14:02 «Mart gelse men, gör, nämeler etjekdim...» | |
 *** 1 …Mart gelse men, gör, nämeler etjekdim, Porhan bolan dünýä çykyp seýrana, Gitjekdim, Ummana baryp ýetjekdim... Häzir daş menzilim — çykyp eýwana, Çümüp umman ýaly içki älemme, Müň geçen ýolumdan bir gezek ýene — Müň birinji gezek geçýän, Täleýme Bakýan müneçjimiň gözleri bilen: Bar zat öňküligne, degräm çalam-çaş, Jeňden soňky meýdan, Gargalaň toýy... Gygyrýan: nirde sen, nirde, galamdaş?! Ýa senem arzuwyň armanda goýup, Eýwandan, adamsyz haýwanat baga Bakan ýaly garap durmuň?! Görsene, Jesedi gömmegi öwredýän garga Pikirlermiň üstün açýar tersine... Gitjekdim, gep çekmän, mart gelse, seýle, Pikirlerim — labyr, çekýär aşaga. Kaýyl bolup barýan, gark bolmak meýli Maýyl edýär, Näme görjek ýaşabam?! 2 Jeňden soňky meýdan... Biçäre bedew — Pikirlem selpäp ýör süýräp ýüpüni. Arzuwlarym başsyz — bigäne beden, Kellä derek alyp dünýäň ýüküni, Kerte tarap barýar zordan sermenip, Gargalar ses goşýar gussaly saza. Eýwanyň diwary — daşky serhedim — Men seýle gitjekdim ýetäýsem ýaza... © Orazmyrat MYRADOW | |
|
| |
| Ähli teswirler: 5 | |
|
| |
