13:12 Söýgi (ýa-da däliniň samramalary) | |
SÖÝGI (ÝA-DA DÄLINIŇ SAMRAMALARY)  I Söýgüsini ýatlap ýyglar setirler Agşamlar asmanda Aý dogan çagy, Hak aşyklar arzuwyna ýeterler Bolsa-da arada aýralyk dagy. Menem yşk odunyň datdym epgegin, Oňam meni söýerini isledim. Arzuwlardan doly arzuw depderim Ýüregimde päk duýgular besledim. Ýalňyz gijelerde darykma, öý giň, Inçeden aç galyň kitaplaň gatyn. ...Nirede sen meniň ilkinji söýgim Juwan ýüregimde goja hasratym?! Gussa gaplap aldy töwerek-daşym, Sen bir merdemräk bol buýsançly başym. II Sen bir merdemräk bol, buýsançly başym! Büdreme menzili ýarpylanyňda. Goý, tozana batsyn mahmal lybasym Ullakan arzuwlar bar planymda. Seret, başyn egip gojaman söwüt Saklaýar ruhunda ysyn baharyň. Sowuk gyş geçipdir çybygyn döwüp, Ýuwdup otyr ol şonda-da gaharyn. Öwüt gerek diýdiň, al saňa öwüt: Köňüllere söwüt bolmak ýaraşýar. Seret, başyn egip paýhasly söwüt Öz söýgüli baharyna garaşýar. Gül ömrüni ýola bakyp ötirler, Kömür deý gijeler, süýt deý ertirler. III Kömür deý gijeler, süýt deý ertirler Pynhan ýalnyň uçgunynda ýanarlar Hamyrmaýaň düýşüň görse petirler Dutar tary kimin iňlär damarlar. Ýollar uzap gidip otyr bakyýa, Gözýetimler gözün gyrpýar şadyýan. Bu ýalançy durşy bilen kapyýa, Beýle bolsa, hany meniň kapyýam?! Aşygy bolmadym kümüşiň-tyllaň, Bir gün çydap bilmän okadym nälet: Eý, meni ýoklukdan bar eden Allam! Sen meni şol gyzy söýmedik ýaly et! Arzuwlar kenarna ýetsemdim basym, Gussa gaplap aldy töwerek-daşym. IV Gussa gaplap aldy töwerek-daşym, Syýamyň reňki-de şeýle öçügsi. Maňlaýymdan düşen ilkinji saçym Nirelerde ýörsüň, halyň niçiksi?! Çümdüň haýsy hyýallaryň çuňlugna, Kyn günlerde haýsy ýoldan ýörediň, Göreçlermiň tütäp duran doňlugna Haýpyň gelip, awadymy ýüregiň?! Seret, çar-tarapam batypdyr gama, Sorup jigerine güýz howasyny. Ýüregime ýamap täze bir ýama Içýän tebigatyň sap owazyny. Asyrlara dönse her bir sagady, Her kimiň bar başyn egýän halaty. V Her kimiň bar başyn egýän halaty, Näçeler diýsem-de başym dik, merdem. Däli göwnüm suw astyny halady Ummanlaň düýbünden gözledim merjen. Suwuň astynda-da sendiň kölegäm, Näçe dilseň, ýüregimi diliber. Çykdym göýä Mejnun bolup çöle kän Süýji wysalyňy arzuwlap, dilber. Güýzde ýaprak kimin gaýýar pikirler, Pikirleň astynda ýegşerýär gerden. Ýüreklere ýara salan bi kirler Entek gyltyzrajyk başy egerden. Tupan tursa, başyn ýaýkar agaçlar, Diňe yşk öňünde egilýär başlar. VI Diňe yşk öňünde egilýär başlar, Sebäp, damarda gan at salýar her ýan. Şeýdip, söýgiň agyr günleri başlar Günbe-günden ýakyp-ýandyryp barýan. Duýgulaň içinde iň beýgi söýgi, Muny hiç kim inkär edip bilenok. Bir ýürege sygýar müňlerçe duýgy, Başga bir galyba salyp bolanok. Erkin sähralarda açylýar güller Her gül baldagynda bolarmyş tiken. Tiken batyp ýaralansa göwünler, Söýgüler ýigrenje öwrülýär eken. Al asmanda çapyp barýan al aty, Hernä, onuň döwülmesin ganaty. VII Hernä, onuň döwülmesin ganaty, Ganatsyz guş bolmaz, arzuwsyz ynsan. Seni ýatlamasam geçmez sagadym Ýürekde duýgular pynhandan-pynhan. Pynhan görki bilen aklym alan gyz Bilmedim, nirede onuň hyýaly Düşüň gam-gussalar galamda ýalňyz Maňlaý saçlarymyň düşüşi ýaly. Tüssesiz ot bolmaz, gussasyz söýgi, Gussada taplanýar söýgülerimiz. Şeýdip, aýdyň bolýar iň tämiz duýgy, Şeýdip, saplaýarys duýgulary biz. Duýgulary yşk kölüni gulaçlar, Ýogsam gül yşkynda saýramaz guşlar. VIII Ýogsam, gül yşkynda saýramaz guşlar. Guşlar saýramasa, gülem solarmyş. Nurly Gün baharyň gelenin buşlar Ýene-de täzeden başlanar durmuş. Ýene-de ot alar sönen ýürekler Barha gyzyp barýan Günüň howrundan. Ýel ösende başyn yrar