OGULNUR ATAÝEWANYŇ GOŞGULARY:

GARAŞDYM

Günleň biri elden gaçan käse deý,
Taýyp gitdiň, sabyr käsäm moý açdy.
Gör, nije ýyl «dymp» etmedik ýüregim
Edil şu gün jibir-jibir dil açdy,
…Iller ýaly diýmeseň-de: «Garaşgyn»
…Garaşdym.

Men göze ilen bir nowjuwan gyz ahyr,
Aladadym enem bilen atama,
Guda gelse ýer tapamok girere,
Gatnaýanlar köpelipdi ak tama,
Aňsalaram, aldamaga çalyşdym,
…Garaşdym.

Kese bakýan kesip geçjek ýoluňa,
Iliň gözi maňa göni dikilýär,
Sen dünýäni ýumrup gitdiň başyma,
Göz kän, dil kän… şu zatlardan çekinýän.
Halyň niçik, daşgulakdan soraşdym,
…Garaşdym.

Mende bir dert, sende-de müň alada,
Derdim ýeňletmäge käte gel ahyr.
Meni ýüpsüz aýralyga saradyň,
Dartyberseň, kertiberer teý ahyr,
Ynanýaňmy, men kiç kime garaşsyz
Garaşdym.

Kämahallar ýyllap duşman oňarsyň,
Maýam dörär käte kowup-gaçara,
Derdim çekişeňok, asyl özüň dert,
Sen hossar däl, saňa syrym açara
Men bu gije ejem bilen aglaşdym,
…Garaşdym.

SEN DIŇE SYNLA!

Sen diňe synla,
Iç-içime sygman aglaýanymy,
Kemsinýänmi, göwnümiňem synyşyn.
Ody öçürilmän galan çäýnek deý,
Gaýnap-gaýnap bar hasratyň dymyşyn…

Sen diňe synla,
Döz gelşini ejiziň,
Sensiz niçik hala ulaşanymy,
Gije, öýlän, säher ýa-da ir agşam
Gelmejegňi bilip garaşanymy.

Sen diňe synla,
Ýoly syryp barýan täsin ýalňyzy,
Hem bu ýyllaň gazap bilen garradyp,
Güller ýaly soldurşyny ter gyzy.

Sen diňe synla,
Saňa ýat adamy, perişan haly…
Urunsa-da yraň-dyraň ugrugyp,
Sen diňe synla,
Meň sensizem ýaşaýanmy, gülýänmi

***

Hergiz menden özüň hakda sorama,
«Ýatlamok» diýsemem ynanan bolaý.
Gider diýip getirmändim oýuma,
Indi göwnüm tapjak bolmaňam goýaý.

Dagam üýtgeşik bir eden işim ýok,
Seni ýönekeýje söýdüm diýmesem.
Üýtgeşik ýada-da düşüp baraňok,
Ýüregimde ýaşaýansyň ýöne sen.

Söýgi küýsän çagy güller guraýar,
Söýgi göýä üzüm suwly şerbetdir.
Ýoklugyň ýüregmi şeýle gysdyrýar,
A barlygyň barja zatdan erbetdir.

***

Mydar edýän ýürek bilen
Müň ýamaly.
Aglasyň gelende aglap bilmeseň
Iň ýamany.
Aýaň, yşka duşmadygy,
Synlap öň ýanany.
Aşyk ýöne ýerden gysmaz
Galamy.
Undup bolýa ähli derdem,
Unutma ýok,
Dert salany.
Bar zat ýazgydyňa görä,
Pozup bilmersiň
Sen ony…
Noldan başlap ýene nola
Getirýän yşkyň jemini.
Bu bir durmuş kadasy
Görüp gelen ýok
Soňuny…
Çaklaýşymdan juda ýeser,
Gör, ony.
Mydama söýüp ýaşadym,
A sen meni?

«Sen»

Dünýäň ähli baýlygyna,
Çalşyp bilmedigimsiň sen.
Gyýylma bitaýlygyma...
Gowşup bilmedigimsiň sen.

Duýgulam ýaşaýar entäk,
Köreýän yşkymy ýelpäp,
Bu ýollarda selpäp-selpäp,
Duşup bilmedigimsiň sen.

Säher durmaz aklygyna,
Ynsan ötmez päkligine,
Henizlerem ýoklugyňa
Alşyp bilmedigimsiň sen.

Ötdi ýaşlygym nalaýa,
Aýt bizi näme baglaýar?
Nika, öý hem bir täleýe,
Duşup bilmedigimsiň sen.

