05:56 Häsiýet | |
 HÄSIÝET Suw bermän, bilkastdan tebsiretdiler, Ýallaman, bilkastdan ajykdyrdylar. "Señ paýyñy iýýär ho-ol tazy" diýip, Onuñ garşysyna öjükdirdiler. Torture ýaly tos-togalak ol güjük, Ylla janawerde köýen dek ary. Il bilen işi ýok ýuwaş tazyny Dalamaga taýyn dogaly bäri. Şäheriñ gezelenç meýdançasynda Bu gün ýene gördüm şol tanyş oýny: Güjük taza bakan düw-düw dyzaýar Agyz uraýmaga ysanok bogny. Gapdalynda ol güjügiñ eýesi Guwanç bilen synlap onuñ üýrüşin. Makullaýar oñ dişlerin syrtardyp Ýognan boýnun haýbat bilen düýrüşin. Tazy bolsa düşünenok hiç zada Ol güjügiñ urýan azmyna haýran. Men näme ýamanlyk etdimkäm oña Diýýän ýaly diñşirgenip dur haýwan. Eýesi güjükden, güjügem ondan Göwnühoş boluşyp dur, hanha, olar. Güjükkä häsiýetin synlap haýykdym, It çykaýsa dagy nähili bolar?!. UTANÇ Bu-da bir gytalan zatlaryñ biri, Tapamok aýlanyp şunça dükana. Ýaş dükançy ýaşulyny çürkedi, "Toba" diýip, elim goýdum ýakama. Men diýdim: - Utanjyñ-haýañ ýokmudy? Ýaş dükançy diýdi: - Bagyşla, atam, Ýaponlar biz bilen söwdany kesdi - Köpden bäri ýokdur o diýen matañ... Halallyk hakynda gürrüñ edip dur, Göräýmäge epeý, döwlet ogrusy. Ýogsam, haram pula satyn alnypdy Diplomy, maşyny, çini, howlusy. Müýnürgemek nire, Uýalmak nire - Galstugyn oýnap, Owsunyp her ýan, Halallyk barada takal okaýar, Eý, estagpyralla!!! Haýran men, haýran. Aýaly ärine igenýär öýde: - Illerde bar ukyp bir sende ýokmy? - Giden bir edarañ eýesi bolup, Puldan kösendirýäñ - Utanañokmy? Utanýar... Utanmak kemi galanok. Utanjyndan ýaña dişleýär dilin. Ýöne, utanmaly adamyñ däl-de, Señ özüñ bolmaly ýaly-la, gelin?! Aksakal diýilýän adamlañ biri Ýaşkiçi kärdeşin çykaryp çete, Sargyt edýär oña gol ýygnamagy Bir bendäñ üstünden ýazyljak hata. Iki dost duşuşsa - gürrüñi şumluk, Üç ülpet sataşsa - edýäni gybat. Gybaty heleýler edýän ýalydy, Indi erkeklere ýetipdir nobat. Gelin gelne diýýär oýnadyp gaşyn: - Dogrudan-da, seniñ gezýäniñ ýokmy? Şo bir äriñ bilen gün görüp ýörmüñ? Durmuşdan galypsyñ, Utanañokmy? Ýok, ol utananok! Utanmaz ol - Berekella, saña, buýsançly Zenan! Dönüklik edeni aklamaz hiç kim, Hiç hili jemgyýet, hiç hili zaman! Bu dünýe nähili owadan, dostlar, Adam bu dünýäniñ iñ ajap nagşy. Emma ökünmeli adam ökünip, Uýalmaly adam uýalsa ýagşy. Men bilemok: ýa garaýşym ýöntemmi, Men bilemok: ýa-da özüm sadamy, Ýöne, düşünşimçe - bihaýalyk däl - Utanç-haýa adam edýär adamy. © Berdinazar HUDAÝNAZAROW, Türkmenistanyñ halk ýazyjysy | |
|
| |
| Ähli teswirler: 1 | |
|
| |
