11:04 Arzyly myhman... | |
 ...Bu wagt onuň iş-aladasy ýetikdi. Saryýagyz gyz üç aýlap özüne gerek boljak goş-golamlaryny ýygnamagyň ugruna çykdy. Ine, dagdan agajyndan ýasalan daragy. Uzyn sary saçlaryny höwes bilen daraýan daragyny almasa bolmaz. Alyp, daragy goşhaltasyna aldy. Bu-da altynsow reňkli saýawany. Bulutlaryň özüni görüp, begenjinden aglajaklary ýadyna düşende, ýylgyrdy. Özüni begenç gözýaşlaryna ezmekden goramaly saýawany emaý bilen goşlarynyň arasyna ýerleşdirdi. Kitap, kitaplar...«Ol kämilligiň nusgasy dälmi nä? Kitapsyz onuň kämilligi yza gaýtmazmy?!» Şeý diýip, içini gepledip ýörşüne gyz gujagyny barlyk bilen ýoklugyň manysyny düşündirýän pelsepeli eserlerden, süýji gussa ýugrulan, her setirinden topragyň, ýapragyň ysy gelip duran goşguly kitaplardan doldurdy. Onýança otagyň çüňkünde duran gelşikli sübsesine göz düşdi. «Alsammy, almasammy?» Ýük bolmazlygy üçin ilki almazlyga göwün bölenem bosa, birden ýerde çaşyp ýatan sary ýapraklar göz öňüne gelende sübsesini alanyny kem görmedi. Wagtla-wagtal tebigata-da serenjam bermek gerek. Tebigat diýende ýadyna düşdi, hany, onuň pagta ýyganda dakynýan akja öňlügi? Ol dessine otargyň burçunda duran haşamly sandygyny açdy-da, onuň içinden eplengi akja öňlügini aldy. Nesip bolsa, bu ýyl hem bereketli gelip, akja öňlügi ençeme gezek pamyk ýaly pagtadan dolar. Gulagyna aýdym aýdyp, pagta ýagýan gyzlaryň mylaýym sesleri eşidildi. Indi ol günlerem uzakda däl. Wiý, ýogsa-da ol hasyl baýramynda geýer ýaly gyzgylt-goňras mahmal köýnek hem tikinipdi dälmi? Sandyga gelşik berip ýatan mahmal köýnegi ýüzüne tutup, aýna bakanda Gün otagyň içinde dogan ýaly bolaýdy. Saçyny bezemäge mahmal köýnegi bilen sazlaşjak bugdaý hoşalarynyň şekilindäki şaýlary saýlady. Ähli zatlaryny jemläp, uludan bir dem aldy. Indi ýola düşmek üçin geýniberse-de boljak.... Iň gowy görýän zer nagyşly sary köýnegini geýip, uzyn sary saçlaryny birenaýy edip bogan bu gyz ýola çykanda durmuş öňki aýdyp duran aýdymyny kesdi-de, täze heňde, has mylaýym aýdyma başlady. Bu bolşa Gün nuruna meýmiräp oturan tebigat geňirgendi, gözlerini giňden açyp, töwerege ser saldy. Gözleri uly ýol bilen sülmüräp gelýän saryýagyz gyza kaklyşdy. «Ahyrsoňy gelýär!» diýip, içini gepletdi-de, uludan bir demini aldy. Tebigatyň uludan alan demi ýaşyl şemala öwrülip, baglaryň başyny yrady. Aýlanyp-aýlanyp, tans etdi. Ony-da az görýän ýaly, garagolluga salyp, bardy-da saryýagyz gyzyň negözel boglan saçlaryny çözläp goýberdi. Ýaýylyp giden uzyn saçlaryň reňki tutuş dünýäni sarylyga boýady. Bary-ýogy bir sekuntda bolup geçen ýagdaýy görmek däl-de, duýmak mümkindi. Şonuň üçin, öz işi bilen iki-ýana ibirt-de-zibirt gatnap ýören adamlaryň köpüsi muňa üns bermedi. Ýöne bu täsin ahwal, penjiresiniň ýüpek perdesini çala galdyryp, daşaryny synlaýan şahyryň gözünden welin sypmady. Ol begenjine «Güýz geldi» diýip pyşyrdady-da, onuň bilen salamlaşmak üçin ylgap daşaryk çykdy... © Aýgül GARAÝEWA | |
|
| |
| Ähli teswirler: 3 | |
|
| |
