20:51 EZIZGELDI HELLENOWYIŇ ÝUBILEÝINE | |
| EZIZGELDI HELLENOWYIŇ ÝUBILEÝINE Lukmanlaň arasynda ol şahyr, Şahyrlaň arasynda ol lukman. Bu tapmaçaň jogabyn tapman, Onuň gözlegine çykdym men ahyr. “Watan” sözün “iňňäden” öň öwrendik, Entek düwünçekdekäk—inmänkäk dünýä. Soňra bu söýgini süýt bilen emdik, Mährem gujagynda ummasyz dünýäň. Enemiziň hüwdüsinden ganmankak, Atamyzyň dana pendi oýardy. Ýörjen-ýörjen bolup, aýaklanmak, Watan gapysyny açan şolardy. Sen goçaldyň Hojaýabyň goýnunda, Onuň suwun içip, güzerne düşüp, Men ulaldym Hakyl ýabyň boýunda, Hem güzerne düşüp, hem suwun içip. Çagalykdan saýlandyk, ýetdik on alta, Şoňa çenli näzirgedik aýnadyk. Suwun içdik, suwa düşdük Murgaba, Garagumyň sährasynda gaýnadyk. Ýigit çykdyk. Ikimiz hem bihabar: Murgap derýaň gözbaşdygyn ýaplaryň. Şol ýaplarda döredipdir bir mahal, Hydyr Derýa, Gowşut Şamy baplaryn. Rowaýat bar: Etrek derýaň suwundan, Bir goşawuç guýanmyşlar Murgaba. Şol goşawuç köpelip iň soňunda, Bir damjadan ýetenmişin her ýaba. Ýabyň suwun içip ulalsagam biz, Magtymguly Hakdan içen şahyrdyr. Dost, bu hakykaty unutman hergiz, Ol şahyrlaň başy hem-de ahyrdyr. Pyragyň şygryna ýugrylyp ynsan, Ulaldykça adam bolup ýetişýär. Şol adamdan döreýär lukman, daýhan, Alym döräp, açýar täze açyşlar. II Kümüş sepelände kyrkdan soň saçyň, Adyň “ýaşulydyr” ýa “pylan aga”. Bu lakama ilki gyzsa-da çetiň, Ýuwaş-ýuwaş kaýyl bolýaň şol ada. Bir gün 50 gelip, egniňe kakyp: “Agam, ýagdaý niçik? Garran dälsiň-ä?! Hyýalyň bardyr-a söýmäge agtyk, Ýarpy ýolda durmarsyň-a dänjiräp?!” Jogap bersiň, gaýşaryp hem bälçiräp: —Elliň näme?! “Myş-mişlerden” habar ber, Segsenem entek bize däldir çäk, Göroglynyň ýüz ýigrimsin alar men. Dostum berlen ömri eziziň bilen, Haýyrly ýaşap, abraý gazan! Siziň ýüz ýaşanňyz göräýsem birden, Atararsyň her ýaşyňa bir gazan! Dostum, degişmämde bardyr bir many: Biribara bardyr şu dileglerim: Nesip etgeý abraý bilen imany, Nur saçsyn nesliňe çaga ýüregiň! Kakajan Balkanow Iýul 2023 ý. | |
|
| |
| Ähli teswirler: 1 | |
|
| |
