19:46 Yhlasym bar haç togabyn etmäge (esse) | |
| Yhlasym bar haç togabyn etmäge (esse) Käbä barsaň, Haka sydkyň baglagaý, Özüňe däl, il agysyn aglagaý Pir Mäne baba. Ýene sanlyja günden üç ýüze golaý ildeşlerimiz haç parzyny berjaý kylmak niýeti bilen keramatly Mekge-Medinä ugrarlar. Bu mukaddes däp Türkmenistanyň Halk Maslahatynyň Başlygy, türkmen halkynyň Milli Lideri, Gahryman Arkadagymyzyň howandarlygynda we Hormatly Prezidentimiz, Arkadagly Gahryman Serdarymyzyň ýolbaşçylygynda ýyldan-ýyla yzygiderli dowam edip gelýär. Goý, olary we olaryň maşgalalaryny Beýik Taňry Öz penasynda saklap, beladan-beterden gorap, hak we ak ýoldan ýöredip, ýagşy niýetli arzuwlaryny hasyllap, il-ýurdumyz, eziz türkmen halkymyz üçin bähbitli tutan işlerinde üstünlikler gazansynlar! Goý, bu däp-dessur mähriban türkmen halkymyzyň aňyna ornap, nesillerden-nesillere örňäp gitsin we dowamat dowam bolsun! Kommunistleriň ateistik duýgylarynyň möwç alýan döwründe, SSSR ýurdunyň bir künjegi bolan obamyzdan, elli ýaşlaryndaky T. aga Mekgä gidýärmişin gürrüňi biz düşnüksiz biperwaýlyk duýgusy bilen kabul edipdik. Biz-ä o wagt oglantak diýeliň, ýöne, köpi gören ýaşulylaram: —T. keramatly ýurda näme maksat bilen gitjek-kä? —Ol heniz namaz okamanam-a öwrenenok, haç togabyny nädip ýerine ýetirjek-kä? —Ata-babalarmyz: “Haýyr işi goýsaň şere döner, şer işi goýsaň – haýra” diýipdirler. Belki, T. Käbä ýagşy niýet bilen gidip barýandyr, haýyr işi Hudaýam goldarmyş. T.-nyň açjak gapylary elmydama açyk bolaýady, olaryň haýry bize we nesilermize-de nepi degäýedi —Hawa-la, rast aýdýaň. Nakyl bar: “Haýyr dile goňşyňa, rysgal gelsin aşyňa” — diýişip, ýagşy dileg edipdiler. T. zyýaratdan sag-aman gaýdyp geldi. Ol gelende ýany bilen şol döwürde gyt we ýoň bolan gyz-gelinler üçin köýneklik zerli matalaryň dürli görnüşlerini getiripdi. Obaň ulugyzlary sähel yşyga ýalpyldaýan zerli köýneklerini modadan gaçýança geýipdiler. Biz soň-soňlar, uly adam bolup ýetişenimizden soň düşünip galdyk: T.-nyň zyýarata däl-de, syýahata gidenine. Bu wakany bolsa, ýene, SSSR döwletiniň “aç-açanlyk”, “täzeden gurup, döretmek” haý-haýly syýasytyny ýöredýärkä, Leningradyň (häzir Sankt-Peterburg, Rossiýa Federasiýasy) din edaralarynyň birinde işlän ildeşimiz gürrüň beripdi. Ol ilki bilen, Beýik Watançylyk urşunyň weterany, kakasyna haja gitmekligi teklip edipdir. Ýaşuly oglunyň maslahatyna şübheli garap: —Ýak, Gurban jan, sen henizem adamlar bilen henekli gürleşmäni goýmansyň-ow. Men nire, Mekge-Medine nire. —Kaka, çypbakaý-çynym... —Kül üstünde oturyp, göwnüňi bolsa Kap dagynda aýlap ýörsüň. Leningradlylaryň Türkmenistan respublikasynyň nirededigini bir bilýälermikä?! Kommunistler döwründe türkmenlerden haja gidenini henize-bu güne çenli men-ä eşidemok. Sen wezipeli bolaňda-da, bu iş saňa başartmazmyka öýdýän. —Kaka, bir adamy haja ibermäge ygtyýarym ýetýär. —Ýeri, bolýar. Sylag-hormatyň üçin sag bol, oglum. Meniň indi alys ýurtlara gitmäge gurbatym çatmaz. Eger, hakykatdanam, diýeniň ýöreýän bolsa, obamyzyň mollasy Täçmuhammede aýdyp