00:13 Sazlaşyk | |
| SAZLAŞYK Gara bulutlardan bölünýän owaz, Ýagşyň damjasynda täsin ses edýär, Tebigat lirasy ýakymly bir saz, Sazlaşyksyz dünýä yşky bes edýär. Käte ýat gapynyň myhmany deýin, Tebigat öýüni kakmaga derek, Sazlaşygyň tapman gelýän merkezin, Göýä diýjek ýaly: “Saňa kim gerek?” Ýitirilen pikirleriň, günleriň, Boş geçiren gijelerim saldarlap, Öýkeli talantyň boýnuna böküp, Eýýäm hiç birisin bilmersiň dolap. Gije – gündiz aýtmaga-da dözmedik, Şygyrlarmyň bary gitdi aglaşyp, Ýa-ha talant menden ökje göterdi, Ýa-da kemter ýetdi duýgy, sazlaşyk. 2013 ý Şat günümde, gamly günde, Ýüregimde ýaşan ýar, Ýatlamalar galdy sende, Meni durmuş çagyrýar. Aý bolmasa, bilýärdimem, Ykbalymyň bir däldigin, Güller bilen gelýärdiňem, A gülleriň solýandygyn. Adamyňky şeýle bormuş, Ýetäýmese öz gezegi, Kellesinde parhsyz durmuş, Ýüreginde öz söýeni. 2014 ý Enä Seniň bar wagtyňda dünýä gözeldi, Dünýä baky bolup göründi bize, Ähli zatlar ap-aňsatdy, hezildi, Ähli zatlar ýygnanandy öýmüzde. Güneş diýseň, senden yssy bolarmy? Bagt diýseň, meňzeş bolarmy saňa? Hemme zadym üpjün ýaly bolsa-da, Käbäm, seniň mähriň ýetenok maňa. Men indi birýany bergili adam, Dünýäni öňküden egsik duýýaryn. Goý, nämäni ýitirmeli bolsa-da, Söýýäni bir ýitmäwersin ynsanyň. 2021 ý Ýitgi Her gezek öwsende mylaýym şemal Baglaram tolgunyp şabyrdaberse, Ýüregme bir täsin alada düşýär, Otur soň asuda oturyp bilseň. Göwnüme şol baglaň gohçul sesinde Meniň ýalňyzlygma duýgudaşlyk bar, Edil köp gepleýän gelnejem ýaly, Gohlansoň, iň wajyp ýerinde dymýar. Olar ýada salýar şol sesi bilen Köýnegi şowurdap geçen ýigidi, Giç düşünmek meň ykbalym bolansoň, Şol gün ömrüň ähmiýetsiz günüdi. Soň kem-kemden düşündim men, elbetde, Mana eýe boldy günleriň bary, Ýöne ömrüň ähmiýetsiz gününde Men wajyp birini ýitiren ýaly. 2018 ý Esger Bu gün buýsanç bilen galdyrýan başym, Bu gün meniň buýsanmaga hakym bar, Eje, ýene dileg baryn et maňa, Çünki menem esger bolmaga barýan. Öňümde Watanyň beýik daglary, Ýürekde halkyma bolan söýgim bar, Kaka, pataň bilen ýola salyber, Çünki menem esger bolmaga barýan. Ynam guýup barýandyryn gözüme, Hem söýgüli ýara goýup arzuwym, Men indi goragçy ähli söýgime, Çünki beýik halkyň esgeri bu gün. 2020 ý Ýüzlenme Durmuş, Menem saňa juda belet däl Her ädimiň öz ýeňlişi, ýeňşi bar, Ýöne diňe süýji durmuş gerek däl, Günlerimiň göreş bilen gelşi bor Bagt ýyldyzyň öçýär, söýgüler gidýär Aýby nä?! Ýene-de geler jahana, Men ykbalym üçin saňa minnetdar, Umytly daňlary beripsiň maňa Bagty gözlemeklik näme günämi? Ynsap meniň bilen edip ýör jedel, Belki, şu sebäpden meniň daşymdan Aýlanýansyň hem diýýänsiň “Sen gedem” Howlukýanmy ýa-da ýaşlykdanmyka? Bilemok, ykbala edýänmi dalaş, Ol bolsa näbelliň keşbine girip, Gelýär-de ýüzlenýär “Azajyk garaş” 2009 ý Bägül ATAÝEWA | |
|
| |
| Ähli teswirler: 0 | |