Neressäň ruhuna Alla rahmet etsin.

Adam ölýär,
Şeýdip ýapylýar perde.
Ölen däl,
diriler galýarlar derde.
Ýöne ölen adam
ölerine çen
Tanyşýar dünýäniň geçmişi bilen.
Gije-gündiz kitaplara bolup ýar,
Geçmiş bilen-taryh bilen ýaşaýar
Gomer bilen ýaşaýar,
Baýron bilen ýaşaýar,
Pyragy, Lenin bilen —
Bary bilen ýaşaýar!
Bulam az deý ol oturýar oýlanyp,
Soňra gelejege çykýar aýlanyp.
Ençe ýyldyzlaryň dünýesin açýar,
Soň ol ýyldyz bolup, süýnýär-de geçýär.
Adam ölýär,
Şeýdip ýapylýar perde.
Adam az ýaşaýar
Kän ýaşan Ýerde.

Gurbannazar Ezizow

Asmanyň manysyn, dünýäniň syryn
Durnalaryň setirinde okaýan.
Ýetmiş ýyllap aýra düşen mysaly,
Çygly ota kükregimi oýkaýan.

Bag astynda göge garap ýatyryn,
Düşek edip ýaş maýsaly topragy.
Barmaga gök ýuwa sarap ýatyryn
Men — dünýäniň daragtynyň ýapragy.

Unudýan özümi. Unudýan bada.
Ýaşyl tebigata siňýän-de gidýän.
Baky tebigatda,
Baky dünýäde,
Özümi gül, toprak, maýsadyr öýdýän.

Juda ir höwrükdim ýaşyl baglara,
Sähranyň üstünden öwsen şat ýele.
Şoň üçinem gussa batan çaglarym
Keselmi bejerýän tebigat bile.

Garylýan dünýäniň baky sazyna,
Deňiz bolup güwwüldeýän, güňleýän.
Goşulyp baldaklaň ýaş owazyna
Hiç wagt kesellämok,
Hiç wagt ölmeýän.

Adam ölüm diýip tapypdyr bir zat,
Ölüm näme?
Tebigata garylmak,
Bahara gül bolup getirmek şöhrat
Daň-säherler pyntyk bolup ýarylmak.

Dostlar näme,
Giden günüň atlarlar,
Birnäçe gün seni ýatlar-köýerler.
Çyn ýürekden köňüllerin daglarlar
Soňra?
Soňra aglamasyn goýarlar.

Ýöne ýyllar geçip, üýşüp deň-duşlar
Gök otuň üstünden basanda gadam
Otlar olaň aýagyna çyrmaşar,
«Saklan! — diýýän ýaly — mähriban adam.

Keýpiňiz neneňsi? Barmydyr bir tap?
Gezip ýörmüsiňiz başlarynyz jem?!»
Emma şol otlaryň ýüzüne garap,
Mendigimi bilmez olaň birisem...

Gurbannazar Ezizow

Gullyga gitmänka okapdym şu çagañ beýleki goşgularyny, bu sonetini öñ okamandym.
Sözde keramat bar diýilýänniñ bir subutnamasy hem Eziz jigimiziñ goşgulary bolup biler, öñ okamda-da Arşy ahwalda ýazýan ýaly duýulypdy sözleri. Ýalñyşmasam 2019 dadyr belläpdimem bir goşgusyna kitapçyda.

Eziziñ poýeziýasy boydan baş onuñ özi öz ykbalyny ýazan ýaly, USSAT bolmasa, bu setirleriñ bir ylahy hikmeti bolmasa beyle ýaşajyk çagañ serine geljek pikirler, sözler däl ýaly.
Gaty gynandym okap, baran ýeri berilsin, uçmalykdyr, ruhy ynjamasyn! Gaty gynandym..

Yzy ýarasyn, Jennet jaýyny bersin.

