17:35 Güýz geçmesin! | |
|
GÜÝZ GEÇMESIN! Tylla saçlaryny çözläp çar ýana, Duýguçyl ýüregi alar lerzana, Neneň gözel görnüş - ýapraklar täne, Çeker göwne kämilligiň keşdesin, Goý, bu güýzler hiç geçmesin, geçmesin! Gül güýzüm, gujagy lälezar güýzüm, Jadyladyň, sende näme bar, güýzüm? Ömür kitabynyň sahabyn düýrüp, Bagt serpaýly günler basym ötmesin, Goý, bu güýzler hiç geçmesin, geçmesin! Ýassanyp ýapragyn döken baglara, Sergezdan ýellere keýpim çaglaýa, Men ýaňadan aşyk bolup barlyga, Hanha, bulut typyp, seçdi pişmesin, Goý, bu güýzler hiç geçmesin, geçmesin! Dat edipdir dargynjyran duýgular, Ýagmyrynda ýagty oýlar durlanar, Gül mekany öwzar saýan durnalar, Toýnak gurap, alyslara göçmesin, Goý, bu güýzler hiç geçmesin, geçmesin! Hyjuwlanyp, howalanyp howundan, Owurtlapdyr aklym ylham suwundan, Dideden daşlaşmaz, kalpdan kowulmaz, Göwne uçgun syçraýşyna teşne men, Goý, bu güýzler hiç geçmesin, geçmesin! Dile gelip bilmän gursakdan ugran, Sözlenmedik sözler şemal deý şuwlar, Kalbymyň gaý-tupanynda arzuwlar, Ýaprak kimin galgap, ýere gaçmasyn, Goý, bu güýzler hiç geçmesin, geçmesin! Gögele göwnümiň galmaz armany, Güýz bolup keşt etsem datly dünýäni, Zemin zybalygy, arşyň permany, Tebigata berlen taýsyz peşgeşdir, Goý, bu güýzler hiç geçmesin, geçmesin! Sözlerden ymarat guran ýazarym, Basan topragyňa gurban nazarym, Güýzüň hak aşygy Gurbannazaryň, Damjalarda owazyny eşdersiň, "Goý, bu güýzler hiç geçmesin, geçmesin " © Mahym NURGELDIÝEWA | |
|
| |
| Всего комментариев: 3 | |
|
| |
