Bir wagtlar bir Waňk bardy.
O Waňk o wagtlar entek waňk däldi.
Waňkyň waňk däl wagty...
Her ýekşenbe güni telewizordan «Утренняя почта»* görkezýärdiler.
Waňkyň dogany hemme öý işlerini irgözin dynyp, şo gepleşigi görmäge oturardy.
Aýdym aýdardylar, tans ederdiler...
Waňk bu gepleşigi halamazdy.
Sebäbi Waňk aýdym aýdyp bilenokdy.
Dogany bolsa diýýädi:
– Seret, iliň çagasy bela ýaly. A sen bolsa....
Waňk bu gepleşigi halamazdy.
Sebäbi tans edip bilmezdi.
Dogany bolsa:
– Seret, iliň çagasy bela ýaly. A sen bolsa....
Waňk, öňler waňk däldi.
Ol soň Waňk boldy.
Ýuwaş-ýuwaşdan, her hepde bir basgançak beýgelip doly we dogry, gutarnykly Waňk boldy.
Ol hiç kimi günäkärlänok.
Doganynam, «Утренняя почта»-nam...
Iliň çagasy ýaly bolup bilmedigine özi günäkär.

* «Утренняя почта» — музыкальная телевизионная программа, выходящая в эфир с 7 сентября 1974 года по субботам или воскресеньям.

Durmuş dokrak (“mes” diýmäýin), asudarak, wurgy-ýençgisizräk boldugyça, geregindenem artyk nerme-näzikleşilýämi nämemi...
Elbetde, çagalaň çagalykda: “sen pylanyça ýok” diýip, üznüksiz kemsidilmesin-ä aklajak bolamok. Ýöne...
Öňler her öýde diýen ýaly dokuz-on çaga bardy. Olaram allajy maýmynjyklar ýaly, tutan ýerini goparjakdan.
“Meýdiň ýansyn, gyran degmän galan” diýip, ejesi eline ilen zady aýlap salar yzyndan. Özem: “Degäýmesin-ow!” diýip, sowarak däl-de, hakyýt degirjek bolup, müçükdirjek bolup zyňar. Degip müçükdirse-de ýene idi-yssywat edip garabagyr gyýylýanam özi.
Halys çenden çykyp garagolluk etse-de kakasyna şugullanar. Olam amerikan kinolaryndaky psihologlar ýaly: “ýerde goýsaň pos bolýa, gökde goýsaň ys bolýa” diýlip hüllülenýän balajyk-balaşkasyny gapdalyndaky mymyjak kuşetkada ýatyryp, ruhmeýmirediji içginden-içgin gürrüňleri etmez.
“Häý seňemmir mamaňy...pat-pat...” bolar.
Şolam terbiýe.
Ölmändirlerem, ata-enelerinden doýgun, özlerinden mydama “nidawolnyý” bolup ýören adam bolubam ýetişmändirler.
Özem şomatkylara şondan öňküler: “Zalýatyrda ýetişdirilýän-dä byrnyndan maňkasy çogup duranlar-da bylar!” diýip käýinerdiler. Olaň: “zalýatyr” diýýäni, keselläp, egbarlan goýunlaryň aýratynja saklanyp idedilýän ýatagydy – izolýator.
Garaz, çakdan aşa zabunlygam, doňýürekligem gowy zat däl. Ýöne çenden aşa nerme-näzikleşmegiňem soňy: “Bih, bi giden aýal-erkekdigem näbelli, hemmesi birýan ujundan pedikýur-manikýurly, ykjam losýonlanan keltesaç, ýüzleri ütüklenen uniseks metroseksuallar nirden geldikä? Aýdanmy ýa Myrryhdan?” diýip geňirgenen kişi bolup, öz-özüň bilen hyýaly interwýujyk almaga baryp ýetýär.
Bilemok, nämüçindir, Gurbannazar Ezizimiz, çagalary söýmek babatda: “Öz söýgüňizde-de boluň gazaply” diýip maslahat berýär. Olam elbetde çagaňyzy: “eliňize ilen zat bilen wuruň, ýenjiň” diýib-ä salgy berýän däldir.

