14:41 Öli / hekaýa | |
 ÖLI Duralga ýetip barýarka öldi. Ýöne munuň üçin säginmäge wagty ýok. Awtobus eýýäm duralgada, hyrsyz sürüji diňe ylgaşlap gelýänler üçin säginýär. Yzgytsyz nazarlaryň, arzan atyr yslarynyň, zombiler ýaly yranjyraşyp duran ynsan bedenleriniň arasyna sümülip, rahatrak bir ýerde durup bilen wagty özüni öňkülerden has ýeňil duýýanyny, ýa-da özüniň barlygyna ähmiýet bermeýänligini aňşyrdy. Gabadyndaky oturgyçda oturan, ýöne oturgyja has uly gelýän göwresi ep-esli daşa çykyp duran gelneje oňa «aňyrrak dur» diýýän terzde bakanda, öňküleri ýaly ýitip gitmek islegi döremedi, hatda hiç hili täsir etmedi – «Menem saňa süýkenmäge höwesli däl, ýöne görýäň-ä, dyknyşyk, süýşmäge ýer ýok» – egnini gysyp oňdy. Bu gelnejäň ýüzi tanyş göründi. Iş ýeriň ýeňsesinde bukuja ýerdäki zibil gutydan baklaşkalary çykaryp duran ors, girelgeden girizmezlik üçin çekilen zynjyryň o başyndaky köne oturgyçda çilim çekip oturan garawul ýaşuly, ýasama mähirli şelaýyn tämizlikçi gelin... hemmesi gaty tanyş göründi. Hatda başlygam. Başlygyň bu gezekki iňirdilerem o diýen täsirli ýaňlanmady. Onuň işgärlere aýdýan teýeneli sözleri göýä birnaçe ýyl öň eşdilen igenjiň ýatlamasy ýalydy. Başlygam muny duýdy. Ýüzüne seredip biraz dymandan soň: «Geldiňmi?» diýip sorady. – Geläýdim öýdýän. 21.05.2022 © Nejep BAÝAT | |
|
| |
| Ähli teswirler: 11 | |
2
0
0
| |
