08:22 Gyş arzuwy | |
GYŞ ARZUWY  Ýaz gelende aýdym aýtjak gygyryp, Tans oýnajak däli – porhan çagba deý, Kel bolýançam bahanasyz sygyryp, Göçjek älemgoşar gören çaga deý. Ýaz gelende aýdym aýtjak gygyryp, Tans oýnajak, özem hetdimden aşyp, Porhanlyga uçraýançam çygyryp, Ýaşajak ýadymdan çykaryp ýaşym. Ýaz gelende aýdym aýtjak gygyryp, Dessanlardan , „Könegüzer “ aýdymy, „Ýaz geldi – ow, geldi – ow –o – ow“ görnüşde, Üýtgetjek hut sözlerinem aýdymyň. Ýaz gelende aýdym aýtjak gygyryp, Hüýlenýänçäm tans oýnajak ýaz bilen, Ýeke setir ýazmasam-da barybir, Meň nähili şahyrlygym ýaz biler. Ýaz gelende aýdym aýtjak gygyryp, Höwürtgeleň gapdalynda gohlajak, Çaga ýaly guduz açjak keýpine, Çybyk alyp aryketegem gorjajak. Ýaz gelende aýdym aýtjak gygyryp, Menmişimmi, gözellige dözmejek?! Tä tutýançam kowalajak kebelek, Tä tapýançam kömelejik gözlejek. Ýaz gelende aýdym aýtjak gygyryp, E-e-eý , Kakamyrat Rejebow ýalylar! Meň sesime ýumurtgalap garlawaç, Çigildemler ýarylar. Şu zatlaryň hemmesem bor, elbetde, Tutulýança kowalanar kebelek, Tapylýança agtarylar kömelek, Öjükýänçä gorjalanar aryketek, Aýdymlaryň üýtgediler sözlerem, Tans ediler hokga bary gözlenip, Höwürtgeden ürküziler garlawaç, Kimdir biri aýdym aýdar keýpine, Kimdir biri aýdym aýdar gygyryp, Şu zatlaryň hemmesem bor, diňeje... Ýaz gelende men bolman... 2006ý. | |
|
| |
| Ähli teswirler: 7 | |
|
| |
