |
 GÖGERÇINLER BILEN SÖHBET[/c] Ýene tümlük, ýene gije, oýa men, Gögerçinleň sesi gelýär üçekden. Men olardan seýrek gelýän bu ýere, Käte salym düşýär iki-üç hepde. Şonda olar menden ýadyrgaýarlar, Awçy gelip, galan ýaly ahmala. Wah, siziňki hezil, ganatyňyz bar, Maňa görä ýakynrak siz asmana. Men gorkup aýagmy ýerden üzmäge, Bendi etdim arzuwlarmy, örkledim. Höwesim ýok hatda suwda ýüzmäge, Oglankam men uçmaga-da ökdedim. Adamlar guş däldir, gögerçinlerim, Düşünmezler maňa, çünki olaryň «Kalby hem gulagy möhürlenendir», Derdim diýsem, meger, gülki bolaryn. Onsoň men derdimi size hem Haka Aýdýan, ind-ä bu islegem sabady. Tesbide pikirim baglaýan sapak Üzüldi-de, monjuklary dagady... Pikirlem pytrady, gije tümlükde Görnenok hiç bir zat göreçlerime. Söze düşünjek ýok, derdim ümlükde Aýtdym üçekdäki gögerçinlere... © Orazmyrat MYRADOW | |
|
| |
| Ähli teswirler: 1 | |
|
| |
