19:45 “Akpamukus” kofesi we kökesi | |
“AKPAMUKUS” kofesi we kökesi  Ilki bilen Akpamykdan bir parça okaly. “Akpamygyň ejesi bir köke edip beripdir. Akpamyk kökejigini öňüne salyp, tigirläp ugrapdyr. Akpamygyň bir pişigi bar eken, olam Akpamygyň yzyna düşüp, üc tirkeş bolup ýola düşüpdirler. Akpamyk dem-dynjyny almak üçin ýol ugrunda birazajyk irkilipdir. Şol wagt pişigi kökejigiň bir gyrasyny gädipdir. Akpamyk ýene tigirläpdir, bolmandyr. Ahyry aglamaga başlapdyr. Birden palçyk edip, gädigi beklemek ýadyna düşüpdir. Derrew palçyk edip, kökäniň gädik ýerini bekläpdir”. Täzeçilligiň, türkmen brendleriniň gürrüňini edipdik. Şu ýerde kelläme gelen ideany paýlaşýan. Eger pikirimi birileri amala aşyrsa, bir nas puly eçilerlerd-ä (patent alyp durjagam däl). Onda, diňläň. “Starbaks” kofehanalar zynjyryny bilmeýän ýokdur. Indi, “Starbaksy” millileşdirip “Akpamukus” kofehana-çaýhana zynjyryny döredýäris. Emblemasynda “Starbaksyňky” ýaly iki guýrukly deňiz jandarynyň ýerine gupbalyja Akpamygy şekillendirýäris. Arkasyndaky tolkun türkmen sährasyny aňlatsyn. (Dogrusy suratdaky “Akpamukus” emblemasy degişmedir, ýöne yrym üçin “Starbaksa” öýkünildi. Emblema düýbünden başga edilmeli :-)) Ertekide Akpamygyň kökesi bardyr. Olam kofäň gapdalyndan berilmeli ýörite resept bilen taýýarlanylýan köke bolmaly (belki külçe tagamly hamyry süýtli bolmalydyr). Kökäň aýratynlygy nämede? Hawa pişigiň dişläp gädik goýmasynda, Akpamygyň ony palçyk bilen beklemesinde. Palçygyň ýerine ýene-de aýratyn reseptli elde taýýarlanýan ajy şokalad bolmaly. Kafede hökman eldeki diri pişikler äwmän-ürkmän kliýentleriň aýagyna çolaşyp ýörmeli. Elbet-de kafeň ýene bir hökmanlygy mugt internet bolmaly. Öňüňde kofe, ýanynda Akpamygyň şokoladly kökesi, ilki bilen gytyrt edipjik şokaladyny dişleýäň, soň gyzgynjak ajy kofäňi süzýäň. Soň külçe tagamly kökeden dişleýäň. Öňüňde-de dostuň (ýa-da ýene biriň). Daşaram noýabyrrrrrrr-yň yzyndaky dekabyr-rrrrrrrr. Howadan gar ysy gelýär. Aýagyň aşagynda-da Akpamygyň dürli-dürli порода-ly ýumşajyk tüýli pişikleri…. Şeýle bolsa, ýam-man gowy bolar. Hämi? | |
|
| |
| Ähli teswirler: 8 | |
|
| |
