Durmuşda bi.
Bir zat ýazanyňda sitata üçin ýa-da jaý ýerinde ulanmaga şap pikir gözläp döräýmeseň, öň okalan zatlary 20 ýyllap okaman gezýän wagtyň bolýar.
Käbir adamlar bolsa juda "kitaby" bolýarlar-da, meşhur şahsyýeti özüňe nusgalyk edinseň, gije-gündiz onuň ýazan zatlaryny gujaklap ýörmelidir öýdýärler.
Munuň ýaly zat bolsa, ol-a adaty durmuşda eken, hatda kitapdyr ýa kinoda-da şeýdip ýören adamy sähneräk görkezýär.
Iş, alada, gündelik hysyrdylar, täze-täze zatlary bilmek höwesi... şol bir kitaby gaýtalap-gaýtalap okamaga eliňi degirmeýär.
Mysal üçin "Göroglyny" çagalykda, ýetginjeklikde 4-5 ýylyň içinde 8 gezek okadym, "Gorkut atanam" şonçarak. Ýöne şondan soň bi kitaplaryň gatynam açamok diýen ýaly. Diňe ýaňky aýdyşym ýaly, nämedir bir zat ýazylanda gereklije ýerini takyk almak üçin açýaň diýäýmeseň. Ýöne bu eýýäm okamak bolanok-da, zähmet bolýar.
Şuň ýaly hereketlerem okyjyň haýsydyr bir awtora hormat goýmaýandygyny, ony hasaba almaýandygyny aňlatmaýar.
Wagt geçýär, adamyň islegleri, ymtylyşlary özgerýär. Otuz ýyl mundan ozal hemme ýaş-ýeleňleň öler jany oýnundan tansydyr aýdym-sazy esse hindi kinolardy. Soň bir döwür geldi Brýus Li, Wan Damm, Şwarsenegger, Stallone, Brýus Uillis, Dolf Lundgren, Brendon Li we ş.m. adamlaň hyýalyny eýeledi.
Indi nä?
Çagalar Brýusyň "Aždarha adasyny" bilenoklaram.
Çakraborti bolsa olar üçin hiç kim.

Çakraborti bilen bagly :-):

Eger-de aýal ýalan sözleýän bolsa...

Günlerde bir gün tikinçi zenan derýanyň kenarynda tikin-çatyna gümra bolup oturan wagty, atdanlykda oýmagyny derýa gaçyrypdyr. Bu onuň ýeke-täk oýmagy bolandygy zerarly, tikinçi hatyn bada-bat ajy gözýaş döküp ugrapdyr. Şol pille-de Haktagalanyň gudraty bilen onuň öňünde betbagtçylyga uçranlara hemaýatçy perişde peýda bolupdyr-da, ondan sorapdyr:
-Eý hatyn, sen näme üçin aglaýarsyň?
-Men tikinçi. Men diňe tikin-çatyn bilen gazanç edip, öz maşgalamyň eklenjine ýardam berip bilýärin. Bu wagt bolsa tötänlik bilen meniň ýekeje oýmagym suwa gaçaýdy. Indi men nädip gazanç ederin?
Hakyň perişdesiniň ýanynda munuň ýalyjak wiçjik zatlaryň müşgili barmy? Ol bir gezek “Ýa Allam, senden medet!” diýip akar suwa dem salypdyr welin, derýanyň ýüzi tolkun atypdyr-da, perişdäniň elinde zümerret bilen zerlenip, lagly-jowahyr bilen nagyşlanan, altyndan oýmak peýda bolaýypdyr.
-Bu seniňkimi?-diýip perişde, henizem gözýaşy kepemedik hatyndan sorapdyr.
-Jukk.-edip, öz gözleri bilen görýän keramatyna aňk bolup galan hatyn başyny ýaýkapdyr.
Onda perişde ýene-de ýaňky hereketini gaýtalap, tolkunyň oklan, tylladan, ýakut daşlary bilen bezelen oýmagyny gapyp alypdyr:
-Bu seniňkimi?
-Jukk.
Onda perişde, derýanyň tolkunyndan ýönekeýje bir demirden oýmagy çykarypdyr:
-Bu seniňkimi?
-Hawa-diýip hatyn begençli seslenipdir.
Perişde tikinçi zenanyň dogruçyllygyny halap, oňa ýaňky üç oýmagyň üçüsinem peşgeş beripdir-de, gözden gaýyp bolupdyr.
...Aý aýlanypdyr, ýyl dolanypdyr. Şol wakadan birnäçe ýyl geçenden soň, şol tikinçi hatyn günlerde bir gün öz äri bilen derýanyň kenaryna seýil etmäge çykypdyr. Şonda-da: “ýeser ýerde gaý tutdy” diýlişi ýaly, birdenkä atdanlykda tikinçi hatynyň ýoldaşynyň aýagy taýypdyr-da, ol suwa “jülpüldäp” gaçypdyr. Dessine-de, tokga daş kibi ýüzgür görgüli, derýanyň düýbüne gidipdir. Tikinçi hatyn ýene-de oýmagyny ýitirendäkisine görä beterräk, dat-bidat walalaýlap, aglamjyrap, kenarda iki ýaňa elewräp başlapdyr. Ýene-de onuň öňünde penakär perişde peýda bolupdyr-da, iki agyz sözde bolan wakanyň änigine-şänigine ýetekgä, derýa babatda şormaňlaý görgülä medet berermen bolupdyr.
Perişde ýene-de oýmak çykarandakysy dek “Ýa Allam, senden medet!” diýip akar suwa dem salypdyr welin, derýanyň ýüzi tolkun atypdyr-da, kenarda görk-görmek babatda deňsiz-taýsyz Mithun Çakraborti emele geläýipdir☻.
-Şu gara belamy seniýniň äriň?-diýip penakär perişde ýeserlik bilen sorapdyr.
-Hawa-diýip tikinçi hatyn ylalaşmaga howlugypdyr.
Ýeri, munuň ýaly gözüňi gyrpman sözlenýän ýalan bilen aldap bolýan bolsa, ondanam bir perişde boljakmy?
Penakär perişde hatynyň galat aýdýandygyny gözünden okap, girre gaharlanypdyr:
-Sen näme aldaýaň?-diýip, ol gök gümmürdeýän dek, nagra dartypdyr.
-Hawa, men aldadym,-diýip aýal, hemme hatynlaryň şunuň ýaly jygba-jyg halatlarda synmaz ýaragy bolan agy-gözýaşa ýapyşypdyr:-Meniň günämi öt, eý-a Hudaýyň perişdesi! Ýalan sözlänimiň sebäbi, sen öňki gezek, tä meniň öz oýmagymy tapyp berýänçäň derýadan birnäçe sany oýmagy şol çykardyň durduň. Soňunda-da olaryň hemmesini maňa sowgat berip gitdiň.

