TUMAR GÖRDÜM

Hakykat depderin açdym,
Bir ýazylan tumar gördüm.
Bu ýurtdan ol ýurda göçdüm,
Ýurduny ygtybar gördüm.

Bir öýde bar on iki han,
Hoş gelipsiz,eziz myhman,
Bir suprada dört yssy nan,
Üstünde ýedi nar gördüm.

Mustapaga indi warak,
Müñkür bolan-dinden yrak,
Bir öýde bar on iki çyrag,
Dört maşal, bir ýanar gördüm.

Bu dünýäniñ gyragynda,
Şejerler bitmiş bagynda,
Bäş amal bar pudagynda,
Asylmyş,berkarar gördüm.

Magtymguly,ne pikriñ bar,
Ötdi ömrüñ,kyl ruzygär,
Ýetmiş iki süri dowar,
Çopany bir bakar gördüm.

© Magtymguly PYRAGY.