21:54 «Synsa synsyn biziň dutar...» | |
 «SYNSA SYNSYN BIZIŇ DUTAR...» «Synsa synsyn biziň dutar...» (köne makala täzeden garap) Ukrain halkynyň iki sany meşhur Şewçenkosy bar. Olar şol iki Şewçenkolary esasynda dünýä ýüzüne özlerini tanadyp bildi diýip, çekinmän aýdyp bolar. Biri− bize çagalykdan tanyş bolan Taras Grigorýewiç, ol baryp, Gökdepe söweşindenem ýigrimi ýyl öň älemden öten ajaýyp söz ussady. Ikinjisi−Andreý Nikolaýewiç. Şu wagt 50-ä golaýlan bu ynsan, heniz 25 ýaşynda wagty ukrain milletiniň adynyň millionlaryň dilinde aýdym bolmagyna sebäp bolupdy. Munuň üçin 1999-2006-njy ýyllaryň «Milanyny» ýadyňyza salmagyň özi ýeterlik bolsa gerek. Ýewropanyň žurnalistleri Taras Şewçenkony agzamakçy bolanlarynda «Munuň futbolçy Şewçenko bilen hiç hili baglanşygy ýokdygyny belläp geçmeli” diýen jümläni goşmagy halys endige öwrüp barýarlar. Şewçenko familiýa ukrainlerde başga-da kändir, emma bu iki familiýadaşyň arasynda baglanyşyk ýok diýen pikir bilen kän ylalaşasym gelenok. Kärdeşlerimiz göze görünmeýän bir baglanyşygy gözden sypdyrýarlar. Bu ady agzalan iki ynsanyň arasynda esli wagtyñ ýatanlygy hem dogry nokatda durup seredýän üçin hiç zat. Olaryň ikisem ukrain halkyna bolan beýik söýgüsi üçin uly sahna çykan we şol ugurda ajaýyp ýeňiş gazanan ynsanlar. Taras Grigorýewiç her hili güýçler tarapyndan köp ýanamalara duşanam bolsa, halkyna beýik eserler galdyryp bilipdir. Onuň milletine bolan söýgüsi esasynda dörän ajaýyp dramalar dünýäniň köp sahnalarynyň bezegine öwrüldi. Sürgün edilmäge çenli basyş edilen bu ynsan «Wesýet» atly goşgusyny: −Ölsem, meniň jesedimi, Ukrainada gömsünler. -diýip başlaýar. Öz halkyna bolan bimöçber söýgüsine ýugrup döreden eserleri esasynda ony dünýä ykrar etdi we bu gün ukrain halky oňa tagzym edýär. Ikinji Şewçenko futbol boýunça milli ýygyndysynyň lybasyny geýmek bilen, öz egnine «millet ynamy» diýen beýik borjy alan adam. Onuň futbol äleminde gazanan üstinliklerini henize çenli GDA döwletlerinde gaýtalap bilýän ýok. Andreýiň tälimçilige ilki başlaýanda aýdan sözüni bolsa, türkmen janköýerlerem ýatlap goýsa zyýan etmez: «Ýüreginde millet söýgüsi bolmadyk oýunça, aýagy bilen guş gapsa-da milli ýygyndyda orun ýok». Bu iki Şewçenkony BIR MILLETE BOLAN UMMASYZ SÖÝGI aýrylmaz baglap dur diýesim gelýär. Beýleki halklaryň söýgüsinem gazanmagy başaran şahsyýetler üçin mundan beýk baglanyşyk bolup bilermi eýsem?! Bu diňe Dnepriň suwuny içenlerde däl, islendik milletde hem bar duýgy. Tutuş millet bolup bir bagta şärik bolmak, içiňdäki milli ruhuň tolkun atmagyndan nyşan. Mysaly daşdan gözleme. Göni özüňe sowal berip gör, geçen möwsümde «Rostowa» köýdüren janyňy, bary-ýogy bir ýyl geçip, «Rubine» ýakmadyňmy?! Soň «Soçi», «Kaýrat», «Traktorsozi» we ş.m... Hany seniň ygraryň, hany durnuklulygyň?! Ýekeje möwsümde tutuş bir topary çalşyp bilşiňe bir gyradanam seredip gör. Ýöne bu düşünse bolýan awhal. Janköýerlik edýän toparyňy tutuşlygyna çalyşmagyňa Gurban Berdiýewiň ýekeje özi sebäp. Indi şol ýagdaýa Tatarystan tarapdanam bir seredip görüň. Türkmenistan diýilse, ilki kimi göz öňüne getirjekleri düşnükli bolsa gerek. Bularyň hemmesi biziň içimizden geçýän ortak bir ruh esasynda zynjyr ýaly sepleşip gidýär. Bir söz bilen aýdanyňda, inkär edip bolmajak söýgi − millete bolan söýgi. Ol bir-de saňa agyr duýlar, bir-de ol esasynda ýalkanarsyň. Her näme-de bolsa, şol milli ruh esasynda millet hökminde ýaşalýar. Ýa-da şol duýgulary kemän millet ownap, ýitmek bilen bolýar. Millionlaryň söýgüli oýny bolan futbolda bu hasam anyk äşgär bolýar. Dogry, Eýrandaky ýeňlişi hijimizem gowy kabul edip bilmedik, hatda men ýaly, heniz doly özüne gelip bilmän ýörenleriň barlgynam bilýän. Emma biz ýene-de milli ýygyndymyz üçin taýýarlanyberýäris. Belki ýeňiş