14:57 "Ykbalymda düşlän ynsan" oýlanmalar toplumyndan | |
"YKBALYMDA DÜŞLÄN YNSAN"  Oýlanmalar toplumyndan Asyl meň maksadymy sorasaň-a, seni seniň islegiň üçin unutmaga çalyşýandan men. Ýöne bolaýanok. Ýogsa käteler ýoluň aňry ýanyndan ýöräp barýan çagyň seni görmezlige salybam görýän. Pete-pete gabat gelen wagtymyz, özümden öňürdip pikir ýa-da söz gataýsaň, eşitmedige meňzäbem görýän. Uzaga gitmäýin. Ine, şu günjük hem okuwa barýarkam, seniň awtobusa münüp, gabat garşymda duranyňy tä duralgada düşüp gabatlaşýançak bilmedikden boldum. Ýogsam, şol awtobusyň içinde men bardym. Bahanam hem gözümiň görşüniň biraz ugrunyň ýoklugy. Äýnek dakynýanyma we daş aralykdan bulaşygrak görýänime esaslansam-a, özümi aklabam bilerdim. Wahh-h, emma bu ýagdaýlaryň peýdasy ýok. Başarmajagyma tutsam, nätsemem başarmaýanymy boýnuma alýan käteler. Seni unutmagy başarmaýan, has anyg-a başarmagy islemeýän kişiden bolup ýaşanymy welin aýdaýyn saňa. Gözümi ýumamda-da, soňsuz älem mysaly yş ýok garaňkylykda-da seni görýänimem aýdaýyn. Onsoň nädip unutmaly men. Ýok, unutmaly diýmäýin-le, nädip unutmaga çalyşmaly. Ýolda-yzda saňa gabat gelýänime dünýäniň bagtyny bir ýana goýup begenýänimi, sosial saýtlarda tanyşlaryň bilen paýlaşýan wakajyklaryň içinden maňa degişlisini gözläp, öz ýanymdan unutmagy islemän ýatlamagy dowam edýänimi bilmeli, oýlanyp ölçermeli sen. Özüm-ä özüm welin, görüp otursaň senem meni unutmagy başarmarsyň ýöne. Birhili şeýle boljagyny ýüregim syzyp dur hemişe. Içgin synlasana käbir zatlary. Biziň göwünlerimiziň göwündeşligi bar ýaly dälmi näme?! Özümi şuny duýup ýaşaýan hökmünde duýýan. Başarsaň-a senem şeýt. Bolmanda meniň üçin synanyş. Ahyrynda başarmasaňam, göwnüm galmaz senden. Birnäçe aý mundan ozal seni unutmagy başaranymy göz öňüme getirip, şol pursady hyýalymda aýlap bir goşgy ýazdym. Okamagyň üçin saňa-da ýollapdym. Belki... Ýöne häli-häzirem şol goşgymy okap birhili darygýan. Seni büs-bütin unutmagyň nähili agyrdygyny ýazyp bilenime geňem galýan. Goşgy ýazamdaky ahwalym-a aýdybam durjak däl. Edil şu ýagdaýyň bolmazlygyny isläp, saňa ýene-de bir gezek iberýän şol şygrymy. Okap gör, megerem, senem bu islegiňi goýbolsun edersiň. Sen meň goşgy ýazýanymy, Kä çyzyp, kä pozýanymy, Derdimi sözleň üstüne, Atyp, käte oňýanymy. Hem ýüregmiň damaryny, Galam edip ýonýanymy. Soňam boşap-boşap, göýä Heýkel bolup doňýanymy. Essimden gidip bir zaman, Gury sana dönýänimi, Synla, geň görmän. Dünýäň ol ujun gören dek, Çar ýanym bekleýänimi. Seň adyňy salyp şygra, Kalbyma sepleýänimi. Şeýdip, şol duýgyň güýjünden, Gün geçip, hepdelänini. Onsoň ýene galam-kagyz, Men bolup gepleýänini. Sözlermiň, pikirlerimiň, Aýtman garradan yşgymyň, Bu gün seň başyňa düşüp, Men bolup gitmeýänini, Synlaryn, geň görmän. Şeýdip, ýyllar öýkelänsoň, Duşsak köçede ýa bagda, Dilmiň diýen etmänini. Söýgi, umyt, özüm hakda, Ýeke sözem atmanyny. Seňem bir ýygryp egniňi, Çytyp sarygylt gaşyňy, Görmän bolup bakmanyňy. (Hem şu wagt ýeke ýalňyşyň, Içimizi ýakýanyny). Berç tutup giden ahmyryň, Gözümizden akýanyny, Gizläp gidip barýanmyzy, Geň görüp synlaýar iller... © Gurbanmyrat SARYÝEW | |
|
| |
| Ähli teswirler: 3 | |
|
| |