Şu temada aýdara zat kän.

Mydama bolmasa-da deñeşdirmegiñ urmakdan beter awyndyryanyna janly şayat. Hem deñeşdirilýän kişä (bigünä bendä) ýigrençdenem beter kine döräp bilýä.

Serdar akga, şu pikirleriñizde sypaýyçylykly dawalaşara:-) zat bar.

"Dawa"-laşman, jedelleşsek, ondanam gowusy "disputa" (çekişmä, munazara) girseň dogry bolmazmy, Mekan?! :-).

"Her kellede bir hyýal, kel kellede müň hyýal" diýilýär-ä. Islendik meselede-de her bir adamyň öz garaýyşy bar. Ýene-de "diýilýär-ä" diýsek: "Dünýäde näçe adam bar bolsa şonça-da filosofiýa bar" :-).
Garaz, öňemmiri aýtmyş: "aýdylan zat kän, edilýän zat az" :-).

Çaga terbiýesi meselesinde bolsa, elbetde uniwersal usullar, kadalar, dessurlar bar. Ýöne her maşgalada, her öýde, her ata-ene öz çagasyny özüçe terbiýeleýär. Esasy zat çagaňa käýýe, birneme ýowuzrak dara, ony biri bilen deňeşdirmek arkaly oňa ösmäge, tijenmäge çelgi görkez... ol hemişe bilsin, ol seniň üçin hemme zatdygyny - diriligem, dünýäde - seniň diňe şo bilen, "şol" diýip dem alýandygyňy. Ine şeýle ýagdaýda çaga bilen ata-enäň arasyndaky uşak-düşejik büdür-südürlikler öz-özünden düzeler gidermikä diýýän.
Terbiýelenmek tejribesi bolsa, her adamda birhili bolýar. Mysal üçin, birine perzentleriniň üstünde kökenek eje-kakaň elinde dünýä inmek, ýaşamak we ese-boýa galmak nesip edýär.
Beýleki birine bolsa...
Hiç ýatlasym gelmeýädi şuny, ýöne onda-da hemişe ýadyňa düşüp dur:
Obada "puront döwri" (front döwri) diýilýän, neşekeşligiň geriminiň milleti gemirýän 90-njy ýyllarynda hemem 2000-njileň başynda, bir gaty erbet süpük bardy. Bir gezek toýda gelnalyjy gelende şoň oguljygy seçilýän pullary ala-hasyrdy bolup çöpleýär. Üsti-başam oda atsaň tütemejek. Üstesine-de obada önüp-ösenler bilýändir, muň ýaly toýlara aýdylmasa ýa-da öýüňe ýakyn bolmasa adatça barylmaýar. Emma bu çagajyk toý bolýan ýer mysal üçin obaň bäri çeti bolsa, öýem aňry çetinde-de bolsa toý barypdyr. Umuman gepiň küle ýeri, ýaňky başagaý bolup ownuk-uşak seçilen pullary çöpledi. Soňam bir görsem ýaňkyjany neşekeş kakasy tutlyga dykyp, köne beton haýada gysypdyr-da, çöplänje pullaryny elinden gaňryp alyp dur. Ojagazam: "ejem ýaranok, "öýde çörek ýok" diýdi" diýip jebis gysan dodajyklaryny zoraýakdan gymyldadyp, çöplänje ryzkyny bermejek bolýar...
Emma, şonda-da aldy.
Çagajyk gözündenem boýur-boýur dökýär. Toýa bilen baran dostlarym bilen ojagaza dözmedik. Hemmämizem otuzam ýaşamadyk ýaş oglanlar, ýerli-ýerden: "Edýäniň näm-ow?!" diýişdik.
"Size näm-aý? Etsem öz çagama edýän. Goşulmaňsan-aý! Wurasyňyz gelýänem bolsa geliň, wuruň! Sizemmir meni wuranyň biri bolarsyňyz-da..." diýip, o süpügem dünýeden-ä nadyl, özem azarly bolandygy sebäpli garadangaýtmaz, hüňürdäp, çagasyndan gaňryp alan puluny gysymyna gysdy-da, ýempikläp ýok boldy.
Ýene dözmän ýaňkyja herimiz ýanymyzda bolanjasyndan az-owlak pul beren bolduk.
"Bar derrew özüňem öýüňize ylga, kakaňa-da görnäýme, ýogsa ýene eliňden puluňy aldyrarsyň!" diýşip, haýdadyp goýberdik.
Şo oglanjyk şumadam bar - ömri uzak, görjegi gowy bolsun. Ejedenem, kakadanam ir galyp atasynyň elinde hor-homsy ösdüler. Häzir tüweleme, öýli-işikli, ýük ulagyny sürýär.
"Ýetim oglan it bolar, ölmese ýigit bolar" diýilmeýämi?
Özüm-ä diňe ýolda-yzda ýa toýda-ýasda salam-helik alşaýmasam içgin gepleşip göremok, ýöne "gowy ýigit" diýýäler.
Men bolsa her gezek şony göremde, şo 20 ýyl mundan ozal, haýada gerşini diräp, ýumrujagyndaky puljagazyny üflis kakasyna bermejek bolup, hyrçyny dişläp, gözünden döküp duran 9-10 ýaşlyja oglanjygy görýän. Her gezegem gynanýan...

