04:57 Bulutly oýlar | |
 BULUTLY OÝLAR (Ýüzugra edilen bellikler) Asmanda täsin bulutlar bar. Aňrynyň işigine meňzeýär. Özem açylan işige. «Gel-de, geçiber» diýýän ýaly. Ýa aňrydan bärligine geçýärlermikä şu pursat? Gözüňi süzgekledip seretseň, bir alamatlaryň görnäýmegem mümkin. Ony hökman gözümiziň ýetýän, gurşap alýan çygryndaky kiçijek bir zat hökmünde göz öňüne getirmek hökman däldir… Biz endik edipdiris, hemme zat göz dürbimiziň tegelegine ýerleşmeli diýip. Belki-de, biziň ýokarymyza garanymyzda görýän ähli zadymyz ümmülmez giňişligiň bir kindiwanja öýjügidir?! Ähtimal, Arşdakynyň oturan kürsüsiniň bir aýagynyň aşak düýbüdir?! Näme üçin şeýle bolmasyn?! Bolup biläýjek zat şu… Edil häzir şu pikirlere gümra bolup, olary depderime geçirip otyryn welin, pikirimiň okyjysy: «Gündogaryňa bir seret, şu wagt ýöräp barýan welin...» diýip jaň etdi. Men ýap-ýaňy şol şekilleri surata düşürendigimi aýtdym. Penjirämi açyp, ýene bir gezek üýtgeşik buludy surata düşürdim. Ony bir görsediňiz! Onuň şol Kürsiniň bize görünýän ýeke aýagynyň astyndaky täsin nagyşlaryň bir ülüşjigidigine sizem ynanardyňyz, meger! Men öz fantaziýamy size dakjak bolýan öýdýän. Beýle bolsa, bagyşlaň, belki, seniň ýokaryňa garamaga wagtyňam, höwesiňem ýokdur. Hökür bolan boýnuň ýerden göterilmeýän bolmagy-da ähtimaldyr. Mümkin, büdremejek bolup, etek alty-ýeň ýedi halda haýdap barýansyň... Çörek almaga barýan bolmagyň hem mümkindir. «Bulutlardan garnyň doýýarmy?» diýip käýinmegiňem ahmal, bir säw bilen bu ýazgymy okasaň. Onda-da aram-aram bak ýokaryňa, gaýrat et! Beýle pursady sypdyrma... Şu günler-ä ol meniň surata düşürýänimi bilýärmi, nämemi. Her tüýsli bolup görýär... Aňalyp galýan. Agzymam açylýan bolsa gerek. Gözüm bilen birlikde göwnümem doýýar… Ony äpet bir batbörege meňzetsemmikäm?! Eý-ho, bu bulutlary... Ýa bu ýylyň iň gysga gününi özboluşly uzaltmak üçin görkezilýän ylahy sahnamyka? Ýa kakamyň 89 ýaşynyň dolmagyna asmanyň peşgeşimikä? Ýa kakamyň özümikä?.. © Orazmyrat MYRADOW | |
|
| |
| Ähli teswirler: 1 | |
|
| |
