10:44 Saýt bir ýaṣady | |
 Bu gün edebiýat.clan.su saýtynyň döredilenine bir ýyl boldy Bir ýyl mundan öň täze saýt giň mümkinçilikleri bolan,erkin döredijilik sahypasyny okyjylaryna hödürläpdi. Edebiýat kafesi teşne köňüller üçin edebi ýazgylaryň,hekaýadyr,romanlaryň,oýlanmadyr,goşgularyň we başga-da köpugurly ýazgylaryň çuň çeşmesi bolup döredi. Her bir ynsanyň maddy zerurlyklarynyň bolşy ýaly,ruhy hökmanylyklary hem bolýar. Bu zerurlyklar kabul edilip durulmasa,ruhy açlyk – boşluk döreýär. Bu boşlugy kimsi aýdym-saz,kimsi kino-klip,kimsi suratkeşlik,kimsi bolsa edebiýat we beýleki ugurlar bilen doldurýar. Umumylaşdyryp aýtsak, ýa sungat ýa-da edebiýat bilen ruhy zerurlyklar kanagatlandyrylýar. Emma ol ugurlaryň aslyna baksak,çuňuna seretsek, Onuň Aly Hezretleri Söz sungatyny göreris. Söz bilen ýokdan bar bolundy. Söz bilenem ýok bolunar. Sözden gelip çykýan döredijilige uly sarpa goýýan “edebiýat.clan.su” saýtynyň administratory uly ädim ädip,bu internet sahypasyny ýöredip başlady. Bu saýdyň ilkinji günlerinden okyjy – awtorlara mümkinçilik döredilip,ýazan ýazgylaryny gyzgyny bilen halka ýetirmäge şert döredildi. Paýlaşylýan temalar barada ERKIN (subýektiw bolmak şerti bilen) pikir alyşmak,bellikleriňi,düzedişleriňi aýtmak elýeterli edildi. Okamaga wagty bolmadyk ýa-da okamaga “ýalta” saýtdaşlar üçin audio – wideo ýazgylary hödürlendi. Geliň,indi biraz pikirlenip göreliň! Öz käri – hünäri edebiýat bilen bagly bolmadyk bir zenan näme üçin özüne jinnek ýaly hem peýdasy bolmadyk,tersine barja wagtyny sarp etmegini talap edýän bu işe baş goşdyka?! Bu iş ondan nämeleri talap edýär?! Indi bilişimden jogap bermäge çalyşaýyn: - Saýdy içki we daşky “duşmanlardan” goramaly – 7/24 sagat; - Paýlaşylýan temalary ýekän – ýekän okap çykmaly; - Redaktirlemeli; - Gerek bolsa suratlar bilen bezemeli; - Dürli häsiýetdäki okyja sabyrlylyk görkezmeli; - Saýdy reklamasyz tarifde saklamaly; Kemter sanan bolsam,okyjylar teswirde goşup bilerler. Mundan başga-da bu zatlaryň daşyndan öz jogapkärçilikli işine ýetişmeli,maşgalada zenanlyk - enelik wezipelerini hem kemsiz alyp barmaly. Sanan zatlarym diňe dilde aňsat. Ine şu zatlar admin zenana näme üçin gerek? Beýle artykmaç “kellagyry” hiç kime-de gerek däldir. Sowallara ýene özüm bir jümlede jogap bermekçi: Ol edebiýata aşyk,sungata aşyk. Çyn aşyklar bolsa hiç wagt bähbit aramaýarlar,tersine pida edýärler,gurban berýärler. Ol özi ýaly aşyklary bir ýyl mundan ozal edebiýat kafesine çagyrdy,döredijilik bilen hezzetledi we dowam edýär. Tüweleme beýleki aşyklaram “eli-ele berip” – agzybirlikde öz goşantlaryny goşdylar we goşýarlar. Okyja haýyrly ýazgylar,pikir alyşmalar,bellikler,tankytlar edebiýat kafesinde Sözüň tagamyny hasam artdyrýar. Saýdyň tertip –düzgünli ýöredilmegi bizi guwandyrýar. Saýt “Az bolsun,ýöne, uz bolsun” ýörelgesine eýerýär. Oňa goşulýan – agza bolýan okyjylaryň sanyna buýsananok. Gaýtam ukyp –başarnykly,yhlasly agzalaryň gözleginde. Edebiýata çyn aşyk agzalara “Hoş geldiň” ,boş dawa-jenjel gözläp gelenlere bolsa “Hoş sagboluň!” diýýär. Çünki edebiýat edebe – ynsanylyga –ýürekdeşlige – birlige – aslymyza çagyrýar. Bu bir ynsanyň dünýä ýaly uly çakylygy. © Meňli AŞYROWA | |
|
| |
| Ähli teswirler: 8 | |
|
| |
