06:54 Bakyýet | |
 BAKYÝET Men müñ ýyl ýaşadym. Ýok. Ondanam kän! Diñläp gezdim Eflatunyñ söhbetin Akyldaryñ özi heniz dirikä. Beýik-beýik uruşlaryñ bir çeti Maña degip, saldy tenime ýara. Eý, sen, Parfiýanyñ gyzgyn sährasy, Ýadyñdamy, gara başy goýara Ýer peýlänim, bir daş ülkäniñ şasy Üstümizi gapyl basan halaty? Indi ýadym kütelişýär, kimdir ol Şonda köñlümize baglan ganaty? Hernä kyn pursatda galmandyk osal! Kesip geçse Arabystan çölüni, Menden nyşan tapar ýürekden idän. Muhammet pygamber aljyran güni Mekgeden ugrapdym menem Medinä. Maru-şah-u jahan ah-u-jahana Öwrülende ýandy köñlümiñ peri. Hiç goýmandy ýaşamaga bahana Çingiz hanyñ gana suwsan leşgeri. Ýöne güle dönüp, galdym men külden. Aý, ýyldyzlar tutmadylar ýasymy, Bakylygyñ keşbin saklap köñülde, Durmuşa sarp etdim bar yhlasymy… Göz öñüm müñlerçe wakadan doly, Men kän ýyl ýaşadym, ölerin indem Her gün agşam Günüñ öçüşi ýaly Görnüşe aldanýan göreçlerimde. © Orazgylyç ÇARYÝEW | |
|
| |
| Всего комментариев: 3 | |
|
| |
