11:13 Oýunjak bolma, oýanjak bol! | |
 OÝUNJAK BOLMA, OÝANJAK BOL! Ýene özüme sowal berýän: «Näme üçin düýşler ýadymda galanokka?». Ähtimal, özümiziň uly bir düýşüň içindeligimiz sebäplidir?! Düýşdäki düýş unudylgyç bolýandyr, mümkin?! Aslynda, düýşmükä beri şu? Labirintden çykalga agtaryp ýörene meňzeýän bolaýmasa halymyz daşyndan gören göz üçin?! Biziň bu ahwalymyza tomaşa edip duran ýiti nazaryň barlygyna-ha şek-şübhe ýok. Käbir hereketlerimiz bolsa özüne tomaşa edýänlere görünjek bolup, göterilýän, gomalýan, bolmajysy bolýan çagajygyň hereketleri ýaly bolsa gerek. Körpe çaga-da töwerekdäkiler gop berse, şol bir hereketini zol-zol gaýtalap, uly bir, hil bir iş edýän ýaly bolýar. Käte öz eden işine özi gülýär, paşmasa, aglaýýaram käte. Ýene köşeşdirýän oňa syn edip oturan ulular bolýar... Käte menem ýokaryma seredip, Uludan goldawa garaşýan. Sebäbi Onuň ýanynda biziň çagadanam ejiz bolmagymyz mümkin. Emma çagadan tapawutlylykda, gözüm bilen gögi deşäýjek bolsam-da, bir nokada bakmakdan gözüm ýaşaryp, nemlenip gitse-de, Oňa — Ula gözüm düşenok. Teselli sözünem eşidemok. Beýleki bir tarapdan bolsa, çagadan parhlylykda, bize görünmeýäni görmek başarnygy hem berlen bolaýmasyn?! Belki, ony göz bilen däl, akyl bilen, aň bilen görmelidir?! Ýa-da belki, başga bir syna bilen syzmalydyr?! Esasy zat, şol Ulynyň bardygyny, bakýanlygyny nähilidir bir ýol bilen aňýan-a. Ýöne bu aňyşda unudylan düýşi huşa getirjek bolup çytraşmak ýaly bir ahwal bar. Bir gün-ä bu yhlasym hasyl bolar. Ol gulply gapylaryň açaryny taparyn. Ol Uly Düýşüň açary her säher ýadyma saljak bolup çytraşýan kiçi düýşlerimde ýygşyrylandyr öýdüp çaklaýan. Her bir çaklamada-da, sähelçe-de bolsa, Haklyk bar. Şojagaz haklygyň ujuny bir uşlap bilsem, soň çöşläbermeli bolar bu çylşyrymly ýüplük ýaly düşünjeleri. Soň ýumak edip sara, ör, iş, doka — öz işiň ol. Soň näme? Ol dokaýan, örýän zadyň kimdir biriniň ýoluny germejek kerep bolaýmaz-da, hernä?! Ýa özüňi çäklendirjek kapasa?! Bolup biler. Belki-de, ol pikirlerden süýüp alnan şu setirler ýaly, düşnüksiz bir zatlar dokalar?! Okalmajak zatlaryň ýazylyşy ýaly. Belki-de, bu okalmajak däl-de, ýok bolmajak zatlardyr! Esasy zat, oýunjak däl-de, oýanjak bolmagyň özi bir haýyr ahbetin. Oýanmalam. Düýşleri huşa-da getirmeli. Gizlin açaryň haýsy künçdediginem tapmaly. Uly Düýşüň gapysynam açmaly… © Orazmyrat MYRADOW | |
|
| |
| Ähli teswirler: 5 | |
0
1
| |