Dogry aýdýaň, @myhman, bu meselede aýdara şeýlebir kän zat bar welin, tom-tom kitap ýazmaga-da ýetjek. Şeýlebir köpgyraňly, çylşyrymly hadysa. Ýöne şony seljermelem, netije-de çykarmaly, görelde-de görkezmeli, başam alyp çykmaly...
Sebäbi başga ýol ýok.
Kimdigi anyk ýadyma düşenok, ýöne biri: "Geçmişini tüpeňleýän geljegine top atýandyr" diýipdir. Çaga terbiýesem edil şoň ýaly bir zat. Terbiýäni tüpeňleseň, diňe geljegiňe däl, hemme zadyňa top atýaň.

ATALAR WE OGULLAR

Atalar-ogullar... beýik döwletdir
Şolardyr bu döwre ýaňyn salýanlar.
Ýöne käte duşýar bu iki nesliň
Arasyna çöp atmakçy bolýanlar.

Galat pikirlere uýmak ne derkar,
Işimiz şowludyr, günümiz düzdür.
Ýok, atalar biziň geçmişimiz däl,
Biziň atalarmyz şu günümizdir.

Nirä barýar naýza kimin düzülip?
Aýdym bilen dyňzap duran hatarlar?
Olar täze dünýäň goragna galan
Mizemez ynamly biziň atalar!

Olar geljegmiziň dok dänesini
Durmuşyň tarpyna atanlarmyzdyr
Ykballarna beýik synag duş gelen,
Mizemez ynamly atalarmyzdyr.

Öňden gelýär şeýle ajaýyp nakyl:
Ekin ekilmese, hasyl orulmaz.
Bu biz ahyr — eken zadyn orýanlar,
Bu biz ahyr — atalar we ogullar.

Häzir olaň kimsi pensiýa çykan,
Kimsi işde. Emma maksatlary bir:
Olar bu günleriň ogullarynyň
Gatnaýan iň kämil mekdepleridir.

Goý, dar balak geýsin, kafe gatnasyn,
Ýöne gaýtalansa ýene o günler.
Atalar dek merdem aýaga galar,
Şolaň mekdebinde okan ogullar!

Gurbannazar Ezizow

ATA IGENJI

Bolup ýörşüň hiç maňzyma batanok,
Käýýäp ýörmäge-de ysanok bognum.
Saňa akylam-a gelerçe boldy,
Hemme kişi ýaly bolarlar, oglum!

