15:39 Ýaz ýagşynyň ýatlamasy | |
| ÝAZ ÝAGŞYNYŇ ÝATLAMASY Ynsan kalbyny özi bilen ýazlaşdyrýan ýaz pasly kalplarymyza ýylylygy, mähri paýlap geldi. Göýä ýazyň gelenini hemmelere buşlamak isleýän ýaly asmandaky bulutlar dürdänelerini ýere seçip başlady. Penjirä urlup, soňra aşaklygyna syrygyp gaýdýan damjalar bulutlaryň pynhan syryny saklaýan mysaly, içine sygmaýan duýgularyny «şybyrdap» aýtmak isleýän ýalydy. Bulutlar bolsa duşuşyga gijä galýan dek, eglenmän geçip gidip barýardy.Şol wagt mugallymyň: «Muňa ýaz diýerler, ýaz bolsa ýagşy bilen gözeldir» diýmegi, meni ýaz ýagyşly ýatlamalara alyp gitdi. Kakamyrat Rejebowyň bir goşgusynda: Her damja bir duýgy... Aýry ýatlama... Umytlar...Hyýallar...Arzuwlar ýagýar— diýşi ýaly, ýagýan diňe ýagyş däldi. Ýagşyň her damjasynda bir duýgy, bir ýatlama bardy. Bu ýagyş bolsa meni senli günlere alyp gitdi. Ýazyň ýaňy gelip, kalbyňa hoştap ysyň dolýan günleriniň birinde okuwdan öýe gelýärdim. Bulutlar ýere gaçaýjak ýaly, tutuksy halda ýüzlerini bürüşdirip durdy. «Öýe baryp ýetişäýsedim» diýip, içimi hümledip, ädimlerimi çaltlaşdyrdym. Şol wagtam özüniň dürdamjalaryndan binesip etmejek bolup, gök gümmürdäp, ýagyş ýagyp başlady. Wah, ýagşyň ýagany gowy-la, ýanymda saýawanym ýok-da. Ýagşa ezilip, içimi gürledip barşyma üstüme tutulan saýawanyň nireden gelenine-de üns bermändirin. Birden gelen saýawana ýüregim ýarylan ýaly bolup, tolgunyp, saýawan astyndan çalaja seretdim welin,nätanyş, ýöne mähirden doly gözleriňe gözüm düşdi. Ejemiň hemişe aýdyşy ýaly, «Iki gulaç dilli» diýilýänlerdendim. Ýöne ýa-ha şol gözleriň, ýa saýawanyň, ýa-da ýagýan ýagyş dilimi baglapdy. Hernä kejirligim bir ýerlerden peýda boldy-da, dilimiň güýjüni ädimlerime berip, saýawanam eliňe tutduryp, ýöräp ugradym. Onýança-da yzymdan ýetip,saýawanyňy maňa berip: «Bagyşlaň, sizi ýagşa dözüp bilmen» diýdiň-de, ýoluňa bakan ýöräp gitdiň. Näme diýjegimi bilmän durşuma eýýäm gözden gaýyp bolupdyň. Wah, sagbolsunam aýdyp ýetişmedim-ä. Saýawan bilen ezilmän öýe ýetip geldim. Ondan soňra köp wagt geçdi. Olsaýawan bolsa hemişe seni ýatlatdy durdy. Diňe saýawan däl, seni duşuran köçedenem telim gezek geçipdim. Olam köpwagtlap seni ýatlatdy. Saňa duşmak bagty nesip eder diýip, ýagşam birnäçe gezek ýagypdy. Ýöne şol günden soň, gözden gaýypbolupdyň. Şol günden soň, doly bir ýylgeçdi. Sen hakda kalbyma dolan setirlerikagyza geçirip goýupdym: Şol gün den soň hakydamdan çykmadyň, Ýa şol gözler, ýa saýawan jadyly. Duýman durkam gözden gaýyp bolupdyň, Ne salgyňy bilýän, ne-de adyňy. Tanyş ýolda dusan nätanyş ýigit, Şol ýollara birje nazar salyp git! Her göremde seni ýatlatmaz ýaly, Haýyş, menden saýawanyň alyp git! Şeýle ýatlamadan çykyp bilmän oturyşyma mugallymymyzyň: «Talyplar, hany,ýaz ýagşy hakynda öz pikirleriňizi, duýgularyňyzy aýdyp beriň!» diýen sözleri meni hyýal dünýämden alyp çykdy. © Nurgözel ÝAZBERDIÝEWA Çeşme: "Esger" gazeti 25. 05.2023 | |
|
| |
| Ähli teswirler: 1 | |
|
| |
