23:40 "Golliwudyñ" gözeli Elizabet Teýlor | |
 "GOLLIWUDYŇ" GÖZELI ELIZABET TEÝLOR Elizabet ilkinji gezek 1942-nji ýylda, on ýaşyndaka «Her minutda bir adam dogulýar» atly filmde surata düşýär. Şondan iki ýyl geçensoň, ol «Milli mahmal» atly filmdäki keşbi bilen tomaşaçylaryň söýgüsini gazanýar. 1949-njy ýylda oňa «Dildüwşük» atly filmde uly keşp ynanýarlar. Tomaşaçylar birbada Elizabetiň aktýorlyk ukybyna kembaha garapdyrlar. Ýöne 1951-nji ýylda Montgomeri Klift bilen surata düşen «Güneşiň astyndaky orun» atly filmdäki keşbi bilen ol tomaşaçylaryň pikirini düýbünden üýtgedýär. Bu film üçin «Oskar» almasa-da, Elizabetiň bu baýraga ýetmegi üçin kän wagtyň galmandygyny, hatda iň bir şübheçil kino bilermenleri-de boýun alýarlar. Şondan soňky surata düşen «Ägirt», «Gyzgyn üçekdäki pişik», «Geçen tomus, duýdansyz» ýaly filmlerde döreden keşpleri arkaly ol tomaşaçylaryň söýgüsini ymykly gazanýar. «Geçen tomus, duýdansyz» filmindäki keşbi üçin «Oskara-da» hödürlenýär. Ol ilkinji «Oskaryny» «Batterfild, 8» filmindäki keşbi üçin 1960-njy ýylda alýar. Soň-soň Elizabet Teýloryň: «Men özümiň meşhur bolmadyk wagtymy ýada salyp bi- lemok» diýmegi ýöne ýerden däl. Sebäbi ol tä ömrüniň ahyryna çenli žurnalistleriň, kino we teatr bilermenleriniň, tomaşaçylaryň üns merkezinde bolýar. Özüniň iň bir meşhur keşpleriniň birini döreden «Kleopatra» atly filmde surata düşmäge Elizabet birbada razylyk bermändir. Hatda filmi döredijiler Kleopatranyň keşbine başga aktrisany çagyrmakçy hem bolýarlar. Ýöne Elizabet ahyrky pursatda pikirini üýtgedýär. Şeýlelikde, ol bu filmdäki keşbi üçin arzyly «Oskaryna» eýe bolýar. Film dört sany «Oskar» alýar. Elizabet Teýloryň surata düşen iň soňky filmi 2001-nji ýylda ekranlara çykan «Amerikaly garry ýabylar» atly lentadyr. Ömrüniň soňky on ýylynda surata düşmese-de, kino bolan söýgüsi ony bir pursatlygam terk etmeýär. Gözelligi bilen onlarça ýyllaryň dowamynda kino älemine şugla saçan Elizabet Teýlor 2011-nji ýylyň 23-nji martynda Los-Anželesde dünýäden ötýär. Taýýarlan: © Selbi INERGELDIÝEWA, Türkmen döwlet medeniýet institutynyň talyby. "Edebiýat we sungat" gazeti 24.02.2023 | |
|
| |
| Всего комментариев: 5 | |
|
| |
