16:48 Men eşek | |
MEN EŞEK  Men Eşek. Hyzmatkär. Ejemem, kakakam, barymyz hyzmatkär. Ýöne, gadym döwürlerde ata-babalarymyz sährada erkin ýaşaýan ekenler. Maňlaýymyza ýazylanydyr-da, öýdeçilleşdirilipdiris. Adamlar tarapyndan. Ýöne, ine gulan garyndaşlar erkini elinden bermediler, öýdekileşmänjik geçdiler. Ýogsam adamlar iş edindiler. Bary boşuna boldy. Biz bolsa 5000 ýyl bäri eýämiziň hyzmatynda. Bilişime görä, aslymyz Afrika direýär. Ol ýeriň ynsanlarynyňam maňlaýyna ýazylanydyr-da… olaram hyzmatkärleşdirilipdir. Ak adamlar tarapyndan… Adamyň adama edýänini eşideňsoň, kysmatyňa kaýyl bolmakdan gowusy ýok ýaly (ýöne, ýene-de sähraň erkin gulanlaryna gözüm gidýär). Kürrejikkäm bary ýogy dokuz aý ene süýdini emdim. Iki gezek doglan gün bellämsoň “indi sen ullakan eşek bolduň” diýip ýuwaş-ýuwaş iş buýrmaga başladylar. Üçünji doglan günümden soň arkama eýer okladylar. Eýerim gutly bolsun, ömrümiň soňuna çenli! Geçen ýyl garyndaşlardan bir ýaşuly ýogaldy, pahyr 15 ýyl ýaşady diýdiler. Bu ýaş her eşege nesibem edenokmyş. Ýöne, eşekleriň gowy ýaşaýan ýurtlarynda olar azyndan 30, köpündenem 50 dagy ýaşaýamyşlar. Bize sesimiz gaty diýýäler. Hawa, çynymyzy edip gygyrsak (siziň aýdyşyňyz ýaly aňňyrsak) sesimizi üç kilomertdäki eşege-de eştdirip bilýäs. Olaram eşidýär. Ol uzyn gulaklar keýpinedir öýdýäňmi? Şeýdip biz eşekler özara derdinişýäs. Kä wagt goranmalam bolýar. Nädip? Dişläp ýa-da art aýagymyz bilen depip. Kynam bolsa iýmsiz, suwsyz, otsuz, samansyz çydap bilýäs, emma çygy welin bolamyzok, esasanam gyşda. Ýatagymyz ýyly bolmasa bolman geçsin, ýöne gury bir bolawersin. Bize kejir haýwan diýýäler. Ýöne, kejir bolmasaň ýaşaýşymyza çydar ýalam däl. Götermejek ýükümizi üstümize ýükleseler, ýa-da iş bilen halys surnukdyrsalar, kejirlik edip gaýtawul bermekden başga näme galýar? Özüňi goramak kejirlik däl, adam eşeklik etse bizem eşekligimizi görkezýäs. Adam adam bolanda bizem adam ýaly bolýas. Umuman, adamyň gowusy bolmagam, eşegiň gowusy bolmagam aňsat däl... Ýeri, bolýa. Anekdot bilen tamamlaýyn. Žiraf bilen Eşegi sud edipdirler. Žirafy gören işine boýnuny sokýanlygy üçin, Eşegem kejirligi üçin. Ýöne, yz ýany häkimiýet üýtgeýär-de olaryň işine täzeden seredilýär. Indi Žirafa öňdengörüjiligi üçin, Eşege-de prinsiplerinde berk duranlygy üçin minnetdarlyk bildirýärler. Ýeri, bolýadan soňky Ýeri bolýa: Sizi Mark Şagalyň (näme üçin oňa Şagal diýipdirler, bilemok) eşekli suratlaryny synlamaga çagyrýan. “Ýaşyl eşek”  “Skripkaçy, masgarabaz we gyzyl eşek”  “Gök eşek”  “Aýal we eşek”  “Eşek we it (Lafonten basnýasy)”  © mango. 2022 | |
|
| |
| Ähli teswirler: 2 | |
1
0
| |
