10:42 El telefony / degişme äheňinde | |
| EL TELEFONY Ählisini bulaşdyran şu el telefony boldy. Hiç kimden gaçyp gutuljak gümanyň ýok. Ynanmasaň, öçürip bir gör, baý, gopgun turar-a! Aljyrap: «Pulum tükenipdir, bergä gidipdirin» diýersiň. Emma bu jogabam seni halas edip bilmez. Hemmelerem saglygyňy sorap ýa aladaňy edip jaň edenok, möhümi bolsa, sen gerek. Ýadadym, gaty ýadadym. Telefony oýlap tapana igenen gezegimem az däl. «Onsoň el telefonsyz gezäýsem nähili bolarka?» diýen täsin pikir kelläme geldi. Bu pikirden hoş bolup, gaýybana hemmelere pitjiň atdym: «Hehe-he, asyl, tapmanjyk geçersiňiz meni». Gelen netijämi habar berdim: «Men köneçil adam, telefony, tehnologiýany halamaýaryn, hatda ret etmeklige hem taýýar. Men erkin adam» diýdim. Hiç kim ynanmady, meniň bolsa çynymdy. Telefonymy sandygyň düýbüne atdym. Göwnüm giňedi. Görsene, bu hezilligi. Bar zat şol azat durmuşymyň ilkinji gününiň agşamsy başlandy. — Eli öçük berýär, jany berin sagmy? — diýip, öýüň beýleki agzalaryna jaň yzyna jaň gelýärdi. — Sag ol. Özi: «Telefon göterjek däl» diýýär. — Kellesi bir ýerindemi, üýtgäpedip ýören däldir-ä? — Ýok, jany sag, kellesem ýerinde. Şu gün dükana gidip çöreg-ä getirdi. — Be-e, onda-da lukmana görkezmeli ekeniňiz. Heýem, bu zamanda telefonsyz gezip bormy? Tizara bu gürrüň uzaklara-da ýetdi: «Eşitdiňmi, pylany telefon göterjek däl diýýärmiş. Akyly üýtgäýdimikä görgüliň. Wah, öňem birhiliräkdi-dä şol», «Goşgy dagam ýazaýýardymy?». — Telefony döwüldimi ýa-da? — Ýok, telefon-a gurat. — Be-e. Bu-la birhili. Görsem, gürrüň çyna ýazyp barýar. Şol gije öýe gelenlerem boldy. — Sag-aman otyrmyň? Alada etdik, eliň öçük berýär. — Aý, men-ä telefon ulanjak däl, hem puluňy iýýär, hem peýdasy ýok şunuň. — Janyň bir sagmy? — Sag-how, sag. — Bolýa-la. Emma, näme üçindir, ýüzüme şübheli garaýardylar hem-de ogrynça öýdäkilere maňa göz-gulak bolmaklaryny maslahat berýärdiler. Biriniň dagy ogrynça sag eliniň süýem barmagyny çekgesine eltip towlap, çalaja sygyranyny hem gördüm. Oturyp, işiň çyna ýazyp barýandygyndan hopugdym. Birdenkä meni akyly üýtgän saýsalar näme?! Başga alaç ýok. Sandykdan pitjiň atyp taşlan el telefonymy tapyp aldym. Telefon bolsa: «Ýeri, nähili, kim utdy?» diýip, ýyrşarýan ýalydy. Indi bu täzelikden gutulma ýok. Wah, birwagt, geçen asyryň togsanynjy ýyllarynda nähili hezil ekeni. Köçede peýjer göterýän birlän-ikilän adam görenimizde, haýran galypdyk. Indi oýlanyp otursaň, ähli zat şondan soň başlanypdyr. — Sen nirede, näme işläp ýörsüň? — Alýo, sen işdemi? Ýa öýdemi? Ýa başga ýerdemi? — Alýo, alýo, bu näme, sesiň gowy eşidilenok, nirede ygyp ýörsüň? — Näme üçin jaň alaňok. — Alýo! Hemra HUDAÝGULYÝEW "Nesil" gazeti, 07.02.2023 | |
|
| |
| Ähli teswirler: 1 | |
|
| |
