23:51 Atamyň tahýasy | |
| ATAMYŇ TAHÝASY Çagalykda kemsidilen gözýaşlar, Dürbi deýin açyklapdy durmuşy. Ýakyn-alys, ýagşy-ýaman gardaşlaň, Öwreder ekenler ynsan gurluşyn. Biri nan ornyna akyl beripdir— ir düşünýär gahatllygna açlygyň; biri don ornyna nakyl beripdir— ir düşünýär täleýiniň keçligin. Zenanlaň biriniň ýüregi awap, Oglanjyga nepis tahýa tikipdir. Atam täze börügini sypalap, Ýatanda-da bile uka gidipdir. Beýgeldipdir tahýa ony bir sere, Göwniçökgün halyn az-kem ýazypdyr. Dogumlanyp, söz aýdanmyş eneme, Enem pahyr uýaljyndan dymypdyr... Ýetim atam öz göbegni kesmänkä, Obadaşlar ýetişipdir dadyna... (Ýogsa, enem kämil ýaşa ýetmänkä, niýetleri gaçmak eken badyna). Kelebiň ujuny ýitiren atam, Ahyr bir gün sermestlikden aýňalyp, Syrdaş, süňk dostundan maslahat soran. Ol hem berenmişin jogabyn laýyk: “Il-ulusdyr dosty-ýary ýekäniň. Illerden kem bolmaz tutjak toýumyz, başym sadagadyr, malym hem känim, seniň hem öýüňdir biziň öýümiz”. Bütin oba öýeripdir ýetimi, Toýuň dabarasy dagdan aşanmyş. Ine, şeýdip päk söýginiň sütemi, Ýaşlaň beslän arzuwyna eltenmiş. Şaýatdyr bu tahýa agtyklaryna, Çowluk toýuny hem görüp ýetişdi, Bezeg berdi toýlarmyzyň baryna. ...Ýyllar gören tahýaň görki öçüşdi... Panydan bakyýa göçüp gitmäkä, Ne atam, ne enem wesýet edipdir. Enem jan tahýany güýe düýtmäkä, Dermanlapjyk sandygyna salypdyr. Hatarmyzda toý bolanda her gezek, Törde goýýas yrym üçin tahýany. Dabara goşulýar atama derek, Hemme toýlarmyzyň beýik myhmany. © Kakajan BALKANOW iýul 2022 ý. | |
|
| |
| Ähli teswirler: 0 | |