Öz diýeniň tutup ýörsüň elmydam,
Päkmikäň öýdýärsiň hemmeden beter.
Ýaşlygyndan şeýdip ýörseň girrelip,
Düşewüntli iş başyny kim tutar?

Menem ýaş bolupdym. Ýöne başlygym
Un diýse, un çekdim, gum diýse-de gum.
Sen nireden boýnuýogyn doguldyň?
Hemme kişi ýaly bolarlar, oglum!

«Onuň tutýan ýoly, päli nädogry,
Ol özüňden başga bardyr öýdenok!»
Muny diýmek seň paýyňa düsüpmi?
Näme üçin başga biri aýdanok?

Saňa başda edep-ekram öwredip,
Sypaýy terbiýe bermekçi boldum.
Saňa diýdilermi — ýerine ýetir,
Hemme kişi ýaly bolarlar, oglum!

«Ol adam itdenem, beter ýaranjaň,
Duşsa uly kärlä, guýruk bulaýa».
Ýeri, seniň näme işiň diýse-ne,
Seň özüň ýaranjaň bolmasaň bolýa.

Işiň bile bol-da, dogruja ýaşa,
Senden tamakin däl köp zady göwnüm.
Işiň şowuna bor, horluk çekmersiň,
Hemme kişi ýaly bolaýsaň, oglum!

Siz ýaşlar ýa barypýatan iş ýakmaz,
Ýa ýürekde päklik ýokundyňyz kän.
...Wah, ýene öýkeläp gitdi peläket,
Diýmesiz sözleri diýäýdimmikäm?

Gurbannazar Ezizow

SÖÝÜŇ ÇAGAŇYZY

Söýüň çagaňyzy!
Söýmekden arman.
Säherler oýanyp öpüň bir salym,
Eline tutduryp ullakan alma,
Pata berip, uzak ýollara salyň!
Gorkmaň! Olar näçe daşa gitse-de,
Gelerler,
Eşitse çagyrýanňyzy.
Bir dilegim:
şatlyk bilen gussada
Oňatlyga ündäň çagalarňyzy!
Utanmaň!
Gizlemäň ýüzleriňizi,
Dymmaklygy,
ýygralygy owradyň!
Öz aýdyp bilmedik sözleriňizi,
Çagaňyza aýtmaklygy öwrediň!
Ýogsa käte bilýärisem öňünden,
Emma «Äý» diýýäs-de, dymýas-da gidýäs:
Ilki dymyp,
geçip onuň deninden,
Soň
tankyt edere adam döredýäs.
Bu islegmiz däl, perwaýsyzlyk bu,
Islämzok adamyň peselenini.
Ýöne ownuk işde unudaýýarys
Döwrüň
in agyrly meselelerni.
Synlaň çagaňyzy: işe gümramy,
Ýa-da onuň edýän işi galatmy,
Her haýsy bolsa-da, dymmaň adamlar,
Siz
öz söýgiňizde boluň gazaply.