Sonaň akja köýnegi

Elleriňe döneýin eje. Ýüregiňe döneýin eje. Şu giden mähelläň arasyndan bar ünsim bilen seni synlaýan. Ýaşlar toý zalyna girenden. Günäsizje çaga ýaly kemşerip başladyň. Sen bagtlydyň biz bilen hemişede bagtlydyň. Seniň şonda niçiksi duýgulara berleniňi bir men göräýdim öýütýän. Hatda akja toý köýneginiň eteginden näzirgäp ýapyşyp gelýän Sonada düşünmedi. Seň gözleriňde bolsa geçmiş,birgiden bassaşja gyzjagazlardan doly öýüň keşbi bardy.
… Harplyk baýramy .

Ogulnur Ataýewa

“Garylsa-da ýag bilen suw bir-birine goşulmaýar, gumly gyzyň aýdymyna dagly ýigit düşünmeýär.”

gyzyklyja gördüm.
"arap bilen ajem" diýilýäni ýada düşdi.
"gumly gyz we dagly ýigit"
dagsyz biri we dagly biri ýa-da gumly biri bilen gumsyz biri...
ýöne "arap bilen ajemiň tapawudy ýok" hem diýilýär, ýöne bu başga meselede diýilýär.
haladym ýokarkyja setiri.

Kimkä?
Dünýäm içre gunçalajak,
Gül açjak bagbanym kimkä?
birhili bagban gunçalap, gül açýan ýaly bolupdyrmy?

Mydar edýän ýürek bilen
Müň ýamaly.
Aglasyň gelende aglap bilmeseň
Iň ýamany.

gow ken şunsy.
ýazylyş stilinem haladym.

kellä geldi.
nämeüçindir diňe söýgi gürrüňleri...
birsydyrgyn söýgi temasy.
ýogsam gowja ýazýan eken.
üstünlikler.

kitabynyň sahaby barada:
dizaýnere 2-lik
"öwnümiň öwni" diýip ýazany üçin.
gaş bejerjek bolup "G"-ni çykarmak nämä gerekdi?
aňyrsyna bakyp duran figuraň ýarty bolmagy hem dogry däl.
onda-na arassaja edip:
Ogulnur Ataýewa
Göwnümiň göwni
-diýip ýazylan bolsa-da gowy bolardy.
(indiki çykjak kitaplarynda üns bererdä).
---
kitabynyň çykmagynam gutlaýaryn.

Ogulnur gowy ýazýar. Sebäbi ol Şahyr...
"Men göze ilen bir nowjuwan gyz ahyr,"
şu setirini "men bir göze ilen juwan gyz ahyr" - diýse-de manysynda-da sözünde-de artykmaç üýtgejek zat ýok ýaly.
belki "nowjuwan" sözi owadan görüp bogny artykmaç bolsa-da goýandyr. Emma büdreýär şol ýeri

Ogulnuryñ gowy goşgulary bar. Ylhamyna bereket!

Mango,kitabyñ dizaýneri siz bolsadyñyz nämeler bn bezärdiñiz?

Birnäçe kerem: ,, Her sapar teswir ýazmaýyn -la barybir wagtym gidýär. Kopmýuterim bolan wagty ýazaryn " diýip, ýazman geçýän. Ýöne su gezek ýazyp baslajak:

Bäh, suratdaky Ogulnur bolsa, gelin wagty hasam owadan eken, men diñe gyz wagtynda gosgy okaýsyny görüpdüm. Ýañylmasam, medenýet institutyna-da giripdimikä öýdýän.

,, Kimkä " gosgusynda dördünji setirini kapyýalasdyrmandyr.
,, Dünýäñ ajy öt däldigni, Subut edip söýjek kimkä"-ony hiç kimem subut etmezmikä diýýän. Sebäbi bu durmusy sen ýasaýañ. Öz-özüñ subut edäýmeseñ señ mañlaýyñdan çykjak ýigidem edibilmese gerek.
,, Ody öçürilmän galan çäýnek deý, Gaýnap-gaýnap bar hasratyñ dymysyn..."-çäýngi suwdan dolduryp, oduñ üstünde goýmalymyka? Bizä çölde bolsak tüñçäni, bolmasa-da gitirini suwdan dolduryp gazyñ üstünde goýýas. Gaýnap-gaýnamasam birhili.... Ýaman ýazmak kyn düsýär: bir-ä telim prastoýrak bolýa, birem birini kõpbilýänsiräp tankyt edesim gelenok. Umuman, Ogulnura üstünlikler!