göräý, ol maňa görä has ýaş hem gujurly. Täçmuhammet haja taýynlyk görüp ýörşüne, kiçijik haltajyk tikdirip içine türkmen topragyndan iki gysym salyp, Mekgäň topragyna ýarsyny, Medinäň topragyna-da ýarsyny sepipdir. Sepip durka: “Essalawmaleýkim, şan-şöhratly beýik arap ýurdy! Men size Türkmenistan ýurdundan we eziz halkymyň adyndan salam getirdim! Goý, bu toprak biziň dost-doganlygymyzyň nyşany bolsun!” diýipdir, gaýdyşyn bolsa haltajygyna arap topragyny salyp gaýdypdyr. Türkmenistan Garaşsyzlygyny alandan soň Gurban aga-da haja gidip geldi. Gurban aga hem edil Täçmuhammet hajynyň edişi ýaly, gidende ýany bilen türkmen topragyny alypdyr we arap topragyna sepip durka şu sözleri aýdypdyr: “Türkmen halkynyň adyndan köp dogaý salam! Essalawmaleýkim, Yslamyň ýüregi—mukaddes şäherim, Mekge! Essalawmaleýkim, älem musulmanlarynyň göz-guwanjy, keramatly şäherim Medine! Essalawmaleýkim, on sekiz müň älemeiň serweri, külli mömin-musulmanlaryň howandary we ynanjy Rasulallahy salallowhy we selem! Men size Bureýdalaryň, Hoja Ýusup Hemedanynyň, Nejmeddin Kubranyň, pir Mäne babanyň, Aşyk Aýdyň piriň, Zül Kifil babanyň, Ärsary babanyň, Arçman atanyň, Gözli atanyň, şyh Mansuryň öwülýälerinden, üç ýüz altmyş öwülýälerden; şöhrat-şanly taryhly Oguz hanyň, Gorkut atanyň, Göroglynyň, Togrul begiň, Çagryl begiň, Mälik şanyň, Soltan Sanjaryň, Keýmir körüň ilinden; Gahryman Arkadagyň, ýurdundan, beýik türkmen halkynyň adyndan salam getirdim!” diýip, tagzym edipdir. Gurban hajy hem haltajygyny Arabystan ýarym adasynyň topragyndan dolduryp getirip, Watanynyň bereketli topragyna seçipdir. Rowaýat bar ki: Beýtulmukaddese we Medinä dört aýlyk düýeli gidilýän döwürlerde, ulamalaryň biri haja barýanlara ýüzlenenip: —Adamlar, ýoluňyz ak bolsun, ýoldaşyňyz—Hak! Haýyr-sahawatly ýörişe ugramakaňyz size soragym bar: Mekge-Medinä zyýarata sizi kim çagyrýar? Bu sowala jogap berseňizem bolar, bermeseňizem—öz ygtyýaryňyzdadyr, onuň jogaby siziň her biriňiziň kalbyňyzda ýazylgydyr. Hergiz ýadyňyzda bolsun: beýik Biribar haç togabyňyz bilen birlikde niýetleriňizi hem kabul edýändir, ýagşy niýetli boluň adamlar! Haç parzyňyzy berjaý edip, sag-aman ýurduňyza dolanyň, Alla sizi gidişin-gaýdyşyn Öz penasynda saklap, gorasyn! Ol ulamanyň syrly soragynyň jogaby ynha şeýle bolmaly: birinjiden, haç togabyn bitirmäge Allatagalanyň Özi çagyrar; ikinjiden—öz nebsiň; üçünjiden bolsa, şeýtanyň hem çagyrmagy ähtimal ekeni. Haç parzyny bitirmek niýeti bilen mukaddes Mekge-Medinä ugraýan ildeşlerimizi goý, beýik Biribar beladan-beterden, howpdan-hatardan, şeýtanyň alyndan gorap, Öz penasynda saklap, hak we ak ýoldan ýöredip, maksat-myratlaryna, köňülde beslän ýagşy niýetli arzuwlaryna ýetmäge ýardam bersin! Olaryň ýurt parahatçylygyny, maşgala agzybirligini, yrsgally-döwletli, bereketli, bagtyýar durmuşyň we bagtly geljegimizi arzuw eden dileglerini Allatagala Öz dergähinde kabul eýlesin! Sag-aman Watanyna dolanyp gelsinler, maşgalalaryna gowuşynalar! Omyn! © Kakajan Balkanow Iýun 2024 ý. | |
|
| |
| Ähli teswirler: 10 | |
0
0
| |
