22:31 Ertekiler 1 | |
 TYGŞYTLYLYK Daýhan bilen garynja tygşytlylyk barada jedel edipdirler. Garynja özüniň ýekeje bugdaý dänesi bilen bir ýyllap oňňut edip biljekdigini aýdypdyr. Muny barlap görmegi karar edipdirler. Daýhan garynjany bir kiçijik küýzä salypdyr, ol ýere bir bir bugdaý dänesini hem goýupdyr-da, küýzejigiň agzyny berk dykypdyr. Bir ýyl geçipdir, daýhan garynjany ýadyndan çykarypdyr. Ýene bir ýyl geçenden soň tötänden garynja onuň ýadyna düşäýipdir. Küýzäni tapyp, dykysyny açyp görse, hälki garynja onuň erňegine ýarmaşyp, sag-aman çykyp gelýärmiş. ‒ Bäh, sen henizem dirim-aý, garynja? Bir däne bilen bir ýyl ýaşajagyň barada jedel edipdik, sen bolsa iki ýyllap ýaşapsyň! – diýip, daýhan geň galypdyr. ‒ Men ätiýaçlyk üçin şol dänäni hem ikä böldüm. Bir bölegini birinji ýyl iýdim, beýlekisini ikinji ýyl iýdim ‒ diýip, garynja düşündiripdir. Kiçijik garynjanyň beýle ätiýaçlylygyna we tygşytlylygyna daýhan telpek goýupdyr. ARZYLY MAKSAT Bahar möwsümi gelse-de, howa sowukdy. Çapgyn çygly şemal agaçlaryň ýalaňaç pudaklaryny daraýardy. Ülje agajynyň üstünde oturan bir süri serçeler daragtyň sütünine dyrmaşyp gelýän ulitkany gördüler. Ol ýaňy ýerden bir garyş ýokary çykypdy. Näçe gybyrdasa-da, her gün bir barmak boýy ýol hem öndürmeýän bu janaweriň asla ýöreýändigi hem bildirenokdy, bir duran ýerinde duran ýalydy. Gaýly howada ýeleklerini hüžžerdip, keýpsiz oturan bikär serçeler ulitkanyň üstünden gülüp hezil etmek üçin onuň töweregine ýygnandylar. ‒ Nirä barýaň, ýolagçy? ‒ diýip, olaryň biri sorady. ‒ Agajyň başyna ‒ diýip, ulitka ýüzüni galdyrman, ýokary dyzap durşuna jogap berdi. Serçeler ganatlary bilen içlerini tutup, ala wakyrda berdiler. ‒ Näme üçin? ‒ diýip, serçeleriň biri gyzyklandy. ‒ Ülje iýmäge ‒ diýip, öz arzyly maksadyna tarap erjellik bilen deprenýän ulitka jogap berdi. Serçeler jykyr-jykyr gülüp, kese ýykyldylar. Olaryň biri gülküden gözüni ýaşardyp habar berdi: ‒ Ol ýerde ülje ýog-a, körpeje... ‒ Häzir ýokdur ‒ diýip, olary piňine-de alman, öz ýoluna ýörmeleýän ulitka giňlik bilen jogap berdi ‒ Men baranymda bolar. Bu aýgytly we dogumly jogaby eşiden serçeleriň gülküleri sem boldy. ENE SESI Injir agajynyň şahasynda höwürtge tutan bir ene guş ol ýerde ýumurtga basmaga taýýarlanýardy. Ýumurtgalar taýyndy, jüýje çykýança höwürtgede oturmak üçin ýeterlik iýmit hem jemlänipdi. Bagzarlygyň beýleki çetindäki zeýtun agajynda onuň jorasy höwürtge tutunyp ýaşaýardy. Ol ene guş hem häzir ýumurtga basmaga taýýarlanýardy. Ýumurtga basylýan döwürde iki ene guşa biri-birini görmek ýokdy. Şonuň üçinem injirdäki guş ilki zeýtundaky jorasy bilen görşüp, hoşlaşyp gaýtmagy ýüregine düwdi. Ol baryp görse zeýtundaky jorasy höwürtgesinde ýokdy. Ol iýmit taýýarlygyny entek tamamlaman, şonuň ugrunda pelasaň urup ýördi. “Oňa derek munuň ýumurtgasy meniňkiden has kän eken – diýip, injirde ýaşaýan guş pikir etdi ‒ Meniň ýumurtgam kemräk ýaly.” Şeýdibem, ol jorasynyň ýoklugyndan peýdalanyp, onuň bir ýumurtgasyny ogurlap gaýtdy. Getirip, özüniňkilere goşdy. Günler geçip, guşlaryň höwürtgesinde gyzyletene jüýjeler peýda boldy. Mydama agyzlaryny giňden açyp, iýmit soraýan işdämen balalaryny naharlamak bilen başagaý ene guşlaryň biri-biriniňkä görme-görüşe gelmäge hem wagtlary ýokdy. Olar diňe käte ýolda-yzda duşup söhbet edýärdiler. Basym jüýjeler ese-boýa galyp, ganatlary bekedi. Olar höwürtgeden çykyp, agajyň üstünde perwaz urmagy öwrendiler. Bir gün zeýtun agajynda ýaşaýan ene guş çagalaryna şeýle diýdi: ‒ Indi siz bagzarlygyň üstünde uçup, bir sapar öwrüm edip geliň! Aňry çetdäki injiriň üstünde meniň bir joram bardyr, şoňa salam berip gaýdyň. Onuň çagalary begenişip, uçup gitdiler. Injir agajynyň üstünden geçenlerinde, asmanda pel-pelläp, ol ýerdäki ene guşa we çagalaryna salam berdiler. Soň olaryň barysy toplumyny bozman, şatlyk bilen öz höwürtgelerine gaýdyp geldiler. Olaryň salamyna gykuwlap jogap beren injirdäki ene guş öz çagalaryna şeýle diýdi: ‒ Balalarym, indi sizem şolaryňky ýaly aýlaw edip geliň! Zeýtunyň üstünden geçeniňizde ol ýerdäki daýzaňyza salam bermegi unutmaň. Olar şeýle hem etdiler. Emma biraz wagtdan höwürtgelerine bagtyýar dolanyp gelen çaga guşlaryň içinde biri kemdi. Ol zeýtundaky ene guşuň sesini eşiden badyna doganlaryndan saýlanyp, aşak inipdi. Zeýtundaky höwürtgä girip, ol ýerdäki maşgala goşulypdy. Howa, ol şol ogurlanan ýumurtgadan çykan jüýjedi. Hakyky enesiniň sesini ýeke gezek eşidende, oňa bar zady unutdyran, ony öz ezizleriniň arasyna dartyp alan hem şol mähriban sesdäki jadyly güýçdi. | |
|
| |
| Ähli teswirler: 13 | |
0
0
0
0
| |