,,Sen "gosgusynyñ dördünji topbagynda ,, baglaýar " ,, täleýe " sözleri kapyýalasmaýar. Gosgyñ onki süññi (bogun, kapyýa, säginme, grammatika...) bolmasa gosgy bolanok! Bir halypanyñ:,, Kapyýasyz gosgy gosgy däl, ol proza bolýar. Gosgynyñ esasy artykmaç tarapam sonda"diýipdi. Harp ýalñyslyk giden bolsa bagyslañ telimiñ prostoýrakdygyny ýene bir gezek ýañzydasym gelýär

okadygymça ýene pikir kellä gelýär ,, Sen diñe synla, Iç-içime sygman aglaýanymy" -birhiliräk esdilýär. Içiñem içinde bir iç bar ýaly. ,, Hiç içime sygman aglaýanymy" diýen bolsa...

içi-içine sygmazlyk
Ylgamakdan ýa-da gahar-gazapdan ýaňa çalt -- çalt dem almaklyk.

Ol içi-içine sygman, zordan gürledi.

https://enedilim.com/sozluk/soz/i%C3%A7

"Ody öçürilmän galan çäýnek deý"
şu setirler barada "çäýngi suwdan dolduryp, oduñ üstünde goýmalymyka? Bizä çölde bolsak tüñçäni, bolmasa-da gitirini suwdan dolduryp gazyñ üstünde goýýas" -diýilen pikire garşy gelip, goşgy setirleriniň adwokatlygyny edesim geldi.

standart pikirlenme diýen zat bar.
ýagny, "derýanyň kenaryna iki adam geldi" diýsem, köp kişi (köpçülik) şeýle göz öňüne getirýär, ýagny derýanyň kenaryna iki sany adam ýan-ýana bolup, şol bir kenara bileje geldiler. bu standart pikirlenme.

standartdan daşary pikirlenýänler "derýänyň kenaryna gelen iki adamyň hersi bir tarapdan, aýry kenarlara gelip biljeginem" допускать edýärler (pikirlenip bilýäler).

indi gelenli çäýnege.
dostlar çäýnek diňe farfordan bolmaýar.
demir çäýneklerem bar, onam oduň üstünde goýup bolýar.

"Ody öçürilmän galan çäýnek deý"
demir çäýnek bolanok - oňa kitiri diýmibem bilersiňiz, ýöne ylalaşyp bilemok, kitiri aýratyn gap, ýöne ýörite metal çäýnekler hem bar... :-)

Ilki göz öñüme gelen zady ýazaýdym. Ýöne henize-bu güne çenli demir çäýnegiñ bardygyny göremok. Mümkin bardyr

Sen diňe synla,
Döz gelşini ejiziň,
Sensiz niçik hala ulaşanymy,
Gije, öýlän, säher ýa-da ir agşam
Gelmejegňi bilip garaşanymy. -bärde ,, ir agsam" ümüs-tamysmyka?

,, Türkmen diliniñ düsündürisli sözlüginde" ýok eken ,, iç-içime sygmak" ýöne enedilim-de bar. Ynha, sözlükdäki sözler:
Içi düşmek, Içi gaýnamaz, Içi güjükli gürrüň, Içim tap, Içinden gaty (ýaman) getiren, Içinden ýalyn geçen, Içinden ýol eden, Içini üzmek, Içini ýakmak, Içiňden geçip barmak, Içiňde saklamak, Içiň eljuk diýmek, Içiň gatamak, Içiň gorulmak, Içiň gülmek, Içiň gysmak, Içiňi bermek, Içiňi gidermek, Içiňi dökmek, Içiňi sowatmak, Içiňi tutmak, çiňi ýakaýyn diýen ýaly, Içiň tütemek, Içiň ýanmak, Içi pikirli, Içi pis, Içi ýatakly, Içi ýylamazlyk, Iç keselleri lukmany

Içi-içine sygmazlyk - bu nämedir bir zada (nämedir bir zatdan kemsinip?) ýüregiñ çişip, içiñi hümledip gezip-gezip iñ soñy aýtjak zadyñam sojap-sojap aglap aýtmak. Ýa bir zady gõwnüñe alyp, ýa kimdir biriniñ ýoklugy üçin agras-agras dymyp gezip iñ soñam ýekelikde içiñi çekip-çekip (ýüregi çişip diýilýär) aglamak.