Gurbannazar Ezizow

Oglanjyga ejesiniň öwreden 20 zady ☺

1. Ejesi oňa özgäniň zähmetine hormat goýmagy öwretdi: “Eger-de siz bogalaşyp, biri-biriňizi öldürmek isleýän bolsaňyz, onda daşaryk gidiň, men edil ýaňyja içerini süpürdim!”;
2. Ejesi oňa Hudaýa ynanmagy öwretdi: “Şu biderek zadyň ýuwup aýrylanyny diläýgin!”;
3. Ejesi oňa logika (mantyga) laýyk oýlanmagy öwretdi: “Sebäbi men şeýle diýip aýtdym, ine şonuň üçin!”;
4. Ejesi oňa emele geljek netijeler barada oýlanmagy öwretdi: “Ine häzir 4-nji gatyň penjiresinden gaçarsyň, onsoň men seni ýanym bilen dükana äkitmerin!”;
5. Ejesi oňa sebäp bilen netijäniň arasyndaky baglanyşygyň nämedigini düşündirdi: “Eger-de sen häziriň özünde möňňürmegiňi bes etmeseň, onda men seni ýenjerin!”;
6. Ejesi oňa bolup bilmejek kynçylyklary ýeňip geçmegi öwretdi: “Agzyňy ýum-da, çorbaňy iý!”;
7. Ejesi oňa çydamlylygy öwretdi: “Hemmeje zady iýip tükedýänçäň saçagyň başyndan turmarsyň!”;
8. Ejesi oňa geljege mert seretmegi öwretdi: “Hany garaş bakaly, men seniň bilen öýde mazalyja gürleşerin!”;
9. Ejesi oňa öz-özüňi bejermegiň esaslaryny öwretdi: “Eger-de sen gözüňi çaşartmagyňy bes etmeseň, galan ömrüňe-de şol durşuňa galarsyň!”;
10. Ejesi oňa çeýe bolmagy öwretdi: “Seret hanha, ýeňsäň garagäz!”;
11. Ejesi oňa ekstrosensorlygy öwretdi: “Switeriňi geý, men seniň üşeýändigiňi duýýaryn ahyry!”;
12. Ejesi oňa nädip ulalmalydygyny öwretdi: “Eger-de gök önüm iýmeseň, hiç haçanam ulalmarsyň!”;
13. Ejesi oňa genetikanyň esaslaryny öwretdi: “Bu bolgusyzlyklaryň barysy saňa kakaňdan geçen bolmaly!”;
14. Ejesi oňa özüňi nähili alyp barmalydygyny öwretdi: “Kakaň ýaly özüňi alyp barmagy häziriň özünde bes et!”;
15. Ejesi oňa mümkin bolmadyk zatlara-da ynanmagy öwretdi: “Men seniň içiňi görüpjik durandyryn!”;
16. Ejesi oňa hemme zadyň oňat tarapyny görmegi öwretdi: “Ýene-de öz otagyňy mal ýatagyna öwräýdiňmi?!”;
17. Ejesi oňa danalygyň nireden emele gelýändigini öwretdi: “Sen meniň ýaşyma ýet, onsoň akyl sat!”;
18. Ejesi oňa degişmegi öwretdi: “Haçan-da ot orujy enjam bilen aýagyňy kesäýseň, gözüň ýaşyny seçelendirip meniň ýanyma ylgap gelmäge het edäýmegin!”;
19. Ejesi oňa durmuş hakykatynda nädip ýaşamalydygyny öwretdi: “Men saňa million gezek aýtdym – ulaldyp geplemegiňi bes et!”;
20. Ejesi oňa göriplik etmezligi öwretdi: “Dünýäde millionlap garyp çagalar ýaşaýar, şolaryň hiç biriniňem seniňki ýaly ajaýyp ata-enesi ýok!”.

Çeşmesi: http://fit4brain.com/914

Bize sazlaşykly we bagtly ýaşamaga päsgel berýän 30 endik:

