16:41 Parižli Türkmen çopany barada erteki | |
 Parižli Türkmen çopany barada erteki ýa-da nädip ol Pýer Kardene "Bäý, bäh!" diýdirdi we Makdonalsa dogramaň patentini satdy. Bir obada türkmen çopanlary ýaşaýan eken. Bir gün goňşy obada ýaşaýan agzyndan koka-kolaň ysy gitmedik fransuz çopanlary gelip, bulary Halkara „Moda“ ýaryşyna çagyrýar. Ine onsaň, türkmen çopanlary öz aralaryndan birini saýlap-seçip, ýuwup-ardyp, keýpini çag edip goňşy Pariž obasyna iberýäler. Biziň çopan baryp görse, dünýäniň her ýerinden her hili çopanlar gelipdir diýýä: biri düýe bakan arap çopan, biri doňuz bakan rus çopan, biri sugun bakan çukça çopan, biri sygyrlary guduzlan iňlis çopan, biri ördek bakan hahol çopan, aý garaz çopan kän diýýä. Ýaryş başlaýar. Ýaryşyň ýeke şerti barmyş. Iň gowy aýakgap, balak, köýnek we iň gowy telpek tikmelimiş. Bir, iki, üç-den soň her kim işe girişýär. Üç günden soň, edilen işlere baha berilmeli gün gelýämiş. Beýleki çopanlar şeýle bir owadan köwüşler, owadan, balaklardyr-köýnekler, owadan telpekler tikipdirler welin haýsy gowy saýlamak kynmyş. Sahna çykmak gezegi biziň türkmen çopana gelýär. Akgaýma tahýasyny maňlaýyna süýşüräge-de biziň çopan söze başlaýar: -Size ýollaş diýjegimem bilemok, jenap diýjegimem, geregiňizi saýlaýyň. Hawa-da, ine meniň tiken aýaga sokmam... Muňa „Çokaý“ diýýäler biziň ilde. Bu sokmaň siziň sokmalaryňyzdan nämesi gymmatly? Bakyň, munuň çep ýa-da sag taýy ýokdur. Futbola howlukýaňmy, islän taýyňy islän aýagyňa sokda gidiber. Ine-de meniň tiken balagym. Bu balagyň ady „Gyýma balak“. Gyýma balagyň iň gowy ýeri, onuň öňi we yzy ýok. Garaňkyň içinde, oýaly ukuly bir düşekden başga bir düşege gyssanmaç gaçmaly bolaňyzda ilik diýip, syrma diýip, öňümikä yzymyka diýip güýmenip durmaly däl. Islän aýagyňy islän gonjuňa sok-da eňteriber. Bu siziň moral taýdan ösen döwletleriňizde has hem amatly. (Dowamly, gürrüldili el çarpyşmalar.) Barmajygyny galdyryp, zaly köşeşdiren biziň çopan gürrüňini dowam etdirdi. -Meniň tiken köýnegimem edil şonuň ýaly. Köýnegiň adyna „Ezýaka köýnek“ diýerler biziň ýurtda.Munam islän tarapyňa geý-de gidiber. Öňüňe çorba damsa, yzyna öwür-de geýäý. Biziň çopan sözüniň arasynda: „Siziňkileňem tiken eşikleri erbet däl welin, biziňkileň deňine ýetmek üçin olara entek köp gök çaýy sowadyp, köp goýun bakmak gerek bolarlar – diýen bolýamyş. Ol ýaryşyň iň soňky bölegi, telpek barada gürrüňini şeýle dowam edýär: -Bu bolsa meniň tiken telpegim. Bu telpegiň ady „Çöwürme telpek“. Beýleki çopanlaryň tiken papak, şlýapa, kepka, silindr..... ýaly telpeklerinden tapawutlylykda, meň çöwürmäm beýleki eşiklerimiň ansamblyny bozman, öň we yz tarapy ýok görnüşde tikilendir. Gawun kelläňe isleýşiň ýaly ilte-de gidiber goýun bakmaga. Günem geçmez, sowugam geçirmez, akylam geçirmez. Bu gürrüňleri diňlän emin agzalarynyň başlygy Pýer Karden: „Bäý-bäh“ diýipdir we birinji baýragy biziň çopana beripdir. -Sag bolyň, ýollaş… jenap.. aý garaz çopanlar – diýen biziň çopanymyz, baýragyny „ýuwmak“ üçin hemme çopanlary agşam naharyna restorana çagyrypdyr. Agşam myhmanlar türkmen çopanynyň baýragyny ýuwmak üçin Eýfel başnýasynyň golaýyndaky bir restorana toplanýalar. Her kim öz ýerine geçýär-de oturyberýär. Ine-de nahar gelmäge başlaýar. Görseler çörek, täzeje et we sogandan ýasalan üýtgeşik bir nahar. Gaýtaladyp, gaýtaladyp, garaburç baryny sepip, derleşip iýýämişler beýleki çopanlar. Türkmen çopany bolsa: -Howwa, çopanlar! Bu nahar hem üýtgeşik nahardyr. Naharyň ady „Dogramadyr“. Bu nahar şeýle bir adalatly taýýarlanýar welin, patyşa üçinem, gedaý üçinem, ýönekeý myhman üçinem, gaty hormatly myhman üçinem deň düşýär. Birine etli beýlekisine etsiz guýjak gümanyň ýokdur. Alalap berip bolanok. Ine-de buňa biziň adalaty söýýän we adalatly bolup bilýän çopanlaryň nahary diýýäler – diýipdir. Şo taýda Makdonalsyň wekilleri dogramaň patentini dollar baryny döküp satyn alypdyrlar. Şondan soň Pariždäkiler biziň çopany elden çykarmaly däl diýen karara gelip, oňa iş hödürleýäler diýýä. "Ýurdumda meniň ýaly çopana gytçylyk ýok-la" diýäge-de biziň çopanam razy bolup Parižde işläberipdir diýýä. Şondan bärem Parižli Türkmen çopan gowy ýaşaýamyş. :-) (Suratdaky Eýfel başnýasynyň öňünde selfi çekýän türkmen fotomontaždyr. Eýesi hakyny halal edewersin) | |
|
| |
| Ähli teswirler: 11 | |
käte türkleñ MasterChefini göremde pikir edyän arasynda başga yurtlaryñkyny edişleri yaly türkmen konseptini etseler näme naharlar goyarlarka. Dograma üçinä wagtlary yetmez.
Mäşimizem reklama etmeli hem guymaklysyny (kiçikäk bulamak diýýädik weli soñky döwür guymak diyip baſladyk) hem podliwalysyny. Biziñkiler arasynda ikisini birden edýä. Padliwaly+guymakly. Bet. Başga milletlerde ysmanagy bulamakly hişirýän bamyka. Gyzyklanyp görmeli. Yok bolsa (ba bolsa-da) haydan hay yuneska yüz tutup milli gymmatlygymyza goşdurmaly. Taysyz tagam. Umuman bulamagyñ diñe özi yetik. Hasam narpyzlysy. Agzyñy suwardan bolsam sorry  | |