Elbetde, ol sowgadyň meniň durmuşyma noş boldy. Men ol iki oýmagy satyp, bol-elin ýaşaýyşa ýetdim. Emma, bu gezek welin, ýagdaý beýle däl. Ine sen ilkinji synanyşygyňda Mithun Çakrabortini suwdan sogrup aldyň-da, menden: “Şümi seniňki?” diýip soradyň. Men saňa: “ýok” diýip jogap beren bolsam, onda sen indiki synanyşygyňda derýadan belki Maçeteni oýnaýan artist Denni Trehony çykarardyň. Ýene-de saňa: “ýok” diýip aýtsam, onda belki üçünji synanyşygyňda suwuň astyndan meniň garamaňlaý işýakmazymy tartyp almagyňam ahmaldy. Iň soňunda-da sen ýene-de öňki gezekdäkiň ýaly, maňa meniň lebzi halallygym üçin olaryň üçüsinem serpaý ýapyp giderdiň.
Maňa bolsa, Alla saklasyn, beýle halat-serpaý gerekmez. Sebäp diýseň men pahyr, bu ýaşdan soň öň diňe birjiginiň täk-tenha özüniň iňirdisine dişjagazlarymy gysyp, iň soňky demimde zordanjyk döz gelip ýörün.
Onsoň, Hakyň perişdesi, seniň serpaýyňdan soň men ol ýatybiýenleriň üçüsiniň gündelik sütemine, jebri-jepasyna nädip çydaryn?
Ine şonuň üçinem, men şu gara belany görkezen badyňa: “Ýene-de üç sany nekgendä derek ýekejesiniň sypaty nähili-neneňsi bolanda-da, endik eden süýji duşmanym-la, edil biriniň ýüz-keşbi maýmynyňkydan sähel zyýada bolsa-da, meniň kibi pesgöwün pahyra bolýa-la, garaz görmedik zadym dä, “Öwrenişen ýagyň uruşmaga ýagşy” diýipdirler” diýen pikir bilen: “hawa, şü meniň ärim” diýip ýalan sözläýdim-dä...
Perişde hatynyň getiren delillerine loh-loh gülüpdir-de, Gang derýasynyň buljum ýerinde suwa düşüp ýörkä, näme üçindir birdenkä, göz açyp-ýumasy salymda nätänyş kenarda, Adam atanyň behiştdäki lybasynda peýda bolan Mithun Çakrabortini gelen ýerine ýollapdyr. Soňam özüniň henekçil häsiýetini agyzdyryklap, suwdan Maçeteniň roluny oýnaýan artist Denni Trehony çykarmagy goýbolsun edipdir-de, akylly tikinçi hatynyň öz ärini derýadan çykaryp beräkge, şol gülüp durşuna gözden sumat bolupdyr.
Wessalam, gep tamam...
Bu dana hekaýatyň hikmeti bolsa şundan ybaratdyr: Eger-de hatyn ýalan sözleýän bolsa, onda diýmek, hatynyň diňe ýagşy maksady bardyr we ol kimem bolsa özge birini halas etmekçi bolýandyr.

Çeşmesi: http://www.orator.ru/29.08.2020ý. Terjimesi üýtgedilip alyndy.

- suwrot warada.
- dur entek, ilki gowusyndan başla.
- gyzykly kompozisiýa. owadan arka fon.
- şeý diý.
- waka medresede bolýan ýaly. pir, ahun we okuwçylary. ol gaňrylyp ahunyna seredip, horjunyna kitaplaryny ýygnap duran talyp bir hili отчисление edilen ýaly duýgy döretdi.
- uf. belki ol kitaplaryny çykaryp derse taýýarlanýandyr?
- onda ol gijä galyp geldimikä? osoňam sapak-ders berýän bolsa talyplar başgaçarak oturmaly we kitaplary bolmaly ellerinde.
- erkin oturanda näme boljak.
- ahun-talyp suberdinasiýasy bar jan dogan. olar ahunyň öňünde dersde bir hili oturýalar, söhbetde belki, ýarym aý bolup oturarlar.... ol kelle ýalaňaç jigimiz ahunyň elinden kitabyny alýamy ýa berýär?
- saňa näme?
- nämä gaharyň gelýäraý? talyp-oglanlaň üçüsiniň jorabam bir görnüş ak sintetik ýüpden örülen öýdýän? ýa sponsorlaryň hudaýýoly diýip iberen joraplarymyka?
- :-(
- ýeri bolýa..., ýöne gyzykly kompozisiýa. owadan arka fon. tüýs türkmen tebigaty.