1. Özüňe ýaramaýan zatlara çydamak;
2. Öz-özüň däl-de kimdir başga birine meňzäp, şol boljak bolmak;
3. Özüňe baha bermek ukybyňy ýok edýän adamlar bilen gatnaşyk saklamak;
4. Başgalaryň aýdýan zatlary barada oýlanmak;
5. Hemme zady öz gözegçiligiňde saklamaga çalyşmak;
6. Akymyň ugruna görä ýüzmek we özüňe iň pes garşylyk emele geljek ýoly saýlamak;
7. Öz pikirleriňi we nukdaýnazaryňy içiňden çykarman saklamak;
8. Bagty satyn almaga çytraşmak;
9. Ýalňyşmakdan gorkmak;
10. Özüň hakda pikir etmän, diňe başgalar hakda oýlanmak;
11. Hemmelere ýaranjak bolmak;
12. Ýakynlaryňy we ataň-eneňi ýatdan çykarmak;
13. Öz boş wagtyň hemmesini dört diwaryň arasynda geçirmek;
14. Elmydama howlugmak;
15. Öz-özüňi ýazgarmak;
16. “Men başaramok” diýmek we özüňi diňe şowsuzlyga taýýarlamak;
17. Özüňi başgalar bilen deňeşdirmek;
18. Diňe geçmişiňi seljerip, ökünip ýörmek;
19. Diňe geljegiň barada pikirlenip ýörmek;
20. Durmuşyňdan zeýrenmek we öz-özüňe nebsiň agyrmak;
21. Öýke-kinäňi özüňde saklap ýörmek;
22. Gerek däl zatlary satyn almak we saklap ýörmek;
23. Hemme zady özbaşdak etmäge çalyşmak
24. Kämil bolmaga dyrjaşmak;
25. Jogapkärçiligi başgalaryň üstüne atmak;
26. Göriplik etmek;
27. Mydama gaşyňy çytyp ýörmek;
28. Hemmeler bilen basdaşlyk edip ýörmek;
29. Hemmeler üçin hemme zat bolmaga dyrjaşmak;
30. Gadyrbilmez bolmak.
Ine, şu endiklerden dynmasa, adamlaryň bagtly ýaşap we şahsyýet hökmünde ösüp bilmejekdigini käbir hünärmenler nygtaýarlar.

Çeşmesi: http://fit4brain.com/3795

ana-ana...
17. Özüňi başgalar bilen deňeşdirmek; (Bize sazlaşykly we bagtly ýaşamaga päsgel berýän endik(leriň biri))
özüň özüňi başga biri bilen deňeme, deňetdirmede...
hemem esasy zat sen öz çagaňda we hiç kimde "iliň çagasy ot ýaly, a sen bolsa..." eksperimentini etme...

"öz söýgiňizde boluň gazaply"
kakam pahyr meni (men özüme jogap berýän) gowy görýänini kän äşgär etmezdi, söýgüsinde gazaply boldugymyka, ýa häsiýetindenmikä?
diňe çalarak içimi gyjyklap meni çabalandyryp :-) gowy görýäni ýadyma düşýär... içimi gyjyklar, meň bolşuma-da özi hezil eder... ýöne hiç aýnatmady...
şoň üçinem men aýnak däl :-)
aý bolýa, ruhlary şat bolsun....

Eline tutduryp ULLAKAN ALMA,
Pata berip, uzak ýollara salyň!

şu ullakan alma nämäň simwoly-ka.
pikirimçe bilimiň bolmaly...
bilimi-düşünjesini bereňsoň öz ýoluna pata beriň diýýän ýaly.
Alma - diýende jennetde wagtyndan öň dişlenen (iýilen) alma hem ýada düşüp gitdi...
Jennetde-de şol alma (miwe, iýmit) sebäpli "pata berlip, uzak-uzaklardaky dünýä" iberildik dämi?
indem bar arzuwymyz yzymyza dolanyp barmak... :-)

Dawa sözüni degişmek üçin aytdym, şony bildiryän yşaratjygam goydum, şunýaly :-)

Iki ýalñyşyñ haýsysynyñ dogrulygy hakynda jedelleşmek - mantyksyz.

Urmagam yalñyş, deñeşdirmegem (meñ pikirimçe).

Eger mejbur bolsañ, başga alaç yok bolsa, onda iki yalñyşyñ haýsy beýlekä görä zyýansyzrak diyip pikirlenip bolar.

Nähili terbiýelenenem bolsa, ata-enesinden närza bolan bolup oturmak iñ ýalñyşy. Muña degişli hadys hem bar.

