18:26 “Seni gözlemedik ýerim galmady...” | |
 Seni gözlemedik ýerim galmady, Maşrykdan agtaryp, Magrypdan çykdym. Hyýalymda elwan ýaglyk galgady, Käkilli gözeliň göwnüni ýykdym. Çagalykdan maňa höwrügen gyzyň Owadan ýüregniň yhlasy bardy. Oň ýanyndan terse öwrülen yzym Sergezdan durmuşa alyp barýardy. At çapdyryp geçdim içinden düzleň, Köse deýin köweklendim, köwlendim. Soňam agraslanyp, sen hakda düzlen Dessanlary bölek-bölek öwrendim. Serim duman içre oýa batyrdym, Ýagty umyt bilen daňy atyrdym. Seniň yşkyň pikirini kän eden Şu kelläm ýarylyp barýar nämeden? Sen – gijeler düýşlerimden idelen, Gündizler güneşden soradym seni. Didaryňy görmese-de didelem, Göwni sowuklardan goradym seni. Sen taýy ýeldirgäp ýüwüren, öwsen Şemalyň yzyna düşüp geldim men. Söýgimiň päkligi – jadyly göwher, Yhlasym boýunça gara ýeldim men. Ýüregim aýamda, kalbym tas aýna, Söze şöhle saçar, döwüler sözden. Meni bir öňýeten jalataý saýma, Maksadym belentdir, matlabym çözlen. Ýakma meni gümmezleriň güjeňläp, Ysgynym ýok huzuryňa barmaga. Sözlem agzasy däl sözleri jemläp, Merdiwan ýasaýyn göge galmaga. Çünki başarmadym men sensiz ýaşap, Natuwanym, nowjuwanym, ezizim. Perileň soltany, düşsene aşak Ýa ýanyňa alyp barsyn keniziň! Ýa kermi sen, ilmez gulagňa zaňlar, Ýa arkaňda howandaryň – döw barmy? Söýgi sözlerine bal gatyp zaňňar, Tarypyňy menden artyk öwýärmi? Sensiz kim bolaýyn, nirä gideýin, Çekseň, süýnüp ýatan sozma dälmi men?! Gargasaň, gataryn gara daş deýin, Soňam pytrap gitjek tozga dälmi men?! © Ilmät GURBANOW | |
|
| |
| Ähli teswirler: 5 | |
|
| |
