21:49 Söhbet ýagşydyr | |
| SÖHBET ÝAGŞYDYR Adam bolsaň, gulak goýgul öwüde, Alymlar ýanynda söhbet ýagşydyr. Atarman-çaparman algyr ýigide, Ýeri gelse aman-nurbat ýagşydyr. Hemra bolup oturmagyl pis bile, Poha degseň, beýniň dolar ys bile, Göwher daşyn ýüzük etseň mis bile, Gymmaty egsilmez, hormat ýagşydyr. Zynhar, kast etmegil iýdigiň nana, Köňlüň haýra bagla, sydkyň – imana, Hiç azar bermegil bir musulmana, Ogry ärden, bir dogry it ýagşydyr. Käşki adam bu dünýäge gelmese, Gelenden soň ömür sürse – ölmese, Elden gelen ýagşy işiň bolmasa, Köňül içre ýagşy niýet ýagşydyr. Magtymguly, niçik geçse rozygär, Haka şükr et, barma namarda zynhar, Ýok döwletden ýegdir, bolsa bir hünär, Müň hünärden zerre döwlet ýagşydyr. © Magtymguly PYRAGY | |
|
| |
| Ähli teswirler: 1 | |
|
| |