Terbiyede ata-enäñem roly uly welin, töweregini gurşaýan beýleki adamlañkam uly. Hemme döwürde-de urup terbiyeleyänem bar, deñeşdirýänem, görelde boljak bolyanam...... Ýöne, üns berseñ, tutuş jemgyýet birsydyrgynyrak bolyandyr. Şoñüçindir belki pokoleniye düşünjesem. Isklýuçeniyeler umumy kadany bozmayar. Mysal üçin: siziñ agzan döwrüñizdäki gelinleriñ çydan zadyna häzirkileriñ näçe %-i çydar?! (Şu yere düşündiriş gerek: men çydanlañky dogry ya beylekileñki dogry diyjek bolyan däldirin).

Diýjek bolýanym: siziñ pokoleniye urlany üçin, käyeleni üçin "adam" bolan däldir. Ya deñeşdirileni üçin "frontçy" bolan däldir mikä diýýän.

Terbiýäni tüpeñlemege düşünmedim.

Bir mugallym tanşym ba (aslynda kän mollym tanşym ba, şolañ biri), pedagogika bilen gyzyklanya. "Mollym bolsa, pedagogika bilen gyzyklanýa diýmäñ näme?" diýmäñ, onýalylar juda seýrek. Şo aýdýa: "iki görnüşli çaga terbiýesi ba" diýýä. 1 añsat görnüşi 2 dogry görnüşi.

"Ýalñyş görnüş" diyenok.

Oñ aydyan zatlaryny eder yaly däl.

Yokarda bir yerde çaga ulalansoñam ata-enesinden närza bolmaly däldigini yazdym. Ol ata-enäñem eden (edyän) zatlarynyñ dogrudygyny añlatmaýar (owlanyñ... yaly söymeler, meydiñ yansyn, meydiñe... yaly gargynçlar näçe söylüp aydylyanam bolsa juda juda yalñyş hasaplayan. terbiýä täsiri yogam bolsa....). Esasy zat özüñ edýän zadyñ dogrudygyna üns bermeli. Sebäbi bir döwür çaga bolyas, bir döwür ata-ene... Hemme döwürde-de dogry bolany etjek bolmaly. Dogry, yalñyşyas, kän yalñyşyas, onda-da "näme etsem dogry borka" diymeli. Maslahatlaşmaly.

agtyklaryma biri-biri bilen uruşanlarynda "bagyşla" diýmäni öwredýär ejesi.
5 ýaşly gyz agtyk, özünden basdaş kiçi oglanjyga "bagyşla" diýmeli boldy, ejesiniň kontrolynda.
– hany, jigiňe bagyşla diý.
gyzjagaz näräzy tonda:
– bagyşla, haýwan!
:-)
terbiýe-de gyzykly zat.
ýöne eger terbiýede urmagy saýlasaň, ol seniň basyldygyň, çäresizligiň hasaplanýar. bu-da belki aňsat ýol diýýäniňdir.
===
ol terbiýäni tüpeňlemek diýýäni "terbiýä ähmiýet bermeseň, "tüpeňläp oldürseň", geljegiňi "tüpeňläp däl-de top atyp" zaýalaýaň.... manylary bar diýip düşündim.

Kyn-laý, terbiye. Düme yetişdirseñ bolanokmyka :-)

Çylşyrymly. "Şeyle bolsañ çagañ beýle bolya" diylen zatlaram jedelli. Hasap boyunça Serdar agañ aydyp beren wakasyndaky çaga terbiyesiz, hemme kişä kineli, nalajedeyin bolup yetişmeli, emma ol, tüweleme, gül ýaly bolup yetişipdir.

4 5 oglandan eşitdim, "kakam içip bolup yörşüni görüp, araga yigrenç döredi, ulalamsoñ şonyaly bolman. Ya kakam öýüñ bar zadyny müştükden geçirdi..." diyen yaly gürrüñleri (olar kakalaryny gowy görýädiler).
Tersinelerem kän.

Özümizden bilip goyaymasak yzy üzülmez bu temañ.

