09:27 Eje | |
 EJE Bu gije ýatyp bilmedim, eje, 36 ýaşyň gorkusy bardy içimde. Meni 37-ä geçiren gijäniň ㅤㅤㅤㅤㅤsäherinde sowuk bar, Üşedim, eje! Bütin gije Sesiň geldi gulaklaryma — Geçmişden sesiň gelýärdi: «Ulal, gyzym, Ýöre, gyzym, Dil aç, gyzym!» diýerdiň... Ulaldym, eje, Taryhyň iň rehimsiz ýyllarynda ulaldym. Dil açdym, eje, Durmuşyň iň kötel ýollarynda Ýöredim, eje! Rehimsiz uranam boldy, Ýykylyp-turanym boldy... Turmasyna turdum, ㅤㅤㅤㅤemma janym çoh agyrdy, Kalbym çoh agyrdy, Eje... Sen maňa bu dünýäde Zenan bolmagyň Beýle kyn düşýänligini Aýtmandyň ahbetin... Aýak üstünde durmak, Namysly bolup ýaşamak, Hak hasaplan zadyňy aýtmak isleseň, Zenan bolmagyň jogapkärçiligi ㅤㅤㅤㅤㅤㅤㅤㅤㅤjuda agyr eken, eje! Sen maňa beýle diýmändiň ahbetin... Hiç kime görkezmedim gözýaşlarymy, Içden aglamagy öwrendim, eje, Bagtlylyk roluny oýnamagy... Ýüregim aýamdaka hem Başymy dik tutup gezmegi. Meni uranlary begendirmezlik üçin, Ýykylmazlygy öwrendim, eje! Ýalandan gülmegi şeýle bir öwrendim welin, Çyn gülkini unutdym. Bagtly bolan bolmagy ㅤㅤㅤㅤㅤㅤㅤㅤşeýle bir öwrendim welin, Bagtlylygyň, aslynda, ㅤㅤㅤㅤㅤㅤㅤnähili bolýanlygyny unutdym... Bu gije sesiň geldi gulaklaryma — Maňa erteki aýdyp bererdiň, Haýryň hemişe Şeri ýeňjegini aýdardyň. Men 36 ýyllap Haýryň ýeňşine garaşdym, Şer üstün çykanda agladym, eje! Seniň ertekileriň beýle gutarmazdy ahyry... Seni diňleýärdim, eje, «Bir bar eken, bir ýok eken» diýerdiň. Meniň ertekimde «Bir ýok ekenler» juda köp boldy-la... Ulaldym, eje, Men indi öňki gyz däl, Agyry hem gözýaşlar bilen Kemala gelen zenan men... Ýadyňdamy, eje, Käbe ýolundan barýarkak Sen pessaý doga okaýardyň, Birden senden Kim üçin doga okaýanyňy soradym. Ýüzüme bakyp: «Eje bolaňda bilersiň» diýdiň, Men eje bolmadym, eje... Emma sähelçe bolsa-da, saňa düşünýän... Arkadan uran dostlary, Kalbymy beren söýgüliniň Öweý bakyşlaryny göremde, Düşündim, eje, Sen söýenip biljek Täk barlygymsyň... Begenjimi paýlaşdym seniň bilen, Emma örtenmesin diýip, Gussamy paýlaşmadym, eje, Derdimden köýmesin diýip. Ilki söýgim daşa urlanda, Maňa diňe sen düşündiň. Men sende gördüm adama düşünmegiň nähili ㅤㅤㅤㅤㅤㅤㅤㅤㅤㅤsessiz bolýanlygyny... Söýenim maňa: — Sen meniň üçin hiç zatsyň! — ㅤㅤㅤdiýeninden bäşje minut soňra, Sen maňa: — Sen meniň barlygymsyň! — diýdiň. Sen maňa muny diýeňde, Men seniň däl, onuň barlygy bolmak ㅤㅤㅤㅤㅤㅤㅤㅤㅤㅤㅤㅤㅤㅤㅤisleýärdim. Emma hemişe şeýle boldy — Ýanymda hemişe sen bolduň, eje... Seniň gözleriňde Gazaplaryň iň gözeli bolardy, Kimdir birleri meni aldadanda... Bosgunlaryň ýurt hasratyny, Taşlanan körpeleriň gözýaşlaryny Süňňümde syzdym. Täleýi ters gelenleriň ürkek bakyşlaryny Süňňümde syzdym. Söweşde ýitiren dostlarymyň Gözlerini, arzuwlaryny, hyýallaryny Hiç unutmadym, eje... Meni agyry-yzalar ulaltdy, Has-da güýçli boldum, eje! Ýaşlygyň, yşkyň, söýginiň dady Yzalarda, söweşlerde ýitip gitdi. Soňra söýgä akylym ýetende, Ol indi menden gaçýardy... 37 ýaşa ýetdim, eje, Ataşa atylan Žannadan, Watan ugrunda Kiriň başyny kesen ㅤㅤㅤㅤㅤㅤㅤㅤㅤㅤㅤㅤㅤㅤTomarisden, Isgendere adalat dersini geçen Nüşabeden, Yşkyň şehidi Leýliden Has köpräk ýaşadym, eje! Emma ne Tomaris bolup bildim, Ne Nüşabe, ne Žanna, Leýli hem bolup bilmedim, eje... Öwezine seniň barlygyň boldum, Meni çagalygyma äkit sen, eje, Soňy bagtly tamamlanýan ertekiler ㅤㅤㅤㅤㅤㅤㅤㅤㅤㅤㅤㅤㅤㅤaýdyp ber. «Bir bar ekenleri» köp bolsun, 37 ýaşymyň ilki säherin Seniň ertekileriňe ynanyp garşy almak isleýän. © Ganire PAŞAÝEWA (1975—2023), azerbaýjan şahyry Terjime: © Orazmyrat MYRADOW | |
|
| |
| Ähli teswirler: 6 | |
|
| |
