09:55 «Pyragy» sanly giňişlikde | |
"PYRAGY" SANLY GIŇIŞLIKDE  Durmuş täzelenişi talap edýär. Adam, tebigat, umuman-a tutuş barlyk pursatsaýyn täzelenmek, özgermek, kämileşmek bilen. Kakamyrat Rejebowyň: «Žurnalistiň işi her dogan Gün bilen täzeden başlanýar» diýşi ýaly, dizaýneriň işi hem her bir täze taslama arkaly täzeden başlanýan, täze derejä göterilýän eken. Men muňa «Belli Creative» studiýasynyň hünärmeni Döwletmyrat Babaýew bilen bolan söhbetdeşligimde ýene bir ýola göz ýetirdim. Biziň söhbetimiz «Belli Creative» tarapyndan täze döredilen «Pyragy» şrifti barada boldy. Häzirki wagtda tutuş ýurdumyzda 2024-nji ýylda uludan belleniljek Magtymguly Pyragynyň doglan gününiň 300 ýyllygyna ýokary derejede taýýarlyk görülýär. Biziň hem täze ýazuw şekili döretmekden maksadymyz, indiki ýyl bellenilip geçiljek beýik şahyrymyz Magtymguly Pyragynyň 300 ýyllygyna kiçijek sowgat taýýarlamak bolup durýar. Biz bu täze taslamanyň üsti bilen, Magtymguly Pyragynyň adyny sanly giňişlikde hem has giňden tanatmak isledik” — Döwlet, ilki bilen, täze taslamaňyzyň döreýiş taryhy bilen gysgaça tanyş edäýseňiz! — Täze döreden «Pyragy» şriftimiz biziň bu ugurdaky üçünji işimiz. Mundan ozal, «Aşgabat2017», «Garagum» taýp feýslerini işläp taýýarlapdyk. Aslynda, şeýle taslamalary biz maddy girdeji üçin däl-de, özümiziň dizaýner hökmündäki döredilijikli çemeleşmek başarnygymyzy ösdürmek, galyberse-de, türkmen dizaýnerleri tarapyndan hem täze şriftleriň taýýarlanylýandygyny dünýä ýurtlaryna ýaýmak üçin durmuşa geçirýäris. Başgaça aýtsam, bu işimiziň daşyndan alyp barýan pişämiz diýsegem bolar. Ýöne bu pişe studiýamyzyň diňe bir agzasy üçin däl, eýsem, tutuş döredijilik toparymyzyň umumy pişesi bolup durýar. Häzirki wagtda tutuş ýurdumyzda 2024-nji ýylda uludan belleniljek Magtymguly Pyragynyň doglan gününiň 300 ýyllygyna ýokary derejede taýýarlyk görülýär. Biziň hem täze ýazuw şekili döretmekden maksadymyz, indiki ýyl bellenilip geçiljek beýik şahyrymyz Magtymguly Pyragynyň 300 ýyllygyna kiçijek sowgat taýýarlamak bolup durýar. Biz bu täze taslamanyň üsti bilen, Magtymguly Pyragynyň adyny sanly giňişlikde hem has giňden tanatmak isledik. — Maksadyňyz myrat tapsyn, Döwlet! Diýmek, şol maksat bilen täze taslamany «Pyragy» diýip atlandyrypsyňyzda?! — Hawa, birinjiden, ony Magtymguly Pyragynyň 300 ýyllygynyň şanyna «Pyragy» diýip atlandyrdyk. Ikinjiden bolsa, «Pyragy» hem edil «Garagum» ýaly displeý görnüşli şrift (ýazuw şekili) bolup durýar. Ýagny, ony adaty ýazgylarda däl-de, sözbaşylarda we beýleki aýratyn ýazgylarda ulanyp bolar. Ýöne «Garagumdan» tapawutly tarapy, bu şrift häsiýeti boýunça çeper manyly ýazgylara niýetlenilen. Sebäbi ony işläp taýýarlanymyzda harplaryň ýasalyşynda, olaryň biri-biri bilen sazlaşygynda nepis görünmegine aýratyn üns berdik. Şonuň üçin hem ony edebiýat, kino, saz, sungat bilen bagly ýazgylaryň sözbaşylarynda, teatrlaryň afişalarynda, ugurdaş mahabatlarda ulanmak has ýerlikli bolar. Ýazuw şekiliniň ýasalyşynyň edebiýata we sungata ýakyn bolmagy, oňa «Pyragy» diýip at bermegimiziň ikinji sebäbidir. — Bu