22:59 Saña hat | |
SAŇA HAT  Salam dostum! Bu hat Saňa. Haty geçen agşam ýazmalydym, Bir sebäp bilen şu günüňem ahyryna galdy.. şeýle-de bolsa “hiçden giç ýagşy” diýipdirler. Sen bu gün nähili gündigini duýanam dälsiň, şonuň üçin muny hatyň üsti bilen saňa ýetireýin. Meniň bir uýam bar. Ilki bilen onuň nejisje taraplaryny sanap geçeýin. Ýogsa birdenem bu hat onuň eline düşüp olam okaýsa men özüni reklama edendirin öýdüp gaharlanar.))  Ol kesirjelikde, ýanbermezlikde, kä bir ýerde tekepbirlikde, kä bir ýerde bolsa “ gaharjaňlykda” agynjak meň özüm-dä.)) Ilki ilkiler-ä ony öýkekek tutýan ekeni, öýkelek ýanyňa golaýladygam öýkelemän bolýarmy näme?! Öýkeleseňem hokman aglaýmaly, bu biz zenanlaryň iň bir artykmaç üstünligumiz ahyryn, onsoň şeýle günleň birinde oňa söýgülisi: - maňa aglak gurjak gerek däl..! - diýipdir. Olam: - a maňa bolsa şol gurjagy diňderen gerek- diýip çürt kesik şert goýupdyr. Söýgülisi bolsa: --maňa nesihatçy dana gerek däl..!- diýip öz akylynyň ýetikdigi bilen öwünipdir. Ahyr soňy uýajygym dagy nätsin, beýik dananyň häsiýetine öwrenişibermeli bolupdyr. Şeýdip ýuwaş – ýuwaş öýkelek meň uýamy terk edipdir.) Men ony gowy görýän.  Esasanam dünýägaraýşyna, pikirlerine hormatym uly. Çünki onuň gözlegi gowulyk, agtarýany hakykat. Ol dünýäni gabahatlykdan düzetmegiň hyýalynda. Adamzadyň gözgyny ahwalyna perýat edip içki galagoplygyny, bütinadamzat aladasy bilen ahyrýetde azabyň bardygyny, düzelmegiň wagtydygyny ýürejiginden syzdyryp dostlaryna, azaşana çyrag bolmaga taýyn. Ynsanlara hakykatçyl bolsaň bir nurana belentlikde ajaýyp menziliň bardygyny düşündirmegiň yşgynda. Bilýärmiň näme dostum! Ýene-de ol bir öýjagaza baryp görmegiň arzuwynda. Şol öýjagaz hyýalymy ýa durmuşda bar öýjagazmy ony bilmekligiň zerurlygy ýok bolsa-da bir zat aýan – ol öýjagaz örän we örän syrly görünýär oňa. Men her gezek ol öýjagaz hakda pikir edem-de “şol Öýjagaz uýamyň ynanyşy ýaly ajaýyp çyksyn, in Şa Allah” diýip dileg edýärin. Ol şol öýjagazyň yşgynda gumak ýollary yzarlap, saýhally serwileriň deňinden, dyz boýy otlaryň içinden geçip Toksanynyň säherlerine gadam goýdy.  Onsoň ol käteler şeýle bir dymýar, şeýle bir dymýar.. ol dymdyşlykda gaýnap duran wulkanyň ýarylaýmak howpy bar. Adam dymýan wagty oňa artykmaç zat geregem däldir, oňa azajyk mähir, üns alada gerekdir, gerek wagty berilmedik üns gerekmejek wagty etmek hökman däl ahyr.. başga bir älemde bolsa günädir sogaplar ölçenjekdigini dymmak arkaly hem eşitdirip bilýär. bir gün bolsa ol: “Gözüňi ýum, ýene aç, şeýtde özüňe, barlyga akyl ýetir” diýip barlyga gelmekde, maksada ýetmekde, dogry ýoluň salgysyny karta çyzan ýaly aýdyň hiňlendi. Hawa, Dostum! Onuň filasofiki pikirleri çuňňur, öwrenilmäge mynasyp. Ýüzleý seredip oňa düşünmek kyn. Ýüzleý seredip onuň poeziýa çuňlugyna akyl ýetirmek mümkin däl. Ol duranja bir hazyna!Bu gün şol uýamyñ doglan güni Goý onuň ylham aty büdremesin, durmuş, ykbal ony hiç ynjytmasyn! Uýamyň täsin dünýäsi hakda aýdara zat köp.  Ýöne men seni ýadatmazlyk maksadym bilen bu haty şu ýerinde jemläýin. Saňa-da dünýäniň ähli gowulyklaryny arzuwlaýaryn. Hatymyň jogabyna sabyrsyzlyk bilen garaşýaryn, Mähriban dostum! @ Nurdan | |
|
| |
| Ähli teswirler: 33 | |
1
0
| |
