00:41 Bahar hem ýaşlyk | |
 BAHAR HEM ÝAŞLYK Ýaz bihesret goýarly däl bu ýylam, Artýar geň-enaýy hyýal gurmalar. Baglar bilen deň gülleýär duýgulam, Gelip, ýüregimde gonýar durnalar. Elewredip barýar ylham daşgyny, Galamym pyntyklap, açyp dur gunça. Ýok, siz ömre bagly etmäň ýaşlygy! Ýaşlyk ýaşaýandyr ýaşadygyňça! Ýaşaýar ýüregi mährine çoýup, Ýaşaýar jennete öwrüp jahany. Ah, sen neneň gözel, neneň ajaýyp, Kükräp gelen 33-iň bahary. Bu baharda ýaşlygym bar özüm deý, Men ony meňzedip bilmedim başga. Gursagynda ataşy bar közüm deý, Teý sabyrsyz durmaga ýa garaşma. Honha, syryp barýar ýollaň gyrasyn, Men durnaly kalbym göterip barýan. Nämüçindir gelenok hiç dymasym, Gygyrasym gelýär: – Ýok mende arman! Armanym ýok, Gezmedim hiç söýmän men, Öýke-kinä duzak salýanym üçin. Edil häzir ýagyş ezen öýmämden Ejemiň ysyny alýanym üçin. Bu ys meni biraz läliksiredýär, Hansyradýar sämän başa girenden. Ýalanym ýok, diýmäň «näziklik edýär», Gözlerim ýumulsa, şu ys direlder! Bahar meni direlder! © Gurbanjemal ANNAKOWA | |
|
| |
| Всего комментариев: 4 | |
|
| |
