08:32 Çemenli Sähranyñ Mukamy | |
 ÇEMENLI SÄHRANYÑ MUKAMY Perzentlerim Çemene, Sähra, Mukama bagyşlaýaryn Takdyrymyñ ýazan ýolundan gädip, Günleriñ ajysyn-süýjüsin dadyp, Barýan ömrüñ ýaryn yzyma idip, Çemenli Sähranyñ Mukamy bilen. Ýollaryny geçdim ol ýanyp köýmäñ, Girdabyna düşdüm ýeñip-ýeñilmäñ, Gadyr-gynmatyny duýdum bu dünýäñ, Çemenli Sähranyñ Mukamy bilen. Ajaýyp aýdymlar ýüregme dolýar, Ýagşy arzuwlary kalbyma salýar, Ylham içre köräp ýanasym gelýär, Çemenli Sähranyñ Mukamy bilen. Arzuw ganatlanýar dünýäm ýagtylýar, Razy ykbalymdan däl men bagta zar, Durmuşa buýsanýan, bolýan bagtyýar, Çemenli Sähranyñ Mukamy bilen. Çep gursakda dört bölekdir jigerim, Perzentlerim hem-de ýarym-söwerim. Ertirime hyjuwlanýar ýüregim, Çemenli Sähranyñ Mukamy bilen. Ene çagasyndan çekmese nala, Ömür ömre meñzär, ykbal ykbala. Taýýar soñky deme çenli gitmäge, Çemenli Sähranyñ Mukamy bilen. © Nartäç ÝUSUPDURDYÝEWA "Çemenli Sähranyñ Mukamy" kitaby. 2022 ý. 80 - nji sah. | |
|
| |
| Ähli teswirler: 1 | |
0
| |
