15:03 Saña hat/ ol maña heýran galdy)) | |
 SALAM EZIZ DOSTUM! Nähili işler, dünýe malyndan gymmata durýan jan – saglygyň oňatmy? Menem gowy, şol öňki başagaýlygym, esasy zat janym – sag, işlem ugruna, öýüm abadan, dünýäm abat, goňşy golamlar parahat, aman – esenlik. Ýaradanyň ýalkawyna soňsuz şükürlerim bar. Eziz Dostum! köplenç duş bolýan ýagdaýlarymyz, günde-günaşa gabat gelýän kemçiliklerimizdigine garamazdan känbir pitwa etmesegem öňräk bolup geçen bir wakajyk hakda Saňa gürrüň beresim tutdy☹ Ilki bilen men bu sowaly özüme berip gördüm: özüm – ä şeý diýdi: “ýok, gaýta buýsanmaly, “özüňi özüň sylamasaň başgalar seni sylamalydygyny nireden bilsin?” Onsoň menem özümiň özüme beren jogaby bilen ylalaşdym. Dostumjan, ýokarkylary okap: “äh, mun-eýt, mus-mus diýip oturma-da mustapa diýäý-dä bahymjak” diýensiň. Bolýa! Diýýän onda şony. Kabulhanada wagtym bir raýat geldi, 37 ýaşlaryndaky adam. Milleti Türkmen. Saglyk ýagdaýlary oňat. Bejergä däl-de diňe dynç almaga gelen ekeni. Biziňem öz kabul ediş tertip-düzgünlerimiz bar. Diňe dynç aljak bolsaňam kesel taryh ýöredilip, alyp biljek bejergilerini bermeli. Iň gynançly ýeri ol raýat ors dilini suwara bilmese-de meň her soragyma ors dilinde jogaplajak bolup, ýa-da maňa berýän her soragyny orsça berjek bolup görgä galyp durşy nebsiňi agyrdyjydy. Ol öz ýagdaýynyň gözgynydygyna düşünsin maksady bilen men öz gezegimde her sözümi türkmençe aýdyp, öň endik bolup, il arasynda türkmençe ýaly eşidilýän rus sözleri-de türkmençe ulanmaly boldum. Hormatly Dostum, meni has beter oýlandyran zat onuň soňky soraglary, islegleri boldy, Meniň oňa beren jogabym: - Bizde dynç alýan wagtyň spirtli içgiler içmek, çilim çekmek, otagyňa öz maşgalaň bolmadyk birlerini getirip halanmaýan gatnaşyklar etmek gadagan! Gelýän raýatlaryň ýanynda aýal maşgala bar bolsa, familýalary bir bolmadyk ýagdaýynda nika kagyzlary bolmasa bir otaga göýbermek bolmaýar. Ondan eşiden jogabym: - Sluşaý, doktor, eto awaza. Nebolnisa. Ýa kak hoçu, tak žiwu. içmejek bolsam, heleýim bilen boljak bolsam zaçem mne suda? Men oňa düşündirjek boldum, dynç almak diýmek keýp çekmek däl-de, eýsem öz maşgalaň bilen şypahana bejergileri, uzak zähmet çekmekden soňraky ýadawlygy, sarsgyny aýyrmak, şypahana bejergilerini deňiziň arassa howasy bilen utgaşykly alyp baryp saglygyňy dikeldip, geljekde bedeniňi berkitmekdini, maşgşgalaňdan ýakyn zadyň bolmajakdygyny, eger başga niýetler bilen gelen bolsa gelmeli salgysyny ýalňyş gelenligini, başga ýerde näme etse öz işidigini, bizde welin şeýle ýagdaýlary saklamaly bolýanyny türkmençeläp düşündirjek boldum. Ol hem ýetişibildiginden bizden başga otellerde beýle däldigini, nirä barsalaram munuň ýaly “biderek” düzgünleriň ýokdugyny, ýaňzydýardy. Biziň öz iş ýerimiziň kadasyny berk saklaýandygymyza magat göz ýetirdimi nämemi iň soňunda ol maňa: “sluşaý doktor, sena barypýatan türkmen ekeniňlaý, gowusy sen bu ýerde oturma-da mekge medinä zyýarata gitsene...durmuşdan yza galypsyň...” Men onuň bu gepi üçin hijem kemsinmedim. Gaýta özüni özi masgaralaýan adamlara nebsim agyrdy. Ýöne şondan bäri bir sowal garşa pikirimde döreýär: “Türkmen bolmak, arassa türkmençe gürlemek, dynç alaňda hakyky ynsanlara mahsus dynç almak, iş ýeriň tertip-düzgünde saklanmagy peslikmi, kiçilikmi ýa-da samsyklykmy? Durmuşda yzagalaklykmy? Arassa adam bolmak aýypmy? Emma hemme adamlar ol raýat ýaly däl! Bir näçe dilde bilselerem garşysynda türkmen dursa suwara türkmençe gürleýärler, soñy biderek keýp üçin däl-de, dynç alanlarynda medenýetli, arassa dynç almagy, kanagatly bolmagy başarýarlar. Hawa, Dostumjan, şeýdip men haýran galjak bolup otyrkam, ol maňa heýran galyp gitdi☺ ýagdaýlara şeýleräk. Bu ýagdaýlar ählimiziň meselämiz. Dynç alaňda adam şekilli dynç almak aýyp zat ýaly görýänlere, garşyňdaky arassa türkmen wagty başga dili ýarym-ýalta bilseňem başga dilde gürlejek bolup çyr-çytyr bolmak özüňi özüň sylamazlyk dýip düşünemsoň munuň ýaly ýagdaýlara gabat gelseň Seniň nähili hereket etjekdigiňi, ýa-da indi şeýle ýagdaýlar gabat gelse özümizi nähili alyp barmalydygymyz hakda Seniňem pikirleriňi bilesim gelip, Saňa hat ugradýan. Uzak ýazyp Seniňem gyzyldan gymmatly wagtyňy alyp oturmaýyn. Saňa iň gowy arzuwlar ýollamak bilen @Nurdan. | |
|
| |
| Ähli teswirler: 16 | |
4
| |