taslamany taýýarlamak üçin size näçe wagt gerek boldy? — Bu taslamany taýýarlamak üçin studiýamyzyň döredijilik topary 3 aý çemesi wagt sarp etdi. Täze şrift döretmek daşyndan göräýmäge ýönekeý iş ýaly görünýän hem bolsa, onuň edil beýleki taslamalar ýaly inçe taraplary-da, jogapkärçiligi hem özüne ýetik. Täze şrifti döretmek üçin ilki her bir harpyň, sanyň, dyngy belgileriniň üstünde aýratyn işlemeli, soňra bolsa ondaky bar elementleriň biri-biriniň yzyndan gelen ýagdaýyndaky sazlaşygyny üpjün etmeli. Şonuň üçin-de, islendik täze şrifti taýýarlamak üçin azyndan 2 aý wagt sarp etmeli bolýar. «Pyragy» şriftini has hem inçelik bilen sünnäländigimiz üçin, onuň üstünde beýleki ugurdaş adaty taslamalara garanyňda, biraz köpräk wagt işledik. — Döwlet, «Pyragy» şriftini gurnamak üçin ony nireden ýükläp alyp bolýandygyny hem okyjylara ýetiräýeli! — Biziň täze döreden «Pyragy» şriftimiz golaýda myfonts.com platformasynda ýerleşdirildi. Islendik ulanyjy ony şol salgynyň üsti bilen ýükläp alyp, öz kompýuterine gurnap, ulanyp biler. «Pyragy» şriftini bu platforma arkaly 9 amerikan dollary möçberinde töleg geçirip, ýükläp almak mümkin. Ýeri gelende bellesek, täze şrift dörediji tarapyndan bu platforma ugradylanyndan soňra, ol degişli hünärmenler tarapyndan doly gözden geçirilýär. Eger-de şriftde ozal bar bolan şriftlere meňzeşlik we beýleki düzgün bozujy elementler ýok bolsa ol saýtda ýerleşdirilýär. Diýjek bolýanym «Pyragy» şriftiniň bu saýtda ýerleşdirilmegi, onuň sanly giňişlikdäki özboluşly ykrar edilmegi diýsegem bolar. Şu ýerde gysgaça maglumat bersem, myfonts.com platformasy iň köp şrift fontlaryny özünde jemleýän saýtlaryň biri bolup, onda häzirki wagtda 230 müňden gowrak şrift fontlary ýerleşdirilendir. Biziň üçin guwandyryjy tarapy, mundan ozalky taýýarlan «Garagum» şriftimiz bu platformada ýerleşdirilen türkmen dizaýnerleri tarapyndan döredilen ilkinji şrift bolupdy. — Döwlet, şeýle taslamalaryňyz türkmen metbugaty üçin hem oňat täzelik hasaplanýar. Geljekde hem şeýle taslamalary dowam etdirmek meýliňiz barmy?! — Elbetde. Bu taslamalar bize özümiziň döredijilik ukybymyzy ösdürmek üçin hem zerur bolup durýar. Şeýle-de, türkmen elipbiýiniň harplary bilen owadan sazlaşýan täze şriftleri döretmek biziň esasy maksatlarymyzyň biridir. Özümiziň zähmetimiz arkaly türkmen metbugatyndaky makalalaryň, goşgularyň, ýazyjy-şahyrlaryň kitaplarynyň owadanlygyna ujypsyzja hem bolsa goşant goşup bilsek, bu bizi diýseň begendirýär. Şonuň üçin hem, Arkadagly Serdarymyzyň döredijilikli zähmet çekmäge döredip berýän mümkinçiliklerinden netijeli peýdalanyp, geljekde hem milliligimizi dünýä ýaýýan şeýle taslamalarymyzy dowam etdireris! — Biz hem şol taslamalara sabyrsyzlyk bilen garaşýarys! Beren gürrüňleriňiz üçin köp sag boluň! — Sag boluň! Söhbetdeş bolan: Mätgurban MÄTGURBANOW, Türkmenistanyň Daşary işler ministrliginiň Halkara gatnaşyklary institutynyň halkara žurnalistikasy fakultetiniň 2-nj ýyl talyby, «Biznes reklama». Çeşmesi: https://www.br.com.tm/sections/8/3707. 15.02.2023ý. | |
|
| |
| Ähli teswirler: 6 | |
|
| |