Reňk saýgarmak hakda erteki

Bir bar eken, bir ýok eken. Bar zatlar-a bar eken, ýok zatlaram ýok eken. Günlerde bir gün iki sany daltonik köpbilmiş sataşypdyr. Olaryň has köpbilmişrägi ýüzüniň ugruna bir gepini oklapdyr:
-Tutuş dünýäň reňki birmeňzeş, ol reňkem gyzyl!
Onuň bu sözi ikinji daltonigiň göwnüne ýaramandyr. Ol:
-O nähili beýle bolýar-aý? Özi mähnet dünýe bolar-da, olammyr ýeke-täk reňkli bolarmy? Dünýede reňk juda kän. Özem ol reňkleriň hemmesi gyzyl!-diýip çürt-kesik aýdypdyr.
Birinji ikinji bilen ylalaşmandyr. Şeýdibem olar tükeniksiz, barlyşyksyz jedele başlapdyrlar.
Birinji daltonik okumyş-a dünýäň ýeke-täk gyzyl reňkdeligi hakynda öz diýenini tekrarlap, eňegine tutup durupdyr.
Ikinjisem dünýäň ummasyz köp reňkdeligi, ýöne olaň hemmesiniňem gyzyl reňkdeligi barada şo tüketmän hetjikläp durupdyr.
Şo pille olaň jedelinem daltonik däl beýlekiler gyzyklanma bilen diňläp durmuşlar.
Wessalam, erteki tamam.

"Düme ýetişdirseň" diýen söz kän zady ýadyma saldy.
Orazly aga diýip bir ýaşuly bardy. Biz özümizi bilipdiris, ol hemişe kalhozda biziň birgadymyzyň ekin meýdanlarynyň garawulydy. Bizem ýa ot ýygmaga barýadyk, ýa bäş-üç sany kel toklyny bakmaga diýip, oň garawulçylyk edýän meýdanlarynyň deňesinde aýlanyp ýörendiris.
Gowy adamdy pahyr.
Kempiri bilen ikisi ömürboýy çagasy bolmansoňam çaga görse durumsyzdy. Käteler ot ýygmaga baranymyzda garawul çatmasynda tüňçe çaý gaýnadyp bererdi. Gülküliden-gülküli gürrüňler tapyp, bizi alaýaz ederdi. Biziň jykyrdymyza-da, özem edil biziň birimiz ýaly "şyg-şyglap" arkan-ýüzin gaýşyp güle-güle şoh bolardy. Oň hamraklygyna, oň mylaýym wäşiligine maýyl bolup, oglanlaň kakadan oňmadyk käsi: "Şuň ýaly kakaň bolaýs-aý!" diýerdiler.
Soňam o bendäň ýany näçe gyzykly, şowhunly bolsa-da, ony şo gamyş-samyşdan çatmasynda ýeke goýup, öýümize gaýdardyk. Öz ejem-kakamyzyň ýanyna. Olam şonda bizi goýberesi gelmänmi nämemi, bende:
-A-how, düme bitenler! Şü dördünji birgadyň ilerki hyýarlygynyň güzaýynda-da mala höreklik suwoty ekilen ýaly gögeripdir-aýt! Erte-de bärik burnuňyzy uzatsaňyz ýalňyşman tapar ýaly ýagşyja salga bererdim özi!-diýip yzymyzdan seslenip galardy.
Iman baýlygyny bersin pahyra!

Gadym rowaýatlaryň täzeçe öwüşgüni diýen ýaly üç sany diňe gyzyl görýän daltonik çagaň gürrüňini diňleýik-mi?
– Dünýe krasnyý!
– Ýo-ooo. Dünýe red!
– Ikilikçiler, dünýe gyzyl-a, göreňizokmy?
Goňşyň çagasam goşulýa diýýä:
– Ne diýorsunuz? Dünýa kyrmyzy!

Wot iz zet? :-)

Rumyñ üzümli hekayasy yaly.

Olar biz - üçimiz öydýän. :-)