06:43 Sözler | |
| SÖZLER Men küle gaçan çöregini myhmana hödürlemekden utanan gelni garasöýmezlikde aýyplan adamy samsyklykda ýazgarýaryn. * * * Süýdüň gaýmagyny dadan pişik, sygryň ot bilen oňňut edýändigine ynanmady... * * * Ner ýüküniň üstüne öz gaňňasynyň atylanyny gören eşek: «Indi-hä, maýrylaýsaň gerek» diýip, hynçgyran bolupdyr. * * * Bilbil bilen bir bagda ýaşaýan garga özüne atylan kesegi bilbili kowmak üçin atylandyr öýtdi. * * * Egri ösen agajy miwesinden tanap bilýän bagbana, aperin. * * * Obadan oljasy oňan şagal gapanyň hininiň agzynda gurulaýmagynyň mümkindigini unutdy. * * * Şiriň agyr ýatanyny eşiden tilki gurduň saglygyny soramaga howlukdy.. * * * Yzçyny aldandyryn öýden tilki, awçynyň üstünden bardy. * * * Biri: «Onuň gür saçy bar» diýdi, göribiň biri bolsa: «Saçy gür däl, kellesi kiçi» diýip güldi. * * * Ak kebelegiň ganatlaryndaky gara tegmili görüp, siňek: «Wah, görgüli, garaljak bolup garalybam bilmändirdä» diýip wyzzyldapdyr. * * * Öz artykmaçlygyňy äşgär etmek üçin köp zat geregem däldir welin, ony gizlemek üçin är gaýraty gerek. * * * Sygyr sygyrlygyny etmese öňüne ot dökeni däl-de, süýdüne suw goşany süserdi. * * * Ol gören ýerine burnuny sokdy. Indem, gül bilen narpyzyň ysyny tapawutlandyryp bilmän ýör. * * * Suwuň astyna ot ýakdylar — gaýnady. Oduň astyna suw guýdular — söndi. * * * * * * Jyzlanyň ömri gysga bolsa-da, ol ýazda ýaşaýandygy üçin ömründen razy bolmaga çemeli. * * * Ejesi uran çaganyň: «Eje» diýip aglamasy durmuşyň iň gowy filosofiýasyny özünde jemleýär. * *.* Leýlisaç dik össe beýle owadan bolmasa-da bolmazdy. Men garynjany basmaga dözemok, ýöne basan däldirin diýip arkaýyn aýdybam biljek däl. © Çary KULYÝEW Filalogiýa ylymlarynyñ kandidaty. | |
|
| |
| Ähli teswirler: 5 | |
|
| |