Eziz. Bary ýogy 24 ýaşapdyr.
Kä adama öleni üçin gynanarsyň.
Men bolsa bir çyn şahyryň ölenine gynandym.
Ölenine-de diýesim gelenok.
Allahym oňa onuň ynanan Jennetini görkez.
Oňa merhemet et. Yzyndakylara sabyr ber.
---
ýazýan zatlary 24 ýaşlyňkydan has kämil eken.
ýüregime gussa çökdi.
---
Häzir mazaryma damyp dur ýagyş,
Içinde men, a men nädip ölmedim!

Mazarymdan yşgym çykar bugaryp,

Möhürim ýok aýagyzymdan başga.

Gözýaşymy gögüň gözýaşy gizlär,

Uçmah gözläp uçmak ýalňyş däl, belki,
Oňa ýerde duşmak bagtyň çürbaşy.
Ýagtylmaga ýanmak gerekdir ilki,
Çünki ataş yşgyň ýalňyz syrdaşy.

Arşyň gözýaşyndan döreýär gülzar,

Aglap-diňýän, ýöne derdim diňmeýär.

Ölüm üçin ajap taýýarlyk ömür,
Pany bilen bakylygyň serhedi.

Ýürek aglamasa titredip arşy,
Yşkyň syrly manysyny gaçyrar.

Ömür ölmek üçin ýeser bahana,
Ölüm merde serpaý, ejize jeza.
Men gelmedim ýaşamaga jahana,
Hem ýaşanym üçin çekmedim yza.

Ähli günälermi ötüň, dilegim,
Saklamaga derek ajal bilegin.

Kalpda ynam barka, Hakda adalat,
Hukuk barmy öýkeläre Hudaýdan?!

Gözlerime arşyň şol garap durşy,
Deşiň mazarymy, synlaýyn arşy.

Ýaşamaklyk üçin ölmeklik gerek,

Ölmeý diýseň, yşky keman-ok ide,
Yzasy ýeg lezzet içre geçenden.

Arşa çyksaň galpdan gaçyp, hak ideý,
Biz tarapdan salam diýgil sataşsaň!

Ýa galamym döwüň, ömür süreýin,
Ýa boýnumy sogruň, ýa-da ýüregim.

---
Mümkin bolsa Eziziň başga goşgularynam okatsaňyz.
Gynandym.
Bir rahatlan ýerim onuň ahyret düşünjeleriniň saglamdygy. "Ýaşamaklyk üçin ölmeklik gerek" diýen Eziziň hakyky dünýesi abat bolsun.

Geň-taň göremok, ýöne neressäň tutuş goşgusy ajal, mazar, gör, ölüm we ş.m. bilen dolup dur.

bu gün ýagyş, emma daşaryň aldajy sowukdygy bildirýär.
gecen ýylam 16 fewral eken şu soneti okanymda. şol günem gar ýagyp durdy daşarda, şu wagtam okap penjireden seredip otyryn welin, göýä şu sonetiň gamgyn ruhy elewreýän ýaly daşarda...
Ruhy şat bolsun!

Düýn ýyl sadakasyny berdiler. Kabul bolsun.

Kabul bolsun, fewralyň başyna ýadyma düşdi Eziz jigimiz, goşgularyny baş sahypada goýupdym, düýnem goýaýyn diýibem unutdym soň. ruhy ynjamasyn

Alla bagyşlasyn!

Gozgady.

Öň adyny kän eşitýärdim, ýöne okamandym.
Indi okadym ...we eşitdim.

Ýatan ýeri ýagty bolsun. Gömülip galmaly şahyr-a däl eken. Hemişe ýatlap duralyñ

Erbet dowamly kesel ýüze çykanda. Rak ýa-da sirroz we başgalar. Şeýle ýagdaýda käbir hassalar 3-4 ýyl ýaşaýar (o-da nä ýaşamak) Özüm şolary köp görem soň aýtýan. Köpsi keseleniň erbetdigini bilenok. Kä biri öljegini öňünden bilýär. Öljegiňi bilmek nähili elhençlik. Diýjek bolanym bu neresse jigimiz şeýle goşgulary öljegini öňünden bilip ýazan bolmaly.

Allah rahmat etsin.