gazanmak gaty kyndyr, emma biz Baýram Durdyýewiň tälimçiliginde meshur Aly Daýysy bolan eýrany utupdyk, Aman Koçumowyň döwründe bolsa Serdar Azmun, Jahanbaş, Terami ýaly ýyldyzly Eýrany, «Real Madridiň» iň bir ýyldyza baý döwründe tälimçilik eden Karluş Keýroş bilen bile kabul edip, deň oýnamagy başarypdyk. Şol gün Kriştiano Ronaldu ýaly futbolçynyň emele gelmegine goşant goşan portugaliýaly hünärmen Daşoguzdaky stadionda ýeňiş gazanyp bilmändi. Hut şu taryhyň gözli şaýady bolan uly ýaşly janköýerlere Eýrandan aňsatlyk bilen utuljagymyza ynandyrmak kyn. Galyberse-de, milli ýygyndy başga dereje, ol klub däl.. Klub bolsa başga gürrüň... Öňräk internetde bir gyzykly maglumata duşdum. «Ýuwentusyň» sadyk janköýerleriniň biri turinlileriň soňky ýeňlişinden soň öz söýgüli toparyndan ýüz öwürjekligi hakda arza ýazypdyr. Hatyň mazmuny umuman şeýleräk: « «Ýuwe», men 1997-nji ýyldan bäri saňa janköýerlik edýän. Iň kyn günleriňde hem janköýerlik etdim. Senden ýüz döndermedim. Emma sen meniň ynamymy iň möhim pursatlarda ýele sowurdyň ýördüň. ÝÇL finallarynda millionlap janköýerleriň yhlasyna hormat goýmadyň. Sen bizi aldadyň! Kubogyň edil alkymyna gelenimizde utulmagy endik edindiň. Ilki mekdepde meniň üstümden gülýärdiler. Soň inistitutda, soň iş ýerimde. Olar özleriniň «Barsasy» we «Realy». «M.Ýu-i» we «Bawariýasy» bilen hargulak kubogy alanlygyny zol-zol gaýtalap meniň içim-bagrymy ýakdylar. Sen bolsa, bir gezek bolsa-da saňa janyny köýdürýän janköýerleriň umydyna hormat goýmadyň. Men sen sebäpli kän utandym, aşak bakdym. Bu gün bolsa senden ýüz öwürdim, hoş gal, eý bibaýrak topar!» Dogrusy, okap gaty tolgundym. Ol mamla. Janköýer klubdan ýüz öwrüp biler, «Ýaryndan aýrylan ýedi ýyl aglar» diýen ýaly, belli bir möhletden soň hemmesini undubam gider. Emma milli ýygyndydan?!.. Ol, mümkin däl zat. Ýaşyl Tugy öpüp, elini ýüreginiň üstüne goýup, milli gimnimiz astynda oýna başlan ýigitlerden hiç wagtam ýüz öwrüp bolmaýar. Biz bir ýylda «Rostowy» başybitin «Rubine» ýüzugra çalşyp bilýäs. Ýöne milli ýygyndy, ol başga. Isle ol Gonkongy utup bilmesin, hala öýde özbekden ýeňilsin. Biz diňe gynanýas, jowranýas. Ýöne el salgap gidilenok. Keremjanyň «Synsa synsyn biziň dutar» diýip, gaýtadan synanyşy ýaly, irmezek söýgi bi. Ana, hemme gepem şonda! Ýurt lybasynda meýdana düşjek ýigitlerimiz şony bir munut hem unutmaly däl. Ol lybas−mukaddes lybas. Ol lybas şeýle bir gudratly welin, hatda Totti ýaly futbolçysy bar bolan Italiýada Roberto Bajony aýratynlap, asmana galdyryp bilýän lybas. Tottiniň janköýerleri meni bagyşlasyn welin, ol barybir Roberto Bajo bolup bilmeýär. Hawa, Rimde ony gahryman ederler. Ol muňa doly mynasyp. Oňa «Imperetor» diýiň, ylalaşýan. Emma gürrüň ullakan Italiýa hakda giden wagty, olaryň milli ýygyndysyna has köpräk sadyk galan adamy uly sahna çykarmak adalatly bolar. Italýan halky şonuň üçinem bu iki ynsandan Bajony has eziz görýär. Edil şu lybasy on-on bäş minut geýmek üçin «Angilýa döwletindenem abraýly» diýlip ykrar edilen Dewid Bekhem ençeme gezek Amerikadan Dumanly Albiona ýörite uçupdy. Şoňa görä netije-de gazandylar. Halk hiç wagt, hiç ýerde ol lybasyň eýelerine biparh garamaýar. Jenap Orazow we onuň ýigitleriniň üstünde häzir şeýle jogapkärçilikli ýük bar. Biziň Ýaşyl Tugumyzyň nädereje belentlikde pasyrdajagy hem, şol lybasyň eýelerine bagly ahyry. Hut şonuň üçinem, milli ýygyndymyz milletimiz bilen aýrylmaz söýgi esasynda baglanan. Söýginiň iň bir ezýetli ýerem, lezzetli ýerem ony terk edip bolmaýanlygynda-da, gardaş! © Merdan BAÝAT Bellik:Türkmenistan we Eýran milli ýygyndysynyň arasyndaky duşuşyk ertir — 26-njy martda paýtagtymyzyň «Aşgabat» köpugurly stadionynda geçer. Oýun 20:00 da başlanar. | |
|
| |
| Ähli teswirler: 29 | |
1
0
1
0
| |
