16:38 "Ýagyş ýagýar ýere däl-de ýüregime.." | |
 ÝAGYŞ ÝAGÝAR Ýagyş ýagýar, Uçmah ysly damjalar Ýagýan ýaly ýere däl-de ýüregme. Bilmen, hyýallarym barýar hanjaga, «Köne ýazgylary» goýup deregne. Ýag, gussaň melhemi, yşkyň hemdemi, Poslan göwünleri päklige ýetir. Senden – umyt, Razy, galsa mendenem, Ýaşaýşy beýgeltjek ýekeje setir. Tebigat asylky keşbine girse, Duýgular düýpgöter barýar özgerip. Adam ýaşamaly giçde ýa irde Erkini olaryň eline berip. Şol gün Şol günem şeýle bir ýagyş ýagypdy, Öňküler ýaly däl, bardy geň haly. Hamana şondan soň gaýdyp hiç mahal Dolanmajak ýaly, ýagmajak ýaly... Bu ahwaly nämüçindir aňmadyň, Ýa-da ony kabul etdiň adaty. Bilýän, ýüregiňem päk dünýäň ýaly, Juda sadady. Şonda gollarmyzy uzadyp göge, Bagra basdyk berekedin semanyň. Seni derde goýsa, ezilen saçlam, Meni bolsa oda atdy jemalyň. Sendiň tüm gijeler gözlän yşygym, Gündizimi Güne çoýan gözellik. Keşbiň göýä arşdan serpaý mysaly, Ýagyşda däl, asyl sendedi geňlik! Ýene ýagyş ýagýar şol günki ýaly, Gözler ýene gök asmana garaýa. Bu ýagyşlar, däli-porhan ýagyşlar, Gör, häzir kimleriň bagtyna ýagýa?! Ýag, ýagyş, garaşdym kän ýetmek üçin, Ýag, bu gezek bagty gülletmek üçin! Ýagyş Bir näbelli howsalasy bar ýaly, Indi ençe gündir ýagýar ol diňmän. Ýa derde sataşdy, Ýa-da ýüregne Yşkdan uçgun düşdi gözi deý iňňäň. Ýagyş ýagýar suw-sil edip ýollary, Kimleň şähdi açyk, kimler darykýar. Näçe adam öýlerine howluksa, Ýene-de şonçasy daşaryk çykýar. Her kimiň kalbynda çäksiz tolgunma, Hoş sözler aýdylýar, ötülýär hata. Saýawanly gyzjagazny göterip, Han-ha gidip barýar nowjuwan ata. Jemläp bir damjada müňlerçe syry Ýagyş bagt paýlaýar töwerek-daşa. Häzir bir-biregi küýsän aşyklaň Duşuşygy has lezzetli, başgaça. Ýagýar hetden aşyp, Sygman adata, Bu howsala ýönekeý däl, kiçeň däl. Mazaly ezilen baglar Gün çyksa, Ýagşyň hikmetini dünýä güjeňlär. «Ýagyş ýagýar ýere däl-de ýüregime» atly goşgular toplumyndan © Gurbanjemal ANNAKOWA | |
|
| |
| Ähli teswirler: 0 | |