10:36 Talybyň ýandepderçesinden | |
 TALYBYŇ ÝANDEPDERÇESINDEN Umyt. Ol her pursat Güneşe meňzär. Ýolumyzy ýagtyldar. Äden her ädimiňde yzyňa öwrülip seretseňem, ýagtylygy görersiň, ýylgyrarsyň. Emma onuň Günden ýekeje tapawudy bar, ol hem ýaşmaýar. Şeýle bir adamlar bar. Olar göwnüňe ganat dakmagam başarýarlar. Käte öň hiç gabatlaşmadyk, hatda tanamaýan adamlarym bilen gürleşip göresim gelýär. Maňa näme gürrüň bererkäler? Teatr. Konsert. Atageldi Garýagdyýew. Gözlerini berk ýumup, duýgularyna berlip oturan gyzjagaz. Belki, biziň köpimizi ýylgyryş mähriban görkezýändir?! Adamyň bedeninden öňürti ruhy güýçli bolmaly. Basan ädimlerimiziň netijesinde nokat goýjak eserimiz ýazylýar. Ýüregiň göterip bilmedik ýüklerinem kagyz göterýär. Ýanyp durkaň, ýazyp sowap bolýar diňe. Dertleriň dermany hiç bir zada aşa üns bermezlikmikä? Ýagtylyga ýöremek bilen ýaşaýşy tapyp bolýar. Pikirler dürli, emma olaryň syrlysy hem bar. Göwnümize degenler söýýänlerimizden has köp ýer alýan ýaly kalbymyzda. Bu, dogrudanam, şeýlemikä? Adam unudanlaryny diňe ýalňyz galanynda ýatlaýarmyka? Içimizdäki kiçijek: «Suratlandyr» diýselerem, suratlandyryp bilmejek umytlarymyz, gör, bizi nirelere alyp gidýär. Öňümdäki kagyzlar bir seredemde ak, bir seretsem, çyzym-çyzym, birde bolsa gysymyň şatysyna çydamy ýetmän togalanyp ýatyr. Hakydamyz käte ýatlasymyz gelmeýän zatlarymyzy ýadymyza salmaga şeýle bir ukyply. Gözümi ýumýan, niredigini özümem bilmeýän ýerime syýahat edýärin. Gije kime ýagtylyk, kime bolsa garaňkylyk getirer. Aglasy gelýän bulutlaryň göwnüne degseň, aglap içini boşatsalar. Ýürek ýüzugra edilen bellikler bilenem boşap bilýär. Görgüliniň görgi baryny görmegine diňe beýlekilerden tapawutly pikirlenip bilýänligi sebäp boldy. Çaga bolsaň, sähel zada yrsarap aglasaň. Näziňi çekseler... Çagalygyma dolanmak isleýärin. Geliň goşulsaňyz! © Gülnar GELDIMYRADOWA, Magtymguly adyndaky Türkmen döwlet uniwersitetiniň žurnalistika fakultetiniñ talyby "Nesil" 11.02.2023ý | |
|
| |
| Ähli teswirler: 0 | |