derekler, Gömülen duýgular çykar gabryndan. Obadan kowulan misli ykmanda Öz rysgyny diläp ýatyr ykbalym. Bir görmesem sabyr-takat ýok mende Bir göräýsem has-da beter ahwalym. Bu duýgudan ganmadyga ýat olar, Däli köňül gül howrundan ot alar. IX Däli köňül gül howrundan ot alar, Soňra bolsa darar Günüň saçlaryn. Ýürekden ýürege ýörär ýodalar Sen-ä menden, menem senden gaçmaryn. Ilki ýolumyzy duş etdi ykbal Oň ýükün götermek kyn bolsa-da, kyn. Bagtym bolaýmagyň ahmaldyr, ahmal Meňem seniň bagtyň bolmagym üçin. Saçlarymy ýagyş bilen ezerin Soň bilmän ýataryn turar-galarym. Men şonda-da seni gözläp gezerin Ähli marşrutlaň duralgalaryn. Käte gelýär şu apatdan dynasym, Gülüstana öwrüp çölün synasyn. X Gülüstana öwrüp çölüň synasyn, Teşne dodaklara rahmet damdyryň. Yşkym meni, goý, synasa-synasyn Köýen köňlüm böwri kimin tamdyryň. Basylaýmaz bu pelekden sussum meň Lowlap duran odum ýok-da, tüssäm bar. Gülmäň tämiz duýgularmyň üstünden Meniň örän mukaddes bir gussam bar. Şol gussa ýetirer meni kemala, Çyzar iň görnükli rotalarymy. Giderin şol täsin pynhan jemala Diňläp Bethoweniň notalaryny. Durky bilen ýanyp duran ot olar Ýeri, size näme diýjek notalar?! XI Ýeri, size näme diýjek notalar?! Şonsuzam özüme ýetik azarym. Goý, üýtgese üýtgäbersin modalar Seň adyňy şygyr bilen bezärin. Altyn suwy berlen ajap setir deý Wasp edip ýazaryn şygyrlaň şasyn. Garyp tünegime bagt getirdi Meniň saňa bolan ähli yhlasym. Goý, sen maňa düşünmeseň düşmän geç. Ýok, bu däldir, bolmandy meň azarym. Köňül saraýymda bir dem düşläp geç Garaşyp dur maňa kämil mazarym. Öýkenime oklap ähli minasyn, Meni diňe meniň söýgim gynasyn. XII Meni diňe meniň söýgim gynasyn Ýagmyryň zemini ýuwuşy ýaly. Unudaly geçen günleň kinesin Günüň gara buldy kowuşy ýaly. Ýöne iňrik çöküp, üşände zemin Şunça garaşsaň-da, gelmese säher. Bir ýat ýurtdan gelýän nätanyş kimin Seniň söýgiň meniň ýanyma geler. Men ol yşky apalaryn, goraryn, Söýgi setirlermi bererin okap. Soňra seni seň söýgiňden soraryn A men, nämüçindir, henizem tukat. Mydam şo bir gussa, mydam şo bir heň Tä Güneş batandan daň sazyna çen. XIII Tä Güneş batandan daň sazyna çen Ýüzläp-müňläp pikirlere bolup ýar. Ýüz ýola ot alyp, müň ýola öçen Bezzat köňül öz bagtyna howlugýar. Arzuwlarny düýşlerine nagyşlap, Diňleýär kalbynyň joşgunlaryny. Entek söýülmedik gyza bagyşlap, Heniz ýazylmadyk goşgularyny. Durmuşda iň täsin synagdyr söýgi Ol geljek wagtyny öňden duýdurmaz. Depäňden guýlan gaýnagdyr söýgi, Ýöne hak aşygy ýakyp-köýdürmez. Ýarar tolkunlary kükregi bilen Hüwdüläp ýaraly ýüregi bilen. XIV Hüwdüläp ýaraly ýüregi bilen Hiňlenende bagt ajaýyp sazyna. Eý, sen, köňli aglan, gözleri gülen! Şärik bolarmysyň bahar-ýazyma?! Ýazan şygyrlarmyň mukamyn çalsaň, Ýüregmiň sesini duýdugyň bolar. Bir zaman örtenip ýadyňa salsaň, Ine, şol. Şol meni söýdügiň bolar... Dünýä gelmegimiň manysy berkär Keçjal ahwalymdan bir habar alsaň. ...Şahyr bolmak meniň nämäme derkar Eger, sen meniňki bolmajak bolsaň. Gülün görse bilbil joşy göterler, Söýgüsini ýatlap ýyglar setirler. Magistral Söýgüsini ýatlap ýyglar setirler, Sen bir merdemräk bol buýsançly başym. Kömür deý gijeler, süýt deý ertirler Gussa gaplap aldy töwerek-daşym. Her kimiň bar başyn egýän halaty, Diňe yşk öňünde egilýär başlar. Hernä, onuň döwülmesin ganaty, Ýogsam, gül yşkynda saýramaz guşlar. Däli köňül gül howrundan ot alar Gülüstana öwrüp çölüň synasyn. Ýeri, size näme diýjek, notalar?! Meni diňe meniň söýgim gynasyn. Tä Güneş batandan daň sazyna çen Hüwdüläp ýaraly ýüregi bilen. Çeşmesi: https://www.br.com.tm/sections/5/3290. 04.02.2023ý. | |
|
| |
| Ähli teswirler: 1 | |
